Háhýsi sagt eyðileggja bæjarmynd

Áformað er að reisa 12 hæða fjölbýlishús á lóð sem kennd er við húsið Baldurshaga á Akureyri og stendur þar sem Brekkugata og Þórunnarstræti mætast, skammt sunnan við Glerártorg. SS Byggir óskaði upphaflega eftir að reisa 12 hæða fjölbýlishús með 45 íbúðum en hönnuðurinn, Logi Már Einarsson hjá arkitektastofunni Kollgátu á Akureyri, og verktakinn sættust á minni byggingu eftir að umhverfisráð bæjarins fór þess á leit. Því er ráðgert að í húsinu verði 36 íbúðir, auk tómstundaaðstöðu fyrir aldraða á neðstu hæðinni. Í samtali við Fréttablaðið sagði Logi Már að það hefði ekki komið honum á óvart að bygging af þeirri stærð sem áformað er að reisa væri umdeild. Honum finnst hins vegar skorta á málefnaleg rök hjá þeim sem andvígir eru byggingunni. "Eldra fólk vill vera nálægt miðbænum og hafa félagsaðstöðu á sama svæði og því er umrædd staðsetning góð. Mér finnst að þeir sem eru á móti byggingunni verði að koma með betri rök en að það sé tilfinningamál fyrir þá að hafa svæðið lítt breytt," sagði Logi Már. Einn þeirra sem beittu sér fyrir söfnun undirskriftanna var Jón Hjaltason, sagnfræðingur á Akureyri. "Ein helsta ástæða þess að ég er á móti byggingu þessa húss er að ég er að hugsa um bæjarímyndina. Tólf hæða blokk á þessu svæði mun setja sterkan svip á bæinn og byggingin mun verða eitt af einkennismerkjum bæjarins, líkt og kirkjan. Ég vil halda þeirri bæjarímynd sem við höfum og byggir á lágreistum húsum og huggulegri byggð. Ég er viss um að eldra fólk vill búa þar sem stutt er í félagsaðstöðu en ég hef ekki heyrt að það vilji endilega búa nálægt miðbænum," sagði Jón Hjaltason. Umhverfisráð Akureyrarbæjar hefur samþykkt að auglýsa deiliskipulagstillögu vegna byggingarinnar en bæjarstjórn á enn eftir að samþykkja að deiliskipulagið verði auglýst.