Smáþjóðin gerir þeim stóru grikk

Grikkir hafa komið allra liða mest á óvart á Evrópumótinu í Portúgal, gert hverri stórþjóðinni á fætur annarri skráveifu, unnið Portúgal, Frakkland og Tékkland og gert jafntefli gegn Spáni. Ekki slæmt fyrir þjóð sem hafði aldrei unnið leik á stórmóti þegar flautað var til leiks á Evrópumótinu 12. júní síðastliðin. Einhverjar ástæður liggja að baki þeim frábæra árangri liðsins að komast í úrslitaleik mótsins og þegar fljót er á litið koma sex ástæður upp í hugann. 1. Otto Rehhagel Þessi þýski þjálfari hefur verið lykilmaður í árangri gríska liðsins, þökk sé skilningi hans á leikskipulagi og þeim liðsanda sem hann hefur náð í gríska liðið. "Hann hefur bætt liðið ótrúlega þann tíma sem hann hefur verið hér og á stóran þátt í árangri okkar. Hann er eins og faðir, við elskum hann," sagði Stelios Giannakopoulus, leikmaður Bolton og gríska liðsins, við fjölmiðla. Rehhagel hefur náð að sameina ellefu einstaklinga sem eina heild og hann þykir vera flestum fremri í því blása sínum mönnum baráttuanda í brjóst. Liðin sem hann styrir hafa aldrei verið þekkt fyrir skemmtilega knattspyrnu en árangur hans með þýsku liðin Werder Bremen, Kaiserslautern og Bayern München og nú gríska liðið hafa fært honum mikla virðingu leikmanna, virðingu sem skilar sér inni á vellinum. 2. Leikskipulag Rehhagel hefur gert gríska liðið sveigjanlegt og leikskipulag liðsins breyttist eftir andstæðingum og gangi leikjanna. Leikmenn gríska liðsins virðast skilja hvað hann vill, fara eftir því og liðið hefur blómstrað. "Hann gefur fyrirskipanir og við förum eftir þeim, svo einfalt er það," sagði Giannakopoulus um skipulagið sem hefur það markmið að lama andstæðinginn hverju sinni. Hann spilaði með fimm manna miðju og einn framherja gegn Portúgal og Spáni sem spila svipað en breytti yfir í 4-4-2 gegn Frökkum og Tékkum sem spila þannig. Allir þessir andstæðingar komust hvorki lönd né strönd. Leikmenn liðsins fá skýr skilaboð og sérstök verkefni, líkt og Giourkas Seitaridis sem tók Milan Baros gegn Tékkum og Mihalis Kapsis sem tók Jan Koller. Það er óvenjulegt nú til dags að sjá varnarmenn dekka maður á mann en Rehhagel notar það óspart. 3. Einstaklingar Heimspeki Rehhagels er einföld: "Eina stjarnan hjá mér er liðið." Það hefur samt ekki komið í veg fyrir að einstaklingar hafi náð að blómstra. Giourkas Seitaridis gekk vel að stöðva Frakkann frábæra Thierry Henry í leik liðanna í átta liða úrslitum og ekki síður Tékkann Milan Baros í undanúrslitunum. Miðvörðurinn Traianos Dellas hefur vakið mikla athygli fyrir góða frammistöðu, framherjinn Angelos Charisteas hefur skorað tvö mikilvæg mörk, gegn Spánverjum og Frökkum, og unnið mikið af háum boltum og miðjumennirnir Angelos Basinas og fyrirliði Theodoros Zagorakis hafa hlaupið úr sér lifur og lungu á miðjunni. Þá má ekki gleyma varamanninum Vassilios Tsiartas sem hefur komið inn á og lagt upp jöfnunarmarkið gegn Spáni og sigurmarkið gegn Tékkum. 4. Lítil pressa Það er óhætt að segja að það hafi verið lítil pressa á gríska liðinu á mótinu. Sennilega var það aðeins Lettland sem spilaði undir minni pressu. Að komast í lokakeppnina var talið afrek í Grikklandi og liðið hefur alltaf verið í hlutverki litla liðsins í mótinu, líkt og það mun vera í úrslitaleiknum gegn Portúgal í dag. Grikkir geta því spilað lausir undir pressu því þeira hafa þegar náð lengra en nokkurn hefði órað fyrir í upphafi. 5. Frískleiki Það hefur hjálpað Grikkjum mikið að flestir leikmanna liðsins komu tiltölulega frískir til leiks á EM. Þeir leikmenn sem spila í Grikklandi spiluðu ekki jafnmarga leiki og félagar þeirra í öðrum liðum og þurftu til að mynda ekki að hafa áhyggjur af meistaradeildinni. Aðalmenn liðsins, sem leika utan Grikklands, áttu fæstir fast sæti hjá sínum liðum, Traianos Dellas hjá Roma og Giorgios Karagounis hjá Inter Milan sátu meira og minna á bekknum hjá sínum liðum, Angelos Charisteas var fyrir aftan Brasilíumanninn Ailton og Króatann Ivan Klasnic hjá Werder Bremen og Stelios Giannakopoulus var inn og út úr liðinu hjá Bolton. 6. Að koma á óvart Grikkir hafa komið á óvart alla keppnina. Það hefur verið leitt að því líkum að Portúgalar og Spánverjar hafi vanmetið gríska liðið í riðlakeppninni. Frakkar voru svo andlausir gegn þeim í átta liða úrslitunum að þeir virtust halda að hlutirnir kæmu að sjálfu sér. Það sama gerðist hjá Tékkum í undanúrslitunum og því verður fróðlegt að sjá hvort Portúgalar falla í sömu gryfjuna og í fyrsta leiknum. "Þeir hafa séð hvers við erum megnugir og ég er viss um að þeir munu ekki vanmeta okkur aftur," sagði Angelos Charisteas um mótherja gríska liðsins í úrslitunum. Grikkir hafa þó tröllatrú á því að þeir geti enn komið á óvart. "Við höfum unnið Portúgal, Frakkland og Tékkland og sent Spánverja heim. Af hverju ættum við ekki að geta unnið úrslitaleikinn?" spurði varnarmaðurinn Panagiotis Fyssas.