Eiður Smári með eina markið

Eiður Smári Guðjohnsen skoraði eina markið í heimasigri á Manchester United í fyrsta keppnisleik liðsins undir stjórn portúgalska stjórans Jose Mourinho. Eiður Smári skoraði markið af miklu harðfylgi strax á 15. mínútu leiksins eftir skallasendingu frá Didier Drogba. Leikmenn Manchester áttu þó mun meira í leiknum, voru meira með boltann en náðu ekki að opna sterka vörn Chelsea. Leikurinn bauð þó ekki upp á mikla skemmtun enda erfitt fyrir bæði lið að byrja mótið á risaslag. Bæði lið hafa breyst mikið frá því í fyrra og koma þar meiðsli lykilmanna inn í myndina hjá Sir Alex Fergusson og lærisveinum hans í Manchester-liðinu. Það vantaði níu menn í lið United af þeim sökum. Arsenal vann öruggan útisigur á Everton, 1-4, þar sem mestu tíðindin voru kannski að Thierry Henry var ekki meðal markaskorara Arsenal. Henry lagði reyndar upp mörk fyrir bæði Dennis Bergkamp og Fredrick Ljungberg í leiknum en hin mörkin skoruðu þeir Jose Antonio Reyes og Robert Pires. Framkvæmdastjóri Everton, David Moyes, lét hafa það eftir sér eftir leikinn að hann væri í erfiðasta starfinu í ensku úrvalsdeildinni. "Þetta er líklega erfiðasta starfið í deildinni en þetta er jafnframt mikil áskorun fyrir mig til að sigrast á og ef það tekst verðum við mun betri á eftir. Ég kann enn vel við mig hér en það skiptir miklu máli að Everton haldi sér í deildinni enda hefur félagið verið þar í 125 ár eða meira," sagði Moyes sem þarf líklega sjá á eftir Wayne Rooney sem hefur líklega verið allt annað en heillaður af frammistöðu liðsins. Arsenal lék hinsvegar sinn 41 deildarleik án þess að tapa og mun jafna met Nottingham Forest ef þeir tapa ekki gegn Middlesbrough á Highbury á sunnudaginn kemur.