Orrahríð á Gylfa Orrason

Leikurinn í gær var frábær skemmtun og bauð upp á allt sem góðan knattspyrnuleik þarf að prýða - nema mörkin. Fullt af færum, gríðarlega baráttu, umdeilda dómgæslu og mikla spennu. Það má segja að vendipunkturinn í leiknum hafi komið á síðustu fimm mínútum fyrri hálfleiks, sem fram að þeim tíma átti sína góðu kafla. Fyrst skoraði Arnar Gunnlaugsson fallegt mark sem dæmt var af vegna rangstöðu og var það mjög umdeildur dómur, allavega frá áhorfendastæðunum séð. KR-ingar pressuðu stíft í kjölfarið og átti Guðmundur Benediktsson meðal annars skalla í þverslá. Mínútu síðar var síðan Sölva Davíðssyni brugðið inn í teig af Matt Garner. Gylfi Orrason, mjög svo umdeildur dómari leiksins, dæmdi ekkert og urðu KR-ingar í kjölfarið æfir og létu Gylfa heyra það svo um munaði þegar gengið var til búningsklefa í hálfleik. Hann segist hinsvegar mjög viss í sinni sök að um enga vítaspyrnu hafi verið að ræða. "Ég var mjög vel staðsettur í þessu atviki og það var vissulega samstuð. En ég er alveg sannfærður um að þetta var ekki brot, annars hefði ég dæmt víti. Í markinu sem er dæmt af flaggar línuvörðurinn rangstöðu og ég get að sjálfsögðu ekki annað en brugðist við," sagði Gylfi í samtali við Fréttablaðið eftir leik. Sölvi var hinsvegar á öðru máli og sagðist hann hafa fengið vítaspyrnu fyrir mun minna. "Ég var að undirbúa skot og þá var hlaupið aftan á bakið á mér. Ég féll og mér fannst þetta klárlega vera víti. Ég veit ekki hvort dómarar eru búnir að merkja mig eða hvað það er, en þetta var engin öxl í öxl. Hann fór í bakið á mér," sagði Sölvi. Þótt að KR-ingar hafi kvartað markaði þetta mótlæti undir lok fyrri hálfleiks hinsvegar einskonar uppvakningu hjá leikmönnum liðsins, þeir voru greinilega reiðir og mættu gríðarlega vel stemmdir í seinni hálfleik. Eftir að hafa spilað í sama dúr og í tapleiknum gegn FH í síðustu viku lengst af í fyrri hálfleik, var allt annað að sjá til liðsins í síðari hálfleik. Löngu og glórulausu sendingarnar fram völlinn, sem voru í aðalhlutverki í fyrri hálfleik, voru á bak og burt í þeim síðari og var Guðmundur Benediktsson sérstaklega duglegur í því að sækja boltann og dreifa spilinu. Heimamenn voru án efa að spila sinn besta bolta í langan tíma og sköpuðu sér fullt af færum, reyndar rétt eins og Eyjamenn sem einnig fengu mörg upplögð færi sem ekki nýttust og voru að spila mjög vel. Eftir því sem leið á hálfleikinn náðu KR-ingar betri völdum og var það aðeins stórleikur Birkis Kristinssonar sem kom í veg fyrir að heimamenn skoruðu. Ekki má taka neitt af Eyjamönnum; þeir voru mjög skeinuhættir á köflum og sönnuðu að það er engin tilviljun að liðið sé í bullandi toppbaráttu. Það var í raun ótrúlegt að ekki skuli hafa verið skorað mark í leiknum; hann var feykilega opinn og klárlega einn sá skemmtilegasti í sumar. Willum Þór Þórsson, þjálfari KR, trúði því vart í leikslok að lið hans hefði ekki unnið leikinn. "Þetta var mjög góður leikur af okkar hálfu, liðið barðist mjög vel og það eina sem kom í veg fyrir að við unnum þennan leik var Birkir Kristinsson." Aðspurður um dómgæsluna kvaðst Willum ekki vera í vafa um að Gylfi hefði haft rangt fyrir sér í lok fyrri hálfleiks. "Dómararnir verða bara að eiga það við sig en frá mínum sjónarhóli var þetta löglegt mark og vítaspyrna," sagði Willum ómyrkur í máli. Birkir, sem reyndist betri en enginn fyrir Eyjamenn á lokamínútunum, kvaðst sáttur með eitt stig. "Ég er sáttur með eitt stig eftir að leikurinn þróaðist eins og hann gerði en fyrir leikinn hefði ég ekki gert það. Við ætluðum okkur að sigra hér í kvöld. En síðan kom það á daginn að við þurftum að verjast stóran hluta leiksins en hefðum þó alveg getað stolið sigri. Með þessu stigi höldum við okkur í skottinu á FH og eigum þá í næsta leik. Og það verður einfaldlega algjör úrslitaleikur fyrir okkur."