Metfjöldi fíkniefnamála upplýstur

Metfjöldi fíkniefnamála var upplýstur á þjóðhátíð í Vestmannaeyjum. Þrjár líkamsárásir voru kærðar og ein nauðgun tilkynnt neyðarmóttöku. Tungl var fullt í gær og fangageymslur fullar, en þjóðhátíðin þykir samt sem áður hafa farið vel fram. Þessi 130. þjóðhátíð í Vestmannaeyjum þótti takast með besta móti í ár. Á lokakvöldinu í gær sameinuðust gestir, ungir sem aldnir að venju í brekkusöng, með Árna Johnsen, sem var fjarri góðu gamni í fyrra. Þá þótti blyssýningin og flugeldasýningin með tilkomumeira móti. Einn maður var fluttur með sjúkraflugi til Reykjavíkur í nótt eftir að hann stökk ofan í tjörnina. Voru menn hræddir um að hann hefði orðið fyrir bakmeiðslum en betur fór en á horfðist og maðurinn er ekki alvarlega slasaður. Síðasta kvöldið á hátíðum sem þessum eru oft annasöm hjá lögreglu, enda þreyta oft hlaupin í gesti um það leyti. Fangageymslur lögreglu voru yfirfullar um nóttina á meðan mánin fór fullur um himininn. Fjöldi fíkniefnamála hefur aldrei verið meiri á þjóðhátíð. Alls komu í kringum 50 slík mál upp. Hins vegar segir lögreglan að mun minna hafi verið af öðrum málum eins og líkamsárásum. Þá hafi eitt kynferðisafbrot farið til neyðarmóttöku en það hafi ekki enn verið kært. Í dag var svo kominn tími til að tygja sig heim, taka niður tjaldið og pakka saman. Flug hefur ekki gengið snurðulaust frá Vestmannaeyjum í dag, og lá niðri um tíma. Fjöldi manns beið á vellinum nú síðdegis, en í morgunsárið kvörtuðu flugvallarstarfsmenn um að sætanýting væri ekki með besta móti þar sem margir farþegar voru enn við skemmtanahald í dalnum.