Eyjamenn unnu í sjö marka leik

Eyjamenn sigruðu Keflvíkinga 2-5 í Reykjanesbæ í gær og gefa ekkert í toppbaráttu Landsbankadeildar karla. Eyjamenn eru eftir leikinn í þriðja sæti, þremur stigum á eftir toppliði FH-inga. Sigurinn var sanngjarn og gestirnir úr Eyjum yfirspiluðu mótherja sína lungann úr leiknum. Það var Ian Jeffs sem kom Eyjamönnum á bragðið strax á 9. mínútu eftir góðan undirbúning Gunnars Heiðars Þorvaldssonar. Keflvíkingar sóttu nokkuð eftir markið og voru í tvígang nálægt því að jafna leikinn. Fyrst þegar Stefán Gíslason skallaði að marki eftir eina af fjölmörgu hornspyrnum Scott Ramsay, en Birkir Kristinsson varði glæsilega á marklínunni. Ingvi Rafn átti síðan skot eftir aðra hornspyrnu en Ian Jeffs hreinsaði á marklínu. Gunnar Heiðar skoraði annað mark Eyjamanna á 31. mínútu eftir góða sendingu Andra Ólafssonar. Keflvíkingar byrjuðu síðari hálfleik af krafti og strax eftir sjö mínútna leik minnkaði Hörður Sveinsson muninn með stórglæsilegu marki. Hann hamraði boltann viðstöðulaust upp í hægra markhornið, óverjandi fyrir Birki. Einar Þór Daníelsson sá þó um að slökkva vonarneysta Keflvíkinga þegar hann kom Eyjamönnum í 1-3 og eftir það yfirspiluðu gestirnir baráttulausa Keflvíkinga. Ian Jeffs bætti við öðru marki sínu í leiknum og kom ÍBV í 1-4, Guðmundur Steinarsson minnkaði muninn beint úr hornspyrnu en Bjarnólfur Lárusson skoraði síðan sjöunda og síðasta mark leiksins beint úr aukaspyrnu á lokamínútunni. Spilum góðan sóknarbolta „Þetta var frábær sigur. Við komust í 2-0 og vorum í góðum gír en síðan hleyptum við þeim aðeins inn í leikinn með 1-2 og þeir voru mjög grimmir í upphafi síðari hálfleiks. En þegar við gerðum þriðja markið þá var þetta ekki spurning, þá var leikurinn búinn“, sagði Einar Þór Daníelsson, leikmaður ÍBV. „Við erum að spila góðan sóknarbolta eins og við sýndum í dag og búnir að skora flest mörkin í deildinni. Það er engin tilviljun að við erum enn með í toppbaráttunni og mér líst vel á framhaldið, þetta verður barátta fram í síðasta leik.“