Fréttir

Tólf skotnir í Nígeríu fyrir að reyna að stela olíu

Öryggissveitir í Nígeríu skutu 12 manns til bana í gær eftir að mennirnir reyndu að stela olíu úr leiðslum í suðurhluta landsins. Að sögn fjölmiðla þar í landi hófst skotbardagi milli öryggissveitanna og mannanna eftir að eftirlitsmenn fundu þá við boranir.

Erlent 3.1.2006 07:05

Fundu eitt kíló af hassi

Rúmlega kíló af hassi fannst við húsleit í Vestmannaeyjum í gærkvöldi. Hassið tilheyrir karlmanni sem var handtekinn á Gamlársdag og úrskurðaður í gæsluvarðhald en síðan þá hefur verið gerð leit í fjölda húsa í Vestmannaeyjum.

Innlent 3.1.2006 09:03

Þrír létust í flugskeytaárás Ísraela

Að minnsta kosti þrír Palestínumenn féllu í flugskeytaárás Ísraela á bifreið í Jabalya flóttamannabúðunum á Gaza í gærkvöld. Ísraelar segja að í bílnum hafi verið liðsmenn palestínsku samtakanna Heilagt stríð.

Erlent 3.1.2006 07:03

Slapp ómeiddur þegar eldur gaus upp í jeppa

Ökumaður, sem var einn á ferð í jeppa sínum, slapp ómeiddur, þegar eldur gaus upp í bílnum í Eyjafirði í gærkvöldi. Þegar eldurinn kom upp missti ökumaður stjórn á bílnum, sem hafnaði utan vegar, en þar komst maðurinn út.

Innlent 3.1.2006 07:01

Kríum fjölgar um nær helming

Kríum hefur fjölgað mjög á Seltjarnarnesi hin síðari ár samkvæmt könnun Jóhanns Óla Hilmarssonar fuglafræðings. Rúmlega 4.500 kríupör eru á Seltjarnarnesi og hefur þeim fjölgað um 43 prósent frá árinu 2003.

Innlent 3.1.2006 06:25

Lægra verð en áður hefur þekkst

Íslensk ferðaskrifstofa býður nú ferðir til Kanaríeyja í tvær vikur á tæpar tuttugu og sex þúsund krónur á manninn. Framkvæmdastjóri ferðaskrifstofunnar segir þetta mögulegt vegna samstarfs við erlenda ferðaskrifstofu. Hann segir fólk ekki þurfa að óttast óvenju mikið samneyti við skordýr eða skemmtanaglaða sígauna, þrátt fyrir hið lága verð.

Innlent 3.1.2006 01:13

Jeppi og fólksbíll skullu saman á Kjalarnesi

Fólksbíll og jeppi skullu saman á Kjalarnesi um fimmleytið í gær með þeim afleiðingum að jeppinn valt. Kona var flutt á slysadeild en ekki er talið að um alvarleg meiðsl á fólki hafi verið að ræða. Það tók um hálftíma að klippa bílstjóra jeppabifreiðarinnar úr flakinu.

Innlent 3.1.2006 06:59

Ættu að reka stjórnarformanninn

Hluthafar í FL Group ættu að reka stjórnarformann fyrirtækisins fyrir að gera nærri 300 milljóna króna starfslokasamninga við tvo fyrrum forstjóra fyrirtækisins, þau Ragnhildi Geirsdóttur og Sigurð Helgason, segir Jóhanna Sigurðardóttir, þingmaður Samfylkingarinnar.

Innlent 3.1.2006 06:41

Svifryksmengun langt yfir heilsuverndarmörk á nýársnótt

Svifryksmengun fór langt yfir heilsuverndarmörk í Reykjavík á nýársnótt, samkvæmt mælingum Umhverfissviðs borgarinnar. Yfirleitt er mengunin mest fyrst upp úr miðnætti, en nú var hún yfir hættumörkum alveg til morguns. Þetta er mun meiri mengun er mældist á sama tíma fyrir ári og árið þar áður.

Innlent 3.1.2006 06:57

Víðast hvar hálka og hálkublettir

Hálka og hálkublettir eru á vegum víðast hvar um land samkvæmt upplýsingum frá Vegagerðinni. Hrafnseyrar- og Dynjandisheiðar ófærar

Innlent 3.1.2006 07:38

Eldur í bílskúr í Grafarvogi

Eldur kviknaði í bílskúr við parhús í Grafarvogi um fjögurleytið í nótt og var slökkviliðið kvatt á vettvang. Þegar það kom logaði í skúrnum en eldurinn var slökktur á nokkrum mínútum. Skemmdir urðu á ýmsum munum, sem þar eru geymdir, og húsið fylltist af reyk, sem þurfti að ræsta út. Engum varð þó meint af og eru eldsupptök ókunn.

Innlent 3.1.2006 06:55

Snjókoma hamlar neyðaraðstoð í Pakistan

Mikil snjókoma hefur hamlað aðstoð við eftirlifendur jarðskjálftanna í Kasmír en talið er að yfir þrjár milljónir manna séu nú heimilislausar. Vegir eru lokaðir og þyrlur í flugbanni sökum óveðursins. Flætt hefur inn í tjöld fólksins sem hírist nú í kulda á svæðinu en neyðarbirgðir hafa ekki borist fólkinu í þrjá daga.

Erlent 3.1.2006 06:52

Ellefu látnir eftir að þak skautahallar hrundi

Tala látinna eftir að þak skautahallar í bænum Bad Reichenhall í Þýskalandi hrundi, er komin í ellefu. Þá eru yfir þrjátíu slasaðir. Slökkviliðsmenn notuðu krana til að færa til þakbrotin svo hægt væri að komast að skautasvellinu en um 300 björgunarmenn komu að björgunaraðgerðum sem gekk brösulega vegna mikillar snjókomu.

Erlent 3.1.2006 06:47

Óvenjuleg nýársgjöf

Nýársgjöf Tonys Blairs, forsætisráðherra Bretlands, til bresku þjóðarinnar var heldur óvenjuleg þetta árið. Blair og ráðgjafar hans hafa útbúið myndband sem kallast "dagur í lífi forsætisráðherra" og afhent það öllum fjölmiðlum landsins.

Erlent 2.1.2006 20:22

Sveitarstjórnarmenn skilja loks alvarleika málsins

Formaður Félags leikskólakennara leggur traust sitt á vinnuhóp um bætt kjör leikskólakennara og telur að vinna hans leiði til launahækkana og að leikskólakennarar hætti við að segja upp störfum. Vinnuhópurinn verður boðaður til fundar síðar í vikunni.

Innlent 2.1.2006 20:13

Gleymdist að loka bensínloki

Sjúkraflug á Vestfirði dróst úr hömlu á nýársnótt, meðal annars vegna þess að það gleymdist að loka bensínloki á sjúkraflugvélinni.

Innlent 2.1.2006 19:07

Tómas í fríi frá störfum sínum á Landspítalanum

Tómas Zoega geðlæknir, sem vann mál í Héraðsdómi fyrir helgi sem hann höfðaði gegn Landspítalanum fyrir að færa hann úr starfi yfirlæknis í starf sérfræðilæknis, er kominn í frí. Þegar fréttastofan spurði eftir Tómasi á Landspítalanum nú síðdegis fengust þau svör að hann yrði í fríi næstu þrjár vikurnar.

Innlent 2.1.2006 17:14

Fjöldi banaslysa talsvert undir meðaltali

Nítján létust í sextán banaslysum hér á landi á síðasta ári, þrettán karlar og sex konur. Það er talsvert færra en þeir sem látist hafa að meðaltali á síðastliðnum fimm árum.

Innlent 2.1.2006 15:19

Vestfirðingar telja Sturlu Böðvarsson hafa staðið sig best

Vefritið Skessuhorn framkvæmdi könnun á vef sínum um miðjan desember. Spurt var að því hvaða þingmaður NV kjördæmis hefði staðið sig best á árinu. Niðurstaðan varð sú að flestir völdu Sturlu Böðvarsson, eða 29,7%. Í öðru sæti varð Kristinn H Gunnarsson með 22,9%, þá Einar K Guðfinnsson með 9,7% og Sigurjón Þórðarson með 8,6%. Í réttri röð þar á eftir komu Jón Bjarnason, Guðjón A Kristinsson, Jóhann Ársælsson, Magnús Stefánsson, Einar Oddur Kristjánsson og Anna Kristín Gunnarsdóttir.

Innlent 2.1.2006 14:02

Saka Úkraínumenn um stórfelldan gasstuld

Stjórnendur rússneska gasfyrirtækisins Gazprom segja að úkraínsk stjórnvöld hafi stolið gasi að jafnvirði tæplega sextánhundruð milljónir króna. Þeir segja að Úkraínumenn hafi hirt gas sem hafi átt að fara um gasleiðslur til Vestur-Evrópu.

Erlent 2.1.2006 14:07

Hlaut varanlegan augnskaða af völdum flugelds

Pilturinn sem fékk flugeld í andlitið á Tálknafirði á gamlárskvöld liggur enn á augndeild Landspítalans og mun vera þar næstu daga að sögn vakthafandi læknis. Pilturinn er með töluverða áverka á hægra auga og ljóst er að hann mun ekki fá fulla sjón á því auga aftur.

Innlent 2.1.2006 13:43

Saga Boutique Icelandair gerir samning við Flugstöðina

Saga Boutique Icelandair og Flugstöð Leifs Eiríkssonar hf. hafa gert með sér samning um rekstur verslunar með dömu- og herrafatnað, skó og fylgihluti. Lögð verður áhersla á þekkt vörumerki s.s. Boss, Burberry, Sand, Wolford og Lacoste auk þess sem fatnaður eftir íslenska hönnuði mun standa til boða í versluninni.

Innlent 2.1.2006 13:39

Draga uppsagnir líklega til baka

Þeir tólf leikskólakennarar sem sögðu upp störfum á leikskólanum Sólbrekku á Seltjarnarnesi á fimmtudaginn síðasta munu að öllum líkindum draga uppsagnir sínar til baka, að sögn Ásdísar Þorsteinsdóttur aðstoðarleikskólastjóra.

Innlent 2.1.2006 13:35

Nokkur erill hjá lögreglu í Árnessýslu um áramótin

Nokkur erill var hjá lögreglu í Árnessýslu þessi áramót, en frá hádegi á gamlársdags að miðnætti nýársdags voru skráð 27 verkefni hjá lögreglunni eftir því sem fram kemur í dagbók hennar. Stærsta verkefnið var stórbruninn í húsi Hjálparsveitar skáta í Hveragerði upp úr hádegi á gamlársdag.

Innlent 2.1.2006 12:29

Zapatistar hefja friðsamlega herferð

Forystumenn Zapatista, vinstrisinnaðra skæruliða í Mexíkó, lögðu í gær af stað í hálfs árs ferðalag um Mexíkó og er það í fyrsta sinn í fjögur ár sem þeir yfirgefa sterkustu vígi sín í frumskógum Mexíkó.

Erlent 2.1.2006 11:45

Segir vakt hafa verið í Reykjavík til miðnættis

Rúnar Árnason, framkvæmdastjóri Landsflugs, vill taka fram að þótt sjúkravél félagsins hafi verið flogið frá Ísafirði á hádegi á gamlársdag, hafi verið vakt í Reykjavík til að sinna sjúkaraflugi vestur, alveg til miðnættis, en útkallið kom rétt eftir miðnætti. Þá átti Mýflug að hafa tekið við.

Innlent 2.1.2006 13:06

Flughált frá Súðavík í Ögur og um Eyrarfjall

Flughált er á Vestfjörðum frá Súðavík í Ögur og um Eyrarfjall samkvæmt upplýsingum Vegagerðarinnar. Hálka er á Steingrímsfjarðarheiði, hálkublettir eru á Ströndum og á sunnanverðum Vestfjörðum er hálka og hálkublettir.

Innlent 2.1.2006 12:18

Séreignasparnaður skerðir lífeyrisgreiðslur

Séreignarsparnaður er dreginn frá lífeyrisgreiðslum og skerðir tekjutryggingaraukann. Lagabreytingu þarf til að koma í veg fyrir skerðinguna, segir Kristinn H. Gunnarsson, formaður stjórnar Tryggingastofnunar.

Innlent 2.1.2006 11:45

Lést ekki af völdum fuglaflensu

Fjórtán ára tyrkneskur piltur var talinn hafa látist úr fuglaflensu, en sá grunur reyndist ekki á rökum reistur. Drengurinn og systkini hans voru lögð inn á sjúkrahús á laugardag með mikinn hita og innvortis blæðingar. Heilbrigðisstarfsfólk óttaðist að þau hefðu sýkst af fuglaflensu, en rannsóknir sýndu að svo var ekki heldur lést pilturinn af völdum lungnabólgu.

Erlent 2.1.2006 12:14

Á fjórða tug látinn í flóðum í Indónesíu

Í það minnsta þrjátíu og fjórir hafa farist í flóðum og aurskriðum sem féllu á heimili og skóla á Indónesíu í morgun. Mikil rigning hratt aurskriðunum af stað og ár flæddu yfir bakka sína þegar aurskriðurnar féllu í þær. Hundruð manna leituðu skjóls í moskum og skólum en nú er talið að það versta sé yfirstaðið.

Erlent 2.1.2006 12:11