Fjölmennasta unglingalandsmótið

Fjölmennasta unglingalandsmóti UMFÍ til þessa var slitið í gærkvöld með flugeldasýningu. Talið er að um tíu þúsund manns hafi verið á landsmótinu á Sauðárkróki. Landsmót UMFÍ var haldið á Sauðarkróki fyrir þremur vikum. Um verslunarmannahelgina er það hins vegar Unglingalandsmótið og var það sjötta haldið á Króknum nú um helgina. Hljómsveitin Írafár skemmti gestum í gærdag og var mótinu svo slitið með flugeldasýningu í gærkvöldi. Á mótinu kepptu á annað þúsund unglingar í átta íþróttagreinum; í hlaupum, stökkum, köstum, sundi og fleiru. Óhefðbundnar keppnisgreinar hafa einnig vakið athygli og má þar nefna klifurvegg og körfubolta hipp hopp. Framkvæmdastjóri landsmótsins, Ómar Bragi Stefánsson, segist sáttur og er ekki í vafa um að unglingalandsmót sé komið til að vera og muni stækka með tímanum. Um sjö þúsund manns voru á unglingalandsmótinu á Ísafirði í fyrra. Veðrið lék við um tíu þúsund mótsgesti í Skagafirðinum um helgina. Á næsta ári verður unglingalandsmótið haldið í Vík í Mýrdal.