Skyggnst inn í nýjustu bókina

Höfundur Harry Potter bókanna vinsælu, JK Rowling, gaf aðdáendum tækifæri á að skyggnast örstutt í nýjustu bókina um töfradrenginn, en hún situr nú við skriftir hennar. Á heimasíðu höfundar gátu lesendur spilað leik og voru verðlaunin að fá að lesa tvær línur úr bókinni Harry Potter og hálfblóðs prinsinn. Ein setningin hljóðaði sem svo "hann líktist helst gömlu ljóni." Ekki var útskýrt hverjum væri verið að lýsa eða hvaðan úr bókinni setningin væri tekin. Rowling hefur ekki upplýst hver sé prinsinn sem titill bókarinnar vísar til og hefur heldur ekki gefið upp hvenær búast megi við útgáfu hennar. Bókin verður sú sjötta í röðinni en þar mun Harry Potter mæta óvini sínum Lord Voldemort.