Fékk svar eftir 28 ár

Georg Titianu, sem býr í Rúmeníu hefur loks fengið svar við umsókn sinni til rúmenska landssímans um að fá lagða símalínu í íbúð sína. Hann sótti um að fá línuna árið 1976, fyrir 28 árum, og á miðvikudag fékk hann loks svar. Í svarbréfi frá rúmenska landssímanum, Romtelecom, kom fram að engar símalínur væru á lausu í augnablikinu en Titianu var tilkynnt að hann gæti útfyllt eyðublað ef hann óskaði eftir því að verða áfram á biðlista. Titianu svaraði um hæl að hann væri hrærður yfir því að landssíminn hefði ekki gleymt honum, en tilkynnti að síðan umsóknin var send inn hefði hann gift sig, eignast tvö börn og keypt sér símalínu eftir öðrum leiðum.