Engar nýjar spólur leigðar út

Glöggir gestir myndbandaleiga landsins hafa líklega tekið eftir því að nýjustu myndirnar á leigunum eru ekki gefnar út á gömlu VHS-myndbandsspólunum lengur eins og verið hefur, heldur eingöngu á DVD-mynddiskum. Ennþá verður hægt að fá gömlu myndirnar á spólum, þó að maður þurfi DVD-spilara til að horfa á þær nýju.

Fjölda kvenna í stjórn fagnað

Framkvæmdastjórn Landssambands framsóknarkvenna fagnar því að þrjár konur skuli gegna ráðherraembættum fyrir flokkinn, jafn margar og karlar. Í ályktun stjórnarinnar segir að þessi skipan mála sé í samræmi við lög, reglur og stefnu flokksins.

Aðeins Engeyin var úti

Langflest skip voru stödd í höfn á sjómannadaginn eins og lög gera ráð fyrir. Alls voru 44 skip skráð á sjó um miðjan dag í gær en aðeins eitt þeirra var fiskiskip af stærri gerðinni, Engey RE í eigu HB Granda.

Búið að ræða við menn vegna mótmælaspjalds

Lögregla hefur þegar rætt við mennina sem báru mótmælaspjald í göngu Íslandsvina í lok maímánaðar með áletruninni "Drekkjum Valgerði en ekki Íslandi".

Sjálfstæðismenn eru fullir tilhlökkunar yfir tilvonandi meirihlutasamstarfi

Sjálfstæðismenn eru fullir tilhlökkunar yfir meirihlutassamstarfi sínu við Framsóknarmenn í borginni. Gísli Marteinn Baldurson borgarfulltrúi segir að þekking og reynsla tilvonandi embættismanna muni skila sér til borgarbúa þar sem málefni og árángur muni skipta máli.

Borgarbúar munu sjá breytingar á næstu dögum og vikum

Málefni fjölskyldunnar og eldri borgara verða í forgrunni hjá Framsóknarmönnum í Reykjavík í meirihlutasamstarfi þeirra með Sjálfstæðisflokki. Framsóknarmenn í Reykjavík eru ánægðir með komandi meirihlutasamstarf í borginni.

Tafir á umferð vegna tónleika Waters

Allnokkrar tafir urðu á umferð á Vesturlandsvegi á áttunda tímanum í kvöld vegna tónleika Rogers Waters, forsprakka hljómsveitarinnar Pink Floyd, sem nú standa yfir í Egilshöll.

Aðstoðuðu menn vegna hrakninga við Seley

Björgunarsveitarmenn frá Neskaupstað komu tveimur mönnum til aðstoðar í kvöld sem farið höfðu út í Seley úti fyrir mynni Reyðarfjarðar en lent í hrakningum vegna veðurs. Beiðni um aðstoð barst á sjötta tímanum frá öðrum mannanna sem var litlum Zodiac-gúmmíbát og hraktist frá eynni vegna slæms veðurs.

Slökkvilið að störfum djúpt inni í fjalli

Eldur kom upp í 420 metra háum fallgöngum Kárahnjúkavirkjunar nú síðdegis og er slökkvilið þar að störfum djúpt inni í fjalli. Menn eru ekki taldir í hættu.

Ákærður fyrir kynferðislega áreitni í Bretlandi

Íslenskur karlmaður á þrítugsaldri hefur verið ákærður fyrir kynferðislega áreitni gegn unglingsstúlku í Bretlandi. Hann á yfir höfði sér allt að tíu ára fangelsi.

Nýr meirihluti í Dalabyggð

H-listi og N-listi í Dalabyggð hafa náð samkomulagi um myndun meirihluta í sveitarstjórn sameinaðs sveitarfélags Dalabyggðar og Saurbæjarhrepps. Þetta kemur fram á fréttavef Skessuhorns. Samkvæmt heimildum miðilsins verður skrifað undir málefnasamning á morgun.

Birkir Jón líklega formaður fjárlaganefndar

Framsóknarþingmaðurinn, Birkir Jón Jónsson, tekur að öllum líkindum við formennsku í fjárlaganefnd Alþingis í haust. Jón Sigurðsson, verðandi ráðherra, fer í launalaust leyfi frá Seðlabankanum en á meðan gefst ráðamönnum svigrúm til að finna nýjan seðlabankastjóra.

Hafnar ásökunum um afskipti dómsmálaráðherra

Þorsteinn Pálsson, ritstjóri Fréttablaðsins, segir ekkert hæft í því að Björn Bjarnason, dóms- og kirkjumálaráðherra, hafi með beinum eða óbeinum hætti áhrif á innri málefni ritstjórnar Fréttablaðsins. Í yfirlýsingu sem Þorsteinn sendi frá sér í dag rekur hann ástæður þess að Jóhanni Haukssyni hafi verið vikið úr stjórnmálafréttaskrifum á Fréttablaðinu.

Eldur í fallgöngum 2 í Fljótsdal

Slökkvilið frá Egilsstöðum var sent inn í Fljótsdal nú síðla dags vegna elds sem kom upp inni í fallgöngum tvö á Kárahnjúkum. Enginn maður mun vera í hættu en lögregla er þegar komin á vettvang og er búist við að slökkvilið fari inn í gegnum stöðvarhúsið í Fljótsdal. Ekki liggur fyrir hversu mikill eldurinn er eða hver upptök hans eru.

Heildarafli hefur dregist saman um 460 þúsund tonn

Heildarafli þar sem af er þessu fiskveiðiári hefur dregist saman um 460 þúsund tonn miðað við sama tíma á síðasta fiskveiðiári. Nýjar mælingar á ástandi sjávar við Ísland sýna hins vegar að uppvaxtarskilyrði fyrir sunnan, vestan og norðan land eru með betra móti.

Málefnasamningur meirihluta í borginni kynntur á morgun

Málefnasamningur meirihluta Sjálfstæðisflokksins og Framsóknarflokksins í borgarstjórn Reykjavíkur verður kynntur á morgun að loknum aukafundi í borgarstjórn.

Stúlkan útskrifuð af gjörgæsludeild

Fjórtán ára stúlka, sem slasaðist í alvarlegu umferðarslysi í Ártúnsbrekku í fyrrinótt, hefur verið útskrifuð af gjörgæsludeild. Stúlkunni var haldið sofandi í öndunarvél fyrst eftir slysið en samkvæmt vakthafandi lækni voru áverkarnir á höfði en ekki heila og því minni en talið var í fyrstu.

Framsóknarkonur fagna ráðherraskipan

Framkvæmdastjórn Landssambands Framsóknarkvenna fagnar því að jafn margar konur og karlar skipa ráðherraembætti á vegum flokksins. Í ályktun sem framkvæmdastjórnin sendi frá sér í dag segir að þetta sé í samræmi við lög, reglur og stefnu flokksins.

37 þúsund tonna aukning fiskaflans

Heildarafli íslenskra fiskiskipa í maí var tæplega 179 þúsund tonn samkvæmt bráðabirgðatölum Fiskistofu. Það er þrjátíu og sjö þúsund tonna aukning miðað við sama tíma í fyrra.

Alþjóðlegt þing um loftslagsbreytingar á Nordica

Ísland er fyrirmyndarland í orkumálum, sagði Ólafur Ragnar Grímsson, forseti Íslands, í opnunarræðu sinni á þingi um loftslagsbreytingar sem nú stendur yfir á Hótel Nordica. Ólafur Ragnar fjallaði um mikilvægi umræðu um loftslagsbreytingar. Hann sagði Íslendinga sanna það að hægt væri að breyta hratt venjum hvað varðar orkuneyslu. Íslendingar hefðu kynt hús sín með kolum fyrir rúmlega hálfri öld en nú væri Ísland orðið fyrirmyndarland í orkumálum.

Kröfu verjenda hafnað

Kröfu verjenda tveggja sakborninga í Baugsmálinu um að settur saksóknari í málinu, Sigurður Tómas Magnússon, og Helgi I. Jónsson, dómstjóri Héraðsdóms Reykjavíkur, beri vitni í málinu, var hafnað í Héraðsdómi í dag.

Ölvunarakstur og hraðakstur helsta orsök banaslysa

Rannsóknarnefnd umferðarslysa birti í dag skýrslu sína um umferðarslys árið 2005. 19 manns létust í umferðarslysum í fyrra. Algengustu orsakir slysa voru ölvunarakstur og hraðakstur. Rannsóknarnefnd umferðarslysa birti í dag skýrslu sína um umferðarslys árið 2005.

Rannsókn á meintu landhelgisbroti færeysks togara

Ríkissaksóknari hefur nú til athugunar rökstuðning Landhelgisgæslunnar fyrir því að halda áfram rannsókn á meintu landhelgisbroti færeysks togara á Íslandsmiðum fyrr á árinu, en togarinn slapp í land í Færeyjum.

Skilorðsbundið fangelsi fyrir vörslu barnakláms

Karlmaður var dæmdur í 30 daga skilorðsbundið fangelsi í Héraðsdómi Reykjaness í morgun fyrir vörslu á barnaklámi. Maðurinn var sakfelldur fyrir að hafa tæplega 400 myndir, bæði ljósmyndir og myndir á tölvutæku formi, sem sýna börn á kynferðislegan eða klámfenginn hátt.

Vísitala neysluverðs æðir upp

Vísitala neysluverðs æðir upp á við og jafngildir hækkun hennar þrjá síðustu mánuði rúmlega sextán prósenta verðbólgu. Verðbólgan á einu ári nemur átta prósentum.

Ekki færður til vegna umkvartana dómsmálaráðherra

Jóhann Hauksson, blaðamaður Fréttablaðsins, hefur sagt upp starfi sínu eftir að hafa verið færður úr skrifum um stjórnmál. Ritstjóri Fréttablaðsins segir ekkert hæft í þeirri fullyrðingu Jóhanns að hann hafi verið færður til í starfi vegna umkvartana dómsmálaráðherra um skrif hans.

Hafði uppi ósæmilega tilburði fyrir framan 7 ára stúlkur

Lögreglan í Reykjavík leitar enn að ungum manni sem er talinn hafa haft uppi ósæmilega tilburði fyrir framan tvær sjö ára stúlkur um kvöldmatarleytið í gærkvöldi.

1800 fleiri fluttu til landsins en frá því

Rúmlega átján hundruð fleiri fluttu til landsins fyrstu þrjá mánuði ársins en frá því, samkvæmt tölum Hagstofunnar. Þar af settist rösklega helmingur að á höfuðborgarsvæðinu.

Þrjú grjóthrun á Óshlíðarveg

Grjót hefur þrisvar sinnum hrunið á Óshlíðarveg á rúmum sólarhring en í öllum tilvikum var enginn vegfarandi á ferð þegar skriðurnar hrundu.

Kemur í ljós hvort saksóknari þurfi að bera vitni

Það kemur í ljós klukkan eitt í dag hvort settur saksóknari í Baugsmálinu, Sigurður Tómas Magnússon, og Helgi I. Jónsson, dómstjóri Héraðsdóms Reykjavíkur, þurfi að bera vitni í málinu.

Íbúðalán bankanna hrapa um rúma 11 milljarða

Íbúðalán bankanna hafa hrapað úr rúmum nítján milljörðum króna í maí í fyrra niður í sjö og hálfan milljarð í maí í ár, samkvæmt tölum Seðlabankans. Upphæðin í nýliðnum maímánuði er jafnframt sú lægsta síðan bankarnir komu inn á íbúðalánamarkaðinn í ágúst árið 2004.

Ölvun, slagsmál og fingurbit á Bolungarvík

Helgin var fjörug hjá lögreglunni í Bolungarvík. Ball var haldið aðfaranótt laugardags í félagsheimilinu Víkurbæ og var talsverður erill í kringum það. Á laugardagsmorguninn hafði lögregla stöðvað tvo unga menn með stóran poka fullan af áfengi sem þeir höfðu stolið úr Víkurbæ. Mennirnir gistu fangageymslur en var sleppt seinna um daginn eftir að þeir viðurkenndu verknaðinn.

Guðni Ágústsson vill opinbert álverð

Guðni Ágústsson landbúnaðarráðherra og varaformaður Framsóknarflokksins tók undir það sjónarmið Einars Odds Kristjánssonar, varaformanns fjárlaganefndar, í þættinum Pressunni á NFS í gær, að Landsvirkjun eigi að opinbera orkusölusamning fyrirtækisins við Alcoa.

Sænska ríkið greiði skaðabætur vegna njósna

Mannréttindadómstóll Evrópu hefur dæmt sænska ríkið til að greiða fimm Svíum á fimmtu milljón íslenskra króna í skaðabætur fyrir mannréttindabrot þegar öryggislögreglan njósnaði um þá og geymdi upplýsingar. Nýlega var upplýst að símar fjölda íslenskra þingmanna voru hleraðir á tímum kalda stríðsins.

Ráðherraskipti einstök vegna fjölda

Ráðherraskipti ríkisstjórnarinnar á þessu kjörtímabili eru einstök vegna fjölda stólaskipta og þeirra sem draga sig út úr stjórnmálum. Þá þykir einstakt að formaður flokks skuli axla ábyrgð, eins og Halldór Ásgrímsson gerir, á slöku gengi í kosningum þar sem hann var þó ekki sjálfur í framboði.

Íslendingar lögðu Svía í fyrri leik þjóðanna fyrir HM

Íslenska landsliðið í handknattleik vann fjögurra marka sigur á Svíum, 32:28, í fyrri leik þjóðanna í undankeppni HM í dag. Leikið var í Globen í Stokkhólmi. Þetta er fyrsti sigur Íslands á Svíum í handbolta í 48 ár.

Seinkun á öllum vélum Iceland Express

Seinkun hefur orðið á öllum vélum Iceland Express til í dag. Vélin sem átti að fara til Gautaborgar í morgun bilaði. Farþegum var útvegað far með öðrum vélum og fara síðustu farþegarnir utan seinnipartinn. Þetta varð til þess að seinkun varð á Kaupmannahafnar- og Lundúnarflugi þar sem vélunum var millilent í Gautaborg. Þá varð seinkun á brottför vélar Iceland Express til Alicante sem fara átti nú klukkan fjögur. Brottför þeirrar vélar er nú áætluð snemma í kvöld.

Færa þarf tímabundnar fórnir

Færa þarf tímabundnar fórnir til að hægt verði að byggja upp þorskstofninn að mati sjávarútvegsráðherra. Ekki er hægt að búa við það að ekkert miði í uppbyggingu stofnsins. Þetta sagði Einar K. Guðfinnsson, sjávarútvegsráðherra, í sjómannadagsávarpi sínu.

Orkuverð til ALCOA birt

Guðni Ágússtsson, landbúnaðarráðherra og varaformaður Framsóknarflokksins tekur undir það sjónarmið að Landsvirkjun eigi að opinbera orkusölusamning fyrirtækisins við Alcoa. þetta kom fram í þættinum Pressan á NFS í dag.

Umferðarslys í Ártúnsbrekkunni

Einn liggur alvarlega slasaður á gjörgæsludeild Landspítalans eftir umferðarslys sem var í Ártúnsbrekkunni um klukkan tvö í nótt nótt.

Mikið um hátíðarhöld vegna Sjómannadagsins

Sjómannadagurinn er haldinn hátíðlegur víða um land í dag. Dagskráin hefst á mörgum stöðum með guðþjónstu en nú klukkan tíu hófst minningarathöfn Sjómannadagsins í Fossvogskapellu í Fossvogskirkjugarði. Í Reykjavík verður í dag haldin Hátíð hafsins og er dagskráin fjölbreytt. Sjávarútvegsráðherra heldur sitt ávarp klukkan tvö en þetta er í fyrsta sinn sem Einar K. Guðfinnsson, sjávarútvegsráðherra, heldur slíkt ávarp.

Vandasöm verkefni bíða nýrra ráðherra

Vandasöm verkefni bíða nýrra ráðherra í ríkisstjórn Geirs H. Haarde sem tekur við á fimmtudaginn. Maður utan þings tekur sæti í ríkisstjórninni og kona verður í fyrsta sinn utanríkisráðherra.

Guðni sáttur

Guðni Ágústsson, varaformaður Framsóknarflokksins, segist ekki hafa sóst eftir öðru ráðuneyti en Landbúnaðarráðuneytinu. Hann lítur ekki svo á að verið sé að stilla Valgerði Sverrisdóttur upp sem formannsefni á móti sér.

Varnarmálin brýnust hjá Valgerði

Valgerður Sverrisdóttir, verðandi utanríkisráðherra, segir að varnarmálin verði brýnasta verkefnið til að takast á við í utanríkismálum. Jón Sigurðsson, verðandi viðskipta- og iðnaðarráðherra segist hafa orðið að svara kalli skyldunnar og hverfa úr Seðlabankanum. Jónína Bjartmarz telur að sátt á milli framkvæmda og umhverfisverndarsinna verði hennar brýnasta verkefni í Umhverfisráðuneytinu.

Þrír nýjir framsóknarráðherrar

Þrír nýir framsóknarráðherrar verða í ríkisstjórn Geirs Haarde sem tekur við forsætisráðherrastólnum af Halldóri Ásgrímssyni næsta fimmtudag. Valgerður Sverrisdóttir flytur sig úr iðnaðar- og viðskiptaráðuneytinu í utanríkisráðuneytið en Jón Sigurðsson seðlabankastjóri tekur við stóli Valgerðar. Magnús Stefánsson tekur við af Jóni Kristjánssyni í Félagsmálaráðuneytinu en Jón lætur af ráðherradómi. Jónína Bjartmarz verður umhverfisráðherra en þaðan hverfur Sigríður Anna Þórðardóttir.