Erlent

Verjendur Saddams gengu út

Verjendur Saddams Hússein gengu fyrir stundu út úr réttarsalnum í mótmælaskyni. Réttarhöldin voru rétt að hefjast þegar lögfræðingarnir gengu út.

Erlent

Hyggjast herða innflytjendalöggjöf í Danmörku enn frekar

Dönsk stjórnvöld hyggjast gera innflytjendalöggjöf sína enn strangari til þess að draga frekar úr straumi innflytjenda til landsins. Þetta hefur danska blaðið Politiken eftir atvinnumálaráðherra landsins sem hefur lagt til að innflytjendum frá löndum eins og Sómalíu, Írak og Palestínu verði fækkað þar sem þeim gengur illa að fá vinnu í Danmörku og verða því byrði á samfélaginu.

Erlent

Íranar aðeins örfáum mánuðum frá því að búa til kjarnavopn

Aðeins örfáir mánuðir eru í að Íranar komi sér upp kjarnavopnum. Þetta segir Mohammad ElBaradei, yfirmaður Alþjóðakjarnorkumálastofnunarinnar. Ef Íranar haldi áfram að auðga úran í nokkrum kjarnorkuverum taki það þá aðeins nokkra mánuði til viðbótar að koma sér upp kjarnavopnum.

Erlent

Komu í veg fyrir árás á dómhús Saddams

Minnstu munaði að írakskir uppreisnarmenn hefðu skotið úr sprengjuvörpum á dómhúsið þar sem réttað var yfir Saddam Hussein í síðustu viku. Írökskum öryggissveitum tókst að koma í veg fyrir árásina á síðustu stundu.

Erlent

Gerðu aðsúg að Allawi í mosku í gær

Iyad Allawi, fyrrverandi forsætisráðherra Íraks átti fótum sínum fjör að launa þegar um sextíu menn gerðu aðsúg að honum og fylgdarliði hans við Mosku í borginni Najaf í gær. Á myndum sem náðust af atburðunum sjást Allawi og fleiri hlaupa undan árásarmönnunum fyrir utan Imam Ali moskuna, þar sem þeir sóttu bænastund sjíta.

Erlent

Flugvélar CIA lentu 437 sinnum í Þýskalandi

Flugvélar á vegum bandarísku leyniþjónustunnar CIA lentu 437 sinnum á þýskum flugvöllum á árunum 2002 og 2003. Þetta kemur fram í tímaritinu Der Spiegel, sem hefur undir höndum gögn sem þýsk flugmálayfirvöld hafa afhent að beiðni vinstri flokksins á þýska þinginu.

Erlent

Hugðust sprengja réttarsalinn

Íröksk yfirvöld skýrðu frá því í gær að þau hefðu flett ofan af samsæri uppreisnarmanna um að skjóta eldflaugum að dómssalnum þar sem réttað verður yfir Saddam Hussein í dag.

Erlent

CIA notar breska og þýska flugvelli

Flugvélar á vegum CIA virðast margoft hafa farið um breska og þýska flugvelli á ferðum sínum með grunaða hermdarverkamenn. Málið verður eflaust ofarlega á baugi í Evrópuför utanríkisráðherra Bandaríkjanna sem hefst í dag.

Erlent

Götubörn fundu sprengju

Tvö heimilislaus börn í leit að mat fundu tifandi tímasprengju undir einni rútunni á umferðarmiðstöð í Dakka, höfuðborg Bangladess. Þau létu lögreglu vita sem lét aftengja sprengjuna.

Erlent

Nazarbayev gersigraði í forsetakosningunum

Útgönguspár benda til að Nursultan Nazarbayev hafi verið endurkjörinn með 75 prósent atkvæða í forsetakosningunum í Kasakstan sem fram fóru í gær. Þær virðast að mestu hafa farið fram á sanngjarnan og heiðarlegan hátt.

Erlent

Ágreiningur um lát Rabia

Stephen Hadley, þjóðaröryggisráðgjafi George W. Bush Bandaríkjaforseta, vildi ekki staðfesta að einn þeirra fimm manna sem féllu í árás pakistanskra hermanna á fimmtudaginn sé Hamza Rabia, yfirmaður al-Kaída í Pakistan.

Erlent

Bað eigimanni sínum griða

Pat Kember, eiginkona Normans Kember, 74 ára, sem haldið er í gíslingu í Írak ásamt þremur félögum sínum, biðlaði til mannræningjanna á arabísku sjónvarpsstöðinni al-Jazeera í gær. Hún sagði að maður sinn hefði einungis verið í Írak til að aðstoða bágstadda og því yrðu þeir að þyrma lífi hans.

Erlent

Omar Bongo endurkjörinn

Landskjörstjórn Gabon skýrði frá því í vikunni að Omar Bongo hefði enn einu sinni verið endurkjörinn forseti landsins en kosningar fóru þar fram á dögunum. Hann fékk 79 prósent atkvæða. Bongo hefur verið forseti Gabon síðan landið fékk sjálfstæði frá Frökkum árið 1967.

Erlent

Fiskveiðikvótar aldrei minni

Norðmenn hafa komist að samkomulagi við Evrópusambandið um fiskveiði í Norðursjó árið 2006. Veiðin verður sú minnsta nokkru sinni. Norska ríkisútvarpið segir að þorskkvótinn í Norðursjó minnki úr 27.300 tonnum í 23.205 tonn á næsta ári og það sé minnsti kvóti sem nokkru sinni hafi verið veiddur.

Erlent

Einkaleyfi selt fyrir einn dal

Sænskur prófessor seldi einkaleyfi á estrógenviðtaka til líftæknifyrirtækisins Karo Bio fyrir einn dollara. Prófessorinn er stofnandi, stjórnarmaður og hluthafi í fyrirtækinu. Vísindamaðurinn sem fann estrógenviðtakann í líkamanum hefur ekki fengið neitt fyrir sinn snúð.

Erlent

Hélt nákvæmar dagbækur

Hen, 43 ára, hefur verið dæmdur í ellefu ára fangelsi fyrir 160 kynferðisbrot gegn börnum. Þetta er þyngsti dómur sem kveðinn hefur verið upp í þessum málaflokki í Finnlandi.

Erlent

Skorað á yfirvöld að koma á fullu lýðræði

Fjölmenn mótmæli fóru fram í Hong Kong í gær þar sem knúið var á um lýðræðis-umbætur í héraðinu. Ólíklegt er talið að yfirvöld í Peking bregðist við óskum fjöldans. Skipuleggjendur göngunnar segja að 250.000 manns hafi tekið þátt í henni en búist hafði verið við mun minni fjölda.

Erlent

Skæri leyfð í flugvélum

Yfirvöld samgönguöryggismála í Bandaríkjunum hafa tilkynnt að frá og með 22. desember megi flugfarþegar hafa með sér um borð smáskæri og lítil málmáhöld. Þau hafa verið bönnuð í flugvélum síðan 11. september 2001, þegar hryðjuverkaárásin var gerð á Tvíburaturnana í New York.

Erlent

Fuglar komnir af risaeðlum

Nýfundinn steingervingur af elsta þekkta fuglinum, Archaeopteryx, þykir gefa áreiðanlegar vísbendingar um að fuglar séu komnir af risaeðlum. Þetta kemur fram á heimasíðu National Geographic.

Erlent

Fjarar undan bandalagi viljugra

Enda þótt enn sé ófriður í Írak eru flestar hinna staðföstu þjóða farnar að huga að brottflutningi herliðs síns frá Írak. Sú þróun veldur Bandaríkjamönnum áhyggjum þar sem hún tefur fyrir þeirra eigin möguleikum á að kalla hermenn sína heim.

Erlent

Frakki myrtur í Níger

Franskur ferðamaður var skotinn til bana í Afríkuríkinu Níger á föstudag. Frönsk yfirvöld staðfestu þetta á laugardag. Ekki er vitað hvort ræningjahópar sem sitja um ferðalanga til sveita víða í Níger beri ábyrgð á ódæðinu, og frönsk stjórnvöld gáfu engar frekari skýringar.

Erlent

Þróunin í heimsviðskiptum of frjálsleg

Leiðtogar Frakklands og 53 Afríkuríkja segja þróunina í heimsviðskiptum vera of frjálslega. Þetta sagði hann á fundi sem haldinn var um málið um helgina. Forseti Malí sagði að viðskiptatengsl sem byggðust á jöfnuði og réttlæti væru grundvallaratriði og að gífurlegir vaxtarmöguleikar væru í landbúnaði og á fjölgun starfa í allmörgum Afríkuríkjum. Hann sagði þó að Afríkuríki nytu lítils af hagnaðinum, vegna þess að heimsmarkaður fyrir landbúnaðarvörur væri skekktur með niðurgreiðslum.

Erlent

Forseta Kazakstans spáð sigri

Nursultan Nazarbaíjev, sem verið hefur forseti Kazakstans í sextán ár, mun að öllum líkindum ná endurkjöri til næstu sjö ára í kosningum sem fram fara í landinu í dag. Forsetinn nýtur mikils fylgis vegna vaxandi velmegunar í Kazakstan en erlend fyrirtæki hafa fjárfest í landinu fyrir hundruð milljarða króna, aðallega í olíulindum en sérfræðingar spá því að næsta áratug verði landið meðal tíu stærstu olíuframleiðsluríkja heims. Andstæðingar forsetans hafa sakað hann um svindl í kosningunum, spillingu og einræðistilburði.

Erlent

Óttast olíuleka

Óttast er að olía úr tönkum flutningaskips sem sökk úti fyrir norðvesturströnd Ítalíu í óveðri, leki í hafið en alls er um 14 þúsund lítra að ræða. Skipið lá við akkeri úti fyrir höfninni í La Spezia en mjög grunnt er þar sem skipið sökk. Skip með mengunarvarnabúnað eru komin á vettvang og haft er eftir umhverfisráðherra Ítalíu, Altero Matteoli, að ekki sé útlit fyrir að mengunarslys verði.

Erlent

Abbas býður páfa í heimsókn

Mahmud Abbas, forseti Palestínumanna, hefur boðið Benedikt páfa sextánda, að heimsækja landið helga. Abbas sagði í lok einkaáheyrnar páfa í Páfagarði að hann væri velkominn til Jerúsalem og annarra helgistaða. Ísraelsmenn hertóku arabíska hlutann í austur Jerúsalem árið 1967 og innlimuðu hann sem hluta af höfuðborg Ísraelsríkis. Í Austur Jerúsalem er grátmúrinn, einn mesti helgistaður Gyðinga, múslima og kristinna manna.

Erlent

Kveikt á trénu við Austurvöll

Ljósin á Óslóartrénu, sem stendur á Austurvelli í Reykjavík, verða kveikt klukkan fjögur í dag. Tréð er hefðbundin gjöf Norðmanna til Íslendinga, en rúm hálf öld er síðan Norðmenn færðu Íslendingum fyrst grenitré að gjöf til að skreyta Reykjavík. Tréð stóð við Sanderstua í Maridalen í Ósló og er rúmlega 12 metra hátt.

Erlent

Sex falla vegna jarðsprengju á Sri Lanka

Að minnsta kosti sex hermenn féllu og þrír særðust þegar dráttarvagni sem þeir voru á var ekið á öfluga jarðsprengju í norðurhluta Sri Lanka í dag að því er varnarmálaráðuneytið greindi frá. Þetta er mesta mannfall af völdum einnar jarðsprengju sem orðið hefur síðan stjórnvöld og uppreisnarmenn úr röðum tamílatígra skrifuðu undir vopnahlé í febrúar 2002.

Erlent

Fleiri tilfelli fuglaflensu í Rúmeníu

Ný tilfelli fuglaflensunnar hafa greinst í Rúmeníu. Fjórir kjúklingar í austurhluta landsins hafa greinst og er flensan af H5 stofni. Sýni úr fuglunum verða rannsökuð í Englandi til að kanna hvort um sé að ræða H5N1 afbrigði veirunnar, sem getur borist í menn. Þetta er í fjórða skiptið sem fuglaflensuveira greinist á þessu svæði frá því á fimmtudag.

Erlent

Ferðakostnaður forsætisráðuneytisins eykst

Ferðakostnaður forsætisráðuneytisins jókst um tæp fjörutíu prósent á síðasta ári. Risnukostnaður einn og sér jókst um rúm áttatíu prósent. Ferðakostnaður allra ráðuneytanna jókst að jafnaði um 29 milljónir króna á síðasta ári. Kostnaður lækkaði hins vegar mest hjá Iðnaðar- og viðskiptaráðuneyti. Þetta kemur fram í svari fjármálaráðherra við fyrirspurn Jóhönnu Sigurðardóttur alþingismanns. Jóhanna spurði fjármálaráðherra ennfremur að því hvort hann teldi ástæðu til að bregðast sérstaklega við með þvi að herða sparnaðarkröfuna á ráðuneytin. Ráðherra sagði að þótt útgjöld hefðu aukist í fyrra, hefði náðst fram þrjúhundruð og tuttugu milljóna sparnaður frá því árið 2002. Því þætti honum ekki ástæða til þess.

Erlent

Fjölmenn mótmæli í Hong Kong

Yfir eitt hundrað þúsund manns tóku þátt í fjöldagöngu í Hong Kong í dag og kröfðust fulls lýðræðis líkt og lofað hafi verið þegar Bretar fólu Kínverjum borgina í hendur fyrir átta árum. Mótmælendurnir eru ósáttir við tillögur yfirvalda um lýðræðisumbætur en samkvæmt þeim myndi nefndin sem kýs borgarstjóra, er nú er skipuð 800 mönnum sem hallir eru undir stjórnvöld í Peking, verða stækkuð um helming. Mótmælendur segja að verði þessar tillögur að veruleika þýði það í rauninni skref aftur á bak miðað við ákvæði stjórnarskrár Hong Kong, sem kveði á um fullt lýðræði.

Erlent

Mest lesið