Agi hjá Mourinho

Jose Mourinho, hinn nýi knattspyrnustjóri Chelsea, hefur heldur betur lagt mark sitt á liðið þá tæpu viku sem það hefur verið við æfingar. Skipulag Mourinho er slíkt að aðrir forkálfar innan félagsins gapa af undrun á æfingasvæðinu. Það fyrsta sem Moruinho gerði á fyrstu æfingunni á sl. mánudagsmorgun var að gefa hverjum og einum leikmanni vænan bækling sem tilgreinir allar þær skyldur sem leikmenn undir hans stjórn hafa og verða að hafa lært fyrir fyrsta leikinn í deildinni, gegn Manchester United 15. ágúst. Eiður Smári Guðjohnsen segist hrífast af vinnubrögðum Mourinho. "Hann er vissulega nýbyrjaður en þetta lítur mjög spennandi út. Svona skipulag lætur manni finnast vera hluti af liðinu alveg frá upphafi. Hann er svo skipulagður og þegar hann segir að æfing eigi að vera 90 mínútur að lengd, þá er síðasta teygjan gerð á 90. mínútu. Agi er orð sem öðlast allt aðra merkingu hjá Mourinho og hefur hann heldur betur bætt ofan á reglur á borð við að ekki megi nota farsíma á æfingasvæðinu og aðrar í þeim dúr. Leikmenn þurfa að mæta á slaginu klukkan níu á æfingasvæðið og skulu snæða saman morgunverð í klukkustund áður en morgunæfingin hefst. Leikmenn hafa útvistarbann og mega ekki yfirgefa heimili sín eftir miðnætti á virkum dögum. Leikmenn verða að vera farnir að sofa fyrir klukkan tvö, jafnvel þótt að langt sé í næsta leik. Þá munu menn þurfa að mæta snyrtilegir til fara á æfingar til að sýna fram á stílbragðið sem er við lýði hjá félaginu.