Bræður sjá um sig sjálfir

Jónas Þórir Þórisson, framkvæmdastjóri Hjálparstarfs kirkjunnar, er nýkominn frá Úganda þar sem hann fylgdist með og mat árangur hjálparstarfsins. Hann hitti bræðurna Muwango, sextán ára, og Peter, fjórtán ára, sem fengið hafa hjálp til sjálfshjálpar. Frá því fyrir um tveimur og hálfu ári síðan hefur líf bræðranna, sem eru munaðarlausir, gjörbreyst. Hlutfall eyðnismitaðra er hátt í Úganda og fjöldi barna er munaðarlaus. Sjálfboðaliði fann drengina hrædda og illa haldna í lélegum strákofa á bananaakri sem áður var eign foreldra þeirra. Ættingjar drengjanna ásældust akrana og settust drengirnir þar að til að verja eign sína. Þeir voru litnir hornauga af samfélaginu og voru undir hvers manns hæl. Sjálfboðaliðar hafa hjálpað drengjunum við að byggja lítið íbúðarhús og annað hús til að elda svo vistarverur þeirra fyllist ekki af reyk. Þeir fengu hjálp við að koma upp kamri og vatnstanki til að safna rigningarvatni en áður þurftu þeir að sækja vatn um langa leið. Drengirnir hafa fengið geitur og bananaakurinn er aftur kominn í rækt. Muwango stundar viðskipti með hænur sem hann kaupir og elur í nokkurn tíma áður en hann hjólar með þær í næsta stórbæ og selur aftur á hærra verði. Einnig leggur hann mikla áherslu á að Peter, bróðir hans, geti gengið í skóla. Sjálfur hefur Muwango löngun til að læra reiðhjóla- og bílaviðgerðir en hann hefur augljósa hæfileika á tæknisviðinu. Hann hefur með mikilli útsjónarsemi útbúið loftnet úr reiðhjólagjörð og gaddavír og getur hann þannig hlustað á fimm útvarpsstöðvar í stað tveggja en hann hefur mikinn áhuga á fréttum og umheiminum. Hann á gamalt og lúið útvarpstæki sem tengt er frumstæðum hátalara úr vatnsbrúsa sem hann hefur sjálfur búið til. Útvarpið gengur fyrir rafhlöðum sem eru mjög dýrar og því nauðsynlegt að fara sparlega með þær. Með því að tengja litla rauða peru við þrjár samanlímdar rafhlöður getur Muwango boðið bróður sínum að lesa stutta stund á kvöldin við einu raflýsinguna í litla þorpinu þeirra.