Bati Helga kraftaverki líkastur

Bati Helga Einars Harðarsonar, sem gekkst undir hjarta- og nýrnaígræðslu í síðasta mánuði, þykir ganga kraftaverki næst. Aðeins sex vikum eftir aðgerðina segist hann vera að springa úr krafti. Fréttastofan hitti hann að máli þegar hann kom til landsins í dag. Fjölmenni tók á móti Helga þegar hann lenti um hádegið. Það er aðeins einn og hálfur mánuður síðan skipt var um hjarta og nýru í honum, og reiknað með að hann þyrfti að vera mun lengur á sjúkrahúsi í Svíþjóð. Jafnvel læknum hans þykir batinn ganga kraftaverki næst. Helgi segir mesta muninn vera þann að nú slái hjartað 70 slögum í hvíld en ekki 100. Með hverjum degi finni hann minna til. Upphaf veikinda Helga má rekja til þess, að þegar hann var aðeins 15 ára gamall fékk hann vírus í hjartað. Hann var annar Íslendingurinn til að fá grætt í sig hjarta árið 1989. Fljótlega eftir aðgerðina kom leki að hjartaloku og hefur heilsu Helga farið ört hrakandi síðan. Hann hefur beðið lengi eftir nýju hjarta. Móðir Helga líkir bata hans við kraftaverk. Hún hafi búist við því að þurfa að vera erlendis í hálft ár en þetta hafi einungis tekið sex vikur, og tíminn hafi verið fljótur að líða.