Jón Gerald yfirheyrður í allan dag

Efnahagsbrotadeild Ríkislögreglustjóra hefur yfirheyrt Jón Gerald Sullenberger í allan dag vegna meintra fjármálabrota forsvarsmanna Baugs. Málið snýr aðeins að forsvarsmönnum fyrirtækisins en er óskylt þeirri sátt sem náðist á milli Jóns Geralds og Baugs í fyrra. Allir aðilar málsins neita því að nokkur sátt hafi verið gerð á bak við tjöldin. Jón Gerald kom til Íslands gagngert til að bera vitni í rannsókn á fjármálaumsvifum forsvarsmanna Baugs. Upphaflega áttu vitnaleiðslurnar að fara fram í Héraðsdómi Reykjavíkur en því var breytt á síðustu stundu til að forðast kastljós fjölmiðlanna. Í mjög óljósum fréttum af komu Jóns Geralds síðustu dægrin hefur komið fram að hann hafi átt að koma fyrir Héraðsdóm af kröfu Baugsmanna. Þetta mun ekki vera rétt heldur er skýringin einfaldlega sú að eina leið Ríkislögreglustjóra til að kalla Jón Gerald fyrir sem vitni var að kveða hann fyrir dómara, því mönnum er frjálst að neita að koma í yfirheyrslu hjá lögreglu í máli sem þessu. Þegar í ljós kom mikill áhugi fjölmiðla að fjalla um málið, var ljóst að yfirheyrslur yrðu opinberar, færu þær fram í Héraðsdómi, því aðeins má loka vitnaleiðslum fyrir dómi í kynferðismálum gegn börnum eða að rannsóknarhagsmunir krefjast þess. Því var samið um að yfirheyrslur yrðu fluttar í lokaðar skrifstofur Ríkislögreglustjóra. Jón Gerald kom stundvíslega klukkan tvö til Ríkisögreglustjóra og vildi sem minnst um málið segja. Aðspurður um hvers vegna „fundarstað“ hafi verið breytt sagðist hann ekki hafa hugmynd um það og fréttamenn yrðu að spyrja lögregluna að því. Jón sagði fundarstaðnum hafa verið breytt í morgun. Yfirheyrslan stóð yfir í allan dag. Jón Gerald rekur fyrirtækið Nordica og annaðist um áralangt skeið innkaup Bónusverslana í Bandaríkjunum. Hann höfðaði mál gegn Baugi vegna brota á viðskiptasamkomulagi og ógreiddra reikninga en í fyrra náðist sátt í því máli og var að mestu gengið að kröfum Jóns Geralds. Hann heldur hins vegar til streitu kæru á hendur forsvarsmönnum Baugs og er yfirheyrður eingöngu um þann þátt málsins. Allir helstu aðilar þessa máls í dag vildu sem minnst málið segja í samtali við fréttastofu. Jón Ásgeir Jóhannesson, forstjóri Baugs, segist ekkert hafa við yfirheyrslurnar að athuga og að ekkert sé að óttast í þeim efnum. Jón H Snorrason, yfirmaður efnahagsbrotadeildar ríkislögreglustjóra, sagðist bundinn trúnaði og sama sagði Jón Steinar Gunnlaungsson og aðalleikarinn í dag, Jón Gerald Sullenberger.