Tvö töpuð stig Skagamanna

Fylkir og ÍA skildi jöfn, 2-2, í leik liðanna á Fylkisvelli í Landsbankadeild karla í knattspyrnu í kvöld og er óhætt að segja að leikurinn hafi boðið upp á mikla dramatík. Skagamenn réðu lögum og lofum lengst af og höfðu 2-0 yfir í hálfleik. Grétar Rafn Steinsson skoraði fyrsta mark Skagamanna á 32. mínútu eftir sérlega glæsilega sókn. Ellert Jón Björnsson fór illa með Val Fannar Gíslason, fyrirliða Fylkismanna, lék upp á endamörkum og gaf fyrir á Harald Ingólfsson sem stóð fyrir opnu marki. Haraldur hitti ekki boltann en Grétar Rafn náði honum og skoraði með föstu skoti af stuttu færi. Undir lok hálfleiksins bætti Haraldur síðan við öðru marki fyrir Skagamenn. Hann fékk fallega stungusendingu frá Stefáni Þórðarsyni inn fyrir vörn Fylkis og skoraði af öryggi. Hann meiddist hins vegar í samstuði við Bjarna Þórð Halldórsson, markvörð Fylkismanna, þegar hann skoraði markið og varð að fara af velli. Í síðari hálfleik voru Skagamenn mun sterkari og virtist fátt benda til þess að Fylkismenn myndu fá eitthvað út úr leiknum. Þeir girtu sig hins vegar í brók undir lok leiksins og minnkuðu muninn átta mínútum fyrir leikslok úr sinni fyrstu almennilegu sókn í leiknum. Ólafur Páll Snorrason gaf þá upp í hornið á Sævar Þór Gíslason sem gaf fyrir á Ólafs Stígsson sem skoraði af öryggi. Fimm mínútum síðar fengu Fylkismenn síðan vítaspyrnu þegar Gunnlaugur Jónsson var dæmdur brotlegur í viðskiptum sínum við Þorbjörn Atla Sveinsson, sóknarmann Fylkis. Finnur Kolbeinsson tók spyrnuna, Þórður Þórðarson, markvörður Skagamanna varði en Ólafur Páll Snorrason fylgdi vel á eftir, jafnaði metin og tryggði Fylkismönnum eitt stig sem þeir áttu ekki skilið miðað við gang leiksins. Fylkir - ÍA 2-2 0–1 Grétar Rafn Steinsson (32.) 0–2 Haraldur Ingólfsson (45.) 1–2 Ólafur Stígsson (82.) 2–2 Ólafur Páll Snorrason (87.) Dómarinn Garðar Örn Hinriksson, í meðallagi Gul spjöld Fylkir: Ólafur Stígsson (45.) - ÍA: Stefán Þórðarson (24.), Ólafur Þórðarson (24.), Gunnlaugur Jónsson (28.), Ellert Jón Björnsson (88.). Bestur á vellinum Ellert Jón Björnsson, ÍA Tölfræðin Skot (á mark): 12–21 (5–8) Horn: 3–4 Aukaspyrnur fengnar: 21–22 Rangstöður: 4–2 Varin skot: Fylkir: Bjarni Þórður Halldórsson 6 - ÍA: Þórður Þórðarson 3. Mjög góðir Grétar Rafn Steinsson og Ellert Jón Björnsson ÍA Góðir Bjarni Þórður Halldórsson, Þórhallur Dan Jóhannsson, Ólafur Stígsson, Sævar Þór Gíslason og Ólafur Páll Snorrason Fylki  - Þórður Þórðarson, Reynir Leósson, Pálmi Haraldsson, Julian Johnsson og Haraldur Ingólfsson ÍA.