Innlent

Þjóðvegirnir greiðfærir

Allir helstu þjóðvegir landsins eru nokkuð greiðfærir samkvæmt upplýsingum frá Vegagerðinni. Einhverjir hálkublettir eru þó á Norðaustur- og Austurlandi.

Skattur á þá efnaminni

Notendagjöld í heilbrigðiskerfinu eru aukaskattur á tekjulágt og fátækt fólk, segir Kristinn H. Gunnarsson, þingmaður Framsóknarflokksins. Hann segir að ávinningurinn af innheimtu notendagjalda sé lítill eða enginn og þau valdi því helst að efnaminna fólk hafi ekki efni á heilbrigðisþjónustu.

Fjöldi erlendra ríkisborgara á Íslandi hefur þrefaldast á áratug

Fjöldi erlendra ríkisborgara með lögheimili á Íslandi hefur þrefaldast undanfarinn áratug. Á Austurlandi eru tæplega átján prósent íbúa með erlent ríkisfang. Þetta kemur fram í nýjustu tölum frá Hagstofu Íslands og miðast við 31. desember síðastliðinn.

Heimaþjónusta ljósmæðra í uppnámi

Samningar um heimaþjónustu milli Ljósmæðrafélags Íslands og Tryggingastofnunar ríkisins rennur út á miðnætti. Ljósmæðrum voru kynnt drög að nýjum samningi í dag en skilaboð þeirra eru skýr, þær sætta sig ekki við samninga undir kostnaðargreiningu.

Haft samband við hæstbjóðendur

Framkvæmdarsvið Reykjavíkurborgar hefur haft samband við þá sem áttu hæsta tilboð í byggingarétt á lóðum í Úlfarsárdal. Þeir þurfa nú að ákveða við hvaða tilboð þeir hyggjast standa. Eins og fram hefur komið í fréttum átti einn maður hæsta tilboð í byggingarétt 39 einbýlishúsalóða af þeim fjörtíu sem í boði voru í útboði borgarinnar. Borgarráð Reykjavíkur samþykkti á fimmtudag tillögu borgarstjóra þess efnis að hver einstaklingur fengi aðeins að kaupa eina einbýlishúsa eða parhúsalóð.

Lækkun á nýjum útlánum Íbúðalánasjóðs um 12-20 milljarða

Íbúðalánasjóður gerir ráð fyrir lækkun á nýjum útlánum um tólf til tuttugu milljarða króna á þessu ári frá því sem áður var áætlað. Þetta kemur fram í tilkynningu um endurskoðaða áætlun sem sjóðurinn sendi Kauphöllinni í dag.

Viðbúnaðarstigi vegna fuglaflensunnar ekki breytt hér á landi

Viðbúnaðarstigi vegna fuglaflensunnar verður ekki breytt hér á landi í ljósi tíðindanna frá Svíþjóð, að sögn Jarle Reiersens, yfirdýralæknis alifuglasjúkdóma. Fyrr í dag var greint frá því að hættulegt afbrigði flensunnar hafi fundist í villtum andfuglum í suðurhluta Svíþjóðar.

Börn krefjast að múhameðsteiknarar verði hengdir

Fimmþúsund börn allt niður í átta ára gengu fylktu liði um götur stærstu borgar Pakistan í morgun og kröfðust þess að teiknarinn sem teiknaði skopmyndirnar af Múhammeð spámanni yrði hengdur. Hingað til hefur fullorðna fólkið að mestu séð um mótmælin vegna skopmyndanna í MiðAusturlöndum, en það breyttist heldur betur í dag.

Verðlaun í ljóðasamkeppni

Hátt í hundrað tonn af saltkjöti ofan í landann

Búast má við að landinn láti ofan í sig hátt í hundrað tonn af saltkjöti í dag þegar hann fagnar sprengideginum. Þá eru ótaldar bauninar sem fylgja þessum þjóðarrétti Íslendinga á þessum degi.

Verðbólgan áfram yfir þolmörkum

Verðbólgan mun áfram vera yfir efri þolmörkum og mælast 4,2 prósent ef verðbólguspá Íslandsbanka mun ganga eftir. Þetta verður þá 23 mánuðurinn í röð þar sem verðbólgan er umfram markmið Seðlabankans en verðbólgumarkmið hans er 2,5 prósent. Þá mun vísitala neysluverðs hækka um 0,9 prósent ef spáin gengur eftir.

SPES byggir í Tógó

Þróunarsamvinnustofnun Íslands og SPES-barnahjálp hafa gert með sér samkomulag um að ÞSSÍ styrki byggingu nýs húsnæðis í barnaþorpi samtakanna í Lomé í Tógó. Að því er fram kemur í fréttatilkynningu frá ÞSSÍ hljóðar kostnaðaráætlun við bygginguna upp á 65.000 evrur eða rúmar fimm milljónir íslenskra króna og nemur styrkur ÞSSÍ til byggingarinnar um 40 prósent af upphæðinni eða um 2 milljónir króna.

Atkvæðagreiðsla vegna verkfalls slökkviliðsmanna hafin

Slökkviliðs- og sjúkraflutningamenn hófu á hádegi að greiða um það atkvæði hvort boða eigi til verkfalls sem hefjast á um miðjan marsmánuð. Um 280 atvinnuslökkviliðsmenn eru á kjörskrá og er kosið í deildum þeirra víða um land.

Gufumökkur yfir stóru svæði á Reykjanesbraut

Mikið umferðaröngþveiti varð á Reykjanesbraut til móts við Sprengisand og í Ártúnsbrekku á áttunda tímanum í morgun eftir að önnur aðal heitavatnsæð Orkuveitunnar frá Reykjum til borgarinnar sprakk og gufumökk lagði yfir stórt svæði.

Ísland í 13. sæti yfir hlutfall kvenna á þjóðþingum

Íslendingar eru nokkrir eftirbátar hinna norrænu ríkjanna þegar kemur að hlutfalli kvenna á þjóðþingum. Þetta kemur fram í nýjum tölum frá Alþjóðaþingmannasambandinu sem birtar voru í gær. Ísland er í þrettánda sæti á listanum af 187 löndum en hér á landi eru konur akkúrat þriðjungur þingmanna.

Ólína ósátt við Menntamálaráðuneytið

Ólína Þorvarðardóttir, skólameistari Menntaskólans á Ísafirði, segir að menntamálaráðuneytið hafi ekki stutt nægilega það sáttaferli sem ráðuneytið kom af stað í haust. Ólína var gestur fréttavaktarinna fyrir hádegi en mikill styrr hefur staðið um starf hennar sem skólameistari undanferin misseri.

Fjórðungur karlmanna á Austurlandi útlendingar

Fjórðungur karlmanna á Austurlandi er með erlent ríkisfang samkvæmt nýjum tölum frá Hagstofu Íslands. Hlutfall erlendra ríkisborgara er hæst í þeim landshluta, eða 17,6 prósent, sem má væntanlega rekja til stóriðjuframkvæmdanna fyrir austan.

Umferð komin í samt lag aftur

Umferð um Reykjanesbraut og Ártúnsbrekku er komin í samt lag eftir mikið öngþveiti, sem skapaðist þegar önnur aðal æð hitaveitunnar frá Reykjum í Mosfellsbæ til borgarinnar, sprakk í stokk undir Reykjanesbrautinni á móts við Sprengisand á áttunda tímanum í morgun. Við það flæddi heitt vatnið upp á vestari vegahelminginn og beljaði niður í niðurföll, en samtímis steig upp gufustrókur sem birgði ökumönnum sýn.

Viljla álver við Eyjafjörð

L-listi, listi fólksins á Akureyri skorar á Alcoa að reisa álver á Dysnesi við Eyjafjörð. Á almennum fundi flokksins í gærkvöldi var samþykkt að senda frá sér ályktun þar sem fram kemur að flokkurinn telji Eyjafjörð besta kostinn fyrir álver Alcoa og er fyrirtækið boðið velkomið til Eyjafjarðar.

Maður og geit í það heilaga

Maður í Súdan neyðist til að kvænast geit að því er fram kemur á bt.dk í dag. Málsatvik eru þau að maðurinn var í ástaratlotum við geitina þegar eigandi hennar kom að honum. Eigandi krafðist þess að maðurinn gengi að eiga geitina og að hann borgaði fyrir hana brúðargjald. Öldungaráð ráð bæjarins fundaði um málið og komst að þeirri niðurstöðu að maðurinn og geitin skyldu heitbindast

Umferðartafir vegna brostinnar hitaveituæðar

Önnur aðalæð hitaveitunnar frá Reykjum í Mosfellsbæ til borgarinnar brast fyrir stundu rétt við Reykjanesbrautina þar sem æðin kemur yfir Elliðaárnar og hefur heitt vatn skapað mikla gufustróka, sem truflað hafa umferðina, sem meira og minna er í hnút í Ártúnsbrekku og á Reykjanesbrautinni í átt að Breiðholti.