Höfum viljann til að vinna

"Ég á við smávægileg meiðsl að stríða í fæti og það er ástæðan fyrir því að ég spilaði ekki meira með gegn Haukum," sagði handboltastjarnan Stefan Lövgren, fyrirliði og leikmaður Kiel, en liðið vann Íslandsmeistara Hauka auðveldlega að Ásvöllum í fyrrakvöld með sjö marka mun 28 - 35. Lövgren sem er án alls vafa stærsta stjarna liðsins og einn af fremstu handknattleiksmönnum veraldar í dag kom lítið við sögu í leiknum og spilaði aðeins síðustu mínútur leiksins vegna meiðsla. Greinilegt var engu að síður að kappinn brann í skinninu allan tímann á bekknum og hélt hann sér heitum með teygjuæfingum með jöfnu millibili. "Strákarnir kláruðu þetta mikið til án mín enda er mikil breidd í hóp Kiel. Það er brýn þörf á slíkum mannskap þegar markmiðið er sett hátt og við hjá liðinu gerum það vissulega. Þeir eru margir sem spá því að við förum alla leið í Meistarakeppninni og innan liðsins teljum við okkur hafa getu og vilja til að fara alla leið. Þetta er titill sem alla handboltamenn dreymir um og við í Kiel erum engin undantekning." Lövgren segir ekkert hafa komið á óvart í leik Hauka enda hafi farið mikill tími í að kynna sér andstæðinginn áður en til leiksins kom. "Við tökum engu sem sjálfsögðu og það átti líka við um leikinn hér við Hauka. Sigur okkar var vissulega stór en við þurftum að hafa fyrir hlutunum. Auðvitað er einhver getumunur á liðinum tveimur enda um atvinnumannalið að ræða gegn áhugamannaliði en Haukar leika hraðan og skemmtilega handbolta og þeir héldu okkur sannarlega við efnið." Lövgren hefur oft komið til Íslands áður og finnst gaman hér að vera. Hann er mikill golfáhugamaður en hefur þrátt fyrir tilraunir ekki lækkað forgjöfina hjá sér sem neinu nemur um skeið. "Ég hefði getað hugsað mér að taka einn hring á golfvellinum ef tími hefði gefist til en það bíður betri tíma. Þó spilaði ég golf hér um sumar fyrir mörgum árum og mun áreiðanlega koma hingað aftur einn góðan veðurdag." albert@frettabladid.is