Fjársvelta Gæsluna af ásetningi

Sævar Gunnarsson, formaður Sjómannasambandsins, segir stjórnvöld fjársvelta Landhelgisgæsluna af ásetningi. Hann segir óviðunandi að það sé eitt, og stundum ekkert, varðskip á sjó. Sævar Gunnarsson segir lágmarkskröfu að það séu þrjú varðskip til reiðu og þar af tvö alltaf á sjó. Nú eru tvö skip til ráðstöfunar og hvorugt þeirra á sjó. Hann segir að menn hafi ekki sest niður og skilgreint hlutverk Landhelgisgæslunnar nægilega vel og úthlutað henni fjármunum í samræmi við það. Sævar segir Gæsluna hafa margar skyldur á sjó, t.d. varðandi réttindi manna, skráningu skipa, lögmæti veiðarfæra, mengun svo og umferð skipa um landhelgi Íslands. Hann segir ekki mögulegt að sinna neinu af þessu úr flugvélum og því gangi ekki að hafa þau bundin við bryggju. Sævar segir Sjómannasambandið því krefjast þess að skipin verði gerð út.    Sævar segir ennfremur að skipin séu síðast en ekki síst mikilvæg fyrir öryggi sjómanna. Mjög langt sé t.a.m. á milli Reykjanesshryggs og Smugunnar þar sem sum skip veiði og lágmark sé að eitt varðskip sé úti ef eitthvað kæmi fyrir. Hann segir að menn fjársvelti Landhelgisgæsluna viljandi. Þeir taki áhættuna á því að hafa skipin inni til að spara peninga. Ef það gangi áfallalaust sé hættan sú að þetta eftirlit leggist af, en það gangi hins vegar ekki að sögn Sævars.  Sævar segir fjársvelti Landhelgisgæslunnar ekki vera að gerast allt í einu núna heldur hægt og bítandi. Sjómannasambandið hafi varað við þessu fyrir tveimur árum, aftur í fyrra og svo enn einu sinni sl. vetur. Hann segir umræðu um málið hafa verið í gangi fyrir kosningarnar í fyrra og þá hafi verið sagt að bætt yrði úr þessu. Ekkert hafi hins vegar gerst í málinu.