Almenn ánægja með hátíðir

Vestmannaeyingar eru ánægðir með sína þjóðhátíð en Akureyringar. Þar voru fangageymslur tómar í morgun. Mikil eftirvænting er í Herjólfsdal eftir brekkusöng Árna Johnsens í kvöld. Það hafa skipst á skin og skúrir í Vestmannaeyjum um helgina. Í morgun og fram eftir degi í dag var til að mynda mígandi rigning, en stytti upp og birti til þegar líða tók á daginn. Lögreglan er afar ánægð með hegðun hinna sjö til níu þúsund gesta í það heila tekið. Fangageymslur hennar voru galtómar í morgun, en í dag hafa þrír verið handteknir með smáræði af eiturlyfjum í fórum sínum. Flugeldasýningin fór fram venju samkvæmt í gær, og í kvöld er komið að því sem margir kalla hápunkt þjóðhátíðarinnar, en það er brekkusöngurinn. Honum stjórnar Árni Johnsen, sem var fjarri góðu gamni í fyrra en var orðinn jafn mikið einkennismerki hátíðarinnar og brennan og brúin. Aðrir vilja meina að hápunktur þjóðhátíðarinnar í ár hafi verið í gær, þegar hljómsveitin Egó, með Bubba Morthens fremstan í flokki, reis upp eftir 20 ára dásvefn, og kyrjaði öll gömlu lögin af endurnýjuðum kraftil. Lögreglumenn eru mjög ánægðir með gang hátíðahaldanna á Sauðárkróki, Siglufirði og í Neskaupstað, eins og raunar annars staðar á landinu. Á Sauðárkróki eru um tíu þúsund manns á unglingalandsmóti UMFÍ og þar hefur allt gengið eins og í sögu, að sögn lögreglunnar. Á Siglufirði eru um 5000 gestir á Síldarævintýri og þar hefur verið roknastemming. Einn gestanna orðaði það svo að þetta væri eins og landlega í gamla daga en án slagsmálanna. Neistaflug í Neskaupstað hefur sömuleiðis gengið vel. Þar hefur verið mikil gleði og neistaflug, en engir eldar kviknað.