Tveir Danir og Svíi höfðu heppnina með sér í kvöld.

Þrír norðurlandabúar urðu milljónamæringar í kvöld eftir að þeir fengu alla rétta í Víkingalottói. Vinningurinn var alls fjórir milljarðar. Vinningshafarnir þrír skipta hinsvegar með sér tæplega þrjúhundruð milljónum hver. Tveir Danir og Svíi höfðu heppnina með sér í kvöld.

Fólk lagt inn á spitala vegna tannsýkinga

Þeim fjölgar sem leggja þarf inn á spítala vegna tannsýkinga. Ein af ástæðum sýkinganna er léleg tannheilsa en dæmi eru um að fólk hafi ekki farið til tannlæknis í áratug.

Varað við versnandi veðri á vestanverðu landinu

Vaxandi suðaustanátt um landið vestanvert í dag, með snjókomu og skafrenningi samkvæmt upplýsingum frá vegagerðinni.

Hringbraut verður öll í 101

Hringbraut mun hér eftir eingöngu tilheyra póstnúmeri 101 þannig að þau hús sem hingað til hafa talist til póstnúmers 107, teljast frá og með 1. desember 2011 tilheyra póstnúmeri 101. Íbúum Hringbrautar innan póstnúmers 107 hafa verið tilkynntar þessar breytingar.

Áttræður api er allur

Cheetah, simpansinn sem lék í frægum Tarsan kvikmyndum á fjórða áratug síðustu aldar, er dauður. Hann var áttatíu ára gamall. Hann var staðsettur á dýragarði í Palm Harbour þegar að hann drapst. Þar hafði hann dvalið frá fyrri hluta sjöunda áratugarins. Breska blaðið Telegraph segir frá því að simpansar í dýragörðum verði alla jafna ekki meira en 45 ára gamlir en Cheetah hafi komist í Heimsmetabók Guinnes, því enginn api hafi náð hærri aldri en hann. Cheetah varð eldri en bæði Wessmuller sem lék Tarsan og samnefndum myndum og Maureen O'Sullivan, sem lék Jane.

Eitt umferðarslys á dag

Samkvæmt bráðabirgðatölum lögreglunnar á höfuðborgarsvæðinu um umferðarslys varð um það bil eitt slys hvern dag ársins þar til í gær og eru slysin orðin 358. Tölur um fjölda slasaðra eða alvarleika liggur ekki fyrir en slasaðir eru nokkuð fleiri en fjöldi slysa segir til um. Í öllum tilvikum er um atvik að ræða þar sem vegfarendur þurfa læknisaðstoðar við í kjölfar umferðaróhapps. Meiðsli þeirra eru meðal annars tognanir, beinbrot, innvortis meiðsl, mænuskaðar og höfuðáverkar.

Segja hlutfall foreldra lækka

Yfirvöld í Kópavogi segja að hlutur foreldra vegna kostnaðar við leikskóla lækka um áramótin. Rekstrargjöld leikskóla Kópavogs hafi hækkað umtalsvert að undanförnu vegna verðlagshækkana og launahækkana og hefði þeim öllum verið beint til foreldra hefði leikskólagjaldið hækkað um 13 til 14%. Þess í stað hækki átta tíma vistun með fullu fæði um 6,9% um áramótin sem þýði í reynd að greiðsluhlutfall foreldra í kostnaði lækki samkvæmt fjárhagsáætlun milli áranna 2011 og 2012 úr 19% í 15%.

Hundruð milljónir í markaðsátak þrátt fyrir gallaðar grunnstoðir

Þetta er óþolandi ástand að við skulum verað að eyða hundruð milljónum í markaðsstarf og svo er grunnþjónustan ekki til staðar, það er að segja samgöngur,“ segir Agnar Daníelsson, framkvæmdastjóri Kynnisferða, um stöðuna á vegum á Suðurlandi. Eins og fram hefur komið á Vísi í morgun eru Gjábakkavegur og vegurinn í Mosfellsheiði ekki mokaðir tvo daga vikunnar. Þar með getur Gullni hringurinn, eitt mesta aðdráttarafl ferðamanna, orðið ófær.

Segir farsælast að hafa opinn leigupott við hlið nýtingarsamninga

Farsælast er að hverfa með öllu frá hugmyndum um byggða- og ívilnunarpotta við úthlutun byggðakvóta í nýju fiskveiðistjórnunarfrumvarpi. Þá er rétt að lögskylda útgerðir til að bjóða allan óunninn fisk á innlendan markað. Þetta segir Ólína Þorvarðardóttir, þingmaður, en nýtt frumvarp verður lagt fram á vorþingi.

Margar götur illfærar

Íbúagötur eru margar illfærar í Reykjavík eftir óvenju harða tíð undanfarið. Nítján snjómoksturstæki hafa verið að störfum í dag en allt upp í hundrað og þrjátíu tonn af salti hefur farið á göturnar á einum degi sem er fjórfalt meira en venja er.

Cameron vill lög um lágmarksverð á áfengi

David Cameron, forsætisráðherra Breta, ætlar að leggja fram frumvarp sem felur í sér að sett verði lágmarksverð á áfengi. Með þessu vill Cameron stuðla að takmarkaðra aðgengi að áfengi og bættri heilsu. Nákvæm útfærsla á þessum aðgerðum Camerons liggur ekki fyrir en líklegt er að ódýrasta vínið verði skattlagt þannig að verðið hækki. Þessar aðgerðir Camerons eru hluti af stærra aðgerðaráætlun gegn áfengisböli. Upphaflega stóð til að kynna aðgerðaráætlunina í næsta mánuði en því hefur verið frestað fram í febrúar.

Krókódíll réðst á garðsláttuvél

Krókódíll í Ástralska skriðdýragarðinum olli miklum usla á dögunum þegar að hann réðst á slátturvél sem starfsmaður garðsins var með og sökkti henni í gryfjunni hjá sér. Krókódíllinn sem er fimm metra langur heitir Elvis, eftir söngvaranum sáluga. Hann dró slátturvélina ofan í vatn í gryfju sinni og vaktaði hana í meira en klukkustund.

Gullni hringurinn illfær tvo daga vikunnar

Tvo daga vikunnar, á þriðjudögum og laugardögum, er Mosfellsheiðin og Gjábakkavegur ekkert mokuð. Þetta hefur valdið því að bílar sem hyggjast aka Gullna hringinn, leiðina á milli Þingvalla, Geysis í Haukadal og Gullfoss, komast ekki leiðar sinnar. Hjá Vegagerðinni fengust þær upplýsingar að þungfært hafi verið á þessum leiðum í gær. Það fékkst jafnframt staðfest að Vegamálastjóra bærust reglulega athugasemdir frá aðilum í ferðaþjónustu vegna þessa, en fólk hefði þó skilning á að fjárframlög til stofnunarinnar hefðu verið skorin niður að undanförnu.

Nær að hreyfa fætur og fingur

Vandasöm aðgerð sem Fanney Þorbjörg Guðmundsdóttir, landsliðskona á skíðum, þurfti á að halda í gærmorgun á Ullevål-sjúkrahúsinu í Ósló í Noregi þótti heppnast vel. Fanney, sem er 19 ára gömul, slasaðist alvarlega á aðfangadag þegar hún var við æfingar í Geilo í Noregi.

Víða hægt að skíða

Gert er ráð fyrir að skíðasvæðið í Bláfjöllum opni klukkan tíu og verði opið allt þangað til klukkan níu í kvöld. Þó gæti svæðinu verið lokað fyrr ef veður verður mjög vont, en gert er ráð fyrir töluverðum vindi síðdegis. Gríðarleg aðsókn var að skíðasvæðinu í gær og þurfti fólk að bíða í löngum röðum til að kaupa aðgang að lyftunum. Þá verður skíðasvæðið í Hlíðarfjalli við Akureyri opið frá klukkan tíu til sjö í dag. Þar mun vera logn og mjög gott skíðafæri. Skíðasvæðið í Tindastóll verður opið frá klukkan tólf til fjögur í dag. Það er mikill og góður snjór í Tindastól og engin fyrirstaða að koma til fjalla. Það er hægviðri, tæplega 10 gráðu frost og stjörnubjartur himinn. Jafnframt er opið í Böggvisstaðarfjalli á Dalvík frá klukkan tólf til fjögur. Þar mun vera fínt veður og færi.

Kim Jong-Il borinn til grafar

Tveggja daga útför norður-kóreska einræðisherrans Kim Jong-Il er hafinn. Viðbúnaður vegna hennar er gríðarlegur í höfuðborginni Pyongyang. Myndir þaðan sýna að þúsundir hermanna hafa safnast saman og lutu þeir höfði þegar stór mynd af leiðtoganum fallna var borin um götur borgarinnar. Myndirnar, sem birtar voru á ríkissjónvarpsstöð í landinu, sýndu jafnframt að arftaki hans og þriðji sonurinn, Kim Jong-un, gekk með fylkingu hermannanna. Fjölmiðlar í Norður-Kóreu segja að Kim Jong-il hafi látist úr hjartaáfalli þann 17. desember síðastliðinn.

Danir hallir undir konungsfjölskylduna

Engin evrópsk konungsþjóð styður konungsfjölskylduna sína meira en Danir. Þetta sýnir ný skoðanakönnun sem Megafon gerði fyrir danska blaðið Politiken. Niðurstöður könnunarinnar sýnir að um 77% Dana telja að Danmörk eigi áfram að vera konungsveldi en um 16% vilja breyta í lýðveldi. Fyrir rösku ári síðan lét Politiken gera samskonar skoðanakönnun sem sýndi að 25% Dana vildu lýðveldi. Lars Hovbakke Sørensen, prófessor í sagnfræði við Kaupmannahafnarháskóla, segir að samkvæmt þessum niðurstöðum sé stuðningur Dana við konungsveldið töluvert meiri en víða annarsstaðar í Evrópu. Stuðningur í sumum ríkjum við konungsveldið geti farið allt niður í 58%.

Athugasemdir gerðar fyrir meira en áratug

Meira en áratugur er síðan að gerðar voru athugasemdir við starfsemi franska fyrirtækisins PIP sem talið er hafa framleitt gallaða silikonpúða í brjóst. Fréttir af göllunum hafa valdið skelfingu á meðal kvenna um allan heim að undanförnu.

Langflest afbrot hér á landi tengd áfengi og fíkniefnum

Fjórðungur allra fanga á landinu situr inni vegna fíkniefnabrota. Árið 1990 var hlutfallið sjö prósent.

Forseti Argentínu með krabbamein

Cristina Fernandels de Kirchner, forseti Argentínu, greindist nýlega með krabbamein og mun þess vegna gangast undir aðgerð þann 4. janúar næstkomandi, eftir því sem ríkisstjórn hennar hefur greint frá. Meinið er í skjaldkirtlinum en það mun ekki hafa breiðst út í önnur líffæri. Fernandex hóf nýlega annað kjörtímabil sitt eftir að hafa unnið mikinn kosningasigur á landsvísu. Eiginmaður hennar, Nestor Kirchner, fyrrverandi forseti, lést á síðasta ári eftir að hann fékk hjartaáfall.

Landsvirkjun endurnýjar veltulán

Landsvirkjun hefur skrifað undir samning um nýtt sambankalán á alþjóðlegum bankamarkaði, hið fyrsta sem opinbert íslenskt fyrirtæki gerir frá bankahruni.

Hækka um tugi þúsunda á ári

Leikskólagjöld hjá öllum stærstu sveitarfélögum landsins hækka um tvö til þrjú þúsund krónur á mánuði um áramótin. Hækkunin nemur tugum þúsunda hjá foreldrum á ársgrundvelli.

Gaskútar geta valdið slysahættu í frosti

"Ég skrúfa frá gasinu og þá skyndilega leggur eldsúlu upp úr gashellunni sem læsist í gluggatjöldin fyrir ofan. Ég heyri konuna mína strax æpa og skrúfa þá fyrir þar sem ég átta mig á því sem er að gerast. Þetta slapp því í rauninni mjög vel en ég rétt ímynda mér hvað hefði gerst ef ég hefði verið einn þarna og ekki áttað mig. Þá hefði þessi timburbústaður bara fuðrað upp,“ segir Hrafnkell Á.

Ekki þörf á byssum fyrir löggur

LöggæslaÖgmundur Jónasson innanríkisráðherra segist ekki telja þörf á því að lögreglumenn hafi almennari aðgang að skotvopnum en nú er.

Byggja félagsmiðstöð í Spönginni

Verja á 650 milljónum króna í byggingu nýrrar félagsmiðstöðvar í Spönginni í Grafarvogi. Þar munu þjóðkirkjan og hjúkrunarheimilið Eir meðal annarra hafa aðstöðu.

Óásættanlegt að leyfi hafi verið veitt

Hópur fólks og félaga sem eru andvíg því að erfðabreytt bygg verði ræktað í gróðurhúsi Landbúnaðarháskóla Íslands að Reykjum í Ölfusi skorar á sveitarstjórnir á svæðinu að beita sér fyrir því að leyfi til ræktunarinnar verði afturkallað.

Stjórnarherinn farinn frá Homs

Sýrlandsstjórn kallaði herlið sitt frá borginni Homs í gær þegar fyrstu eftirlitssveitirnar frá Arababandalaginu voru komnar til landsins.

Opið öllum en nýtist hernum

Kínversk stjórnvöld hafa gangsett staðsetningarnet sem gegna mun sama hlutverki og GPS-staðsetningarkerfið. Kerfið verður opið almenningi eins og GPS-kerfið en mun gera kínverska herinn óháðan bandarískum gervitunglum sem hægt er að loka fyrir.

Siku slær í gegn á netinu

Rúmlega mánaðargamall grænlenskur ísbjarnarhúnn hefur náð að bræða hjörtu þúsunda netverja með augnaráðinu einu.

Handrukkunum fjölgað - dæmi um afklippta fingur og skotárás

Málum þar sem handrukkun er beitt hefur fjölgað síðustu misseri að mati lögreglu og meiri hörku er beitt en áður. Dæmi um það eru afklipptir fingur og skotárás.

Stríðsfréttaritari Íslands: Ótrúlegt ár Jóns Björgvinssonar

Það er líklega óhætt að segja að Jón Björgvinsson sé eini stríðsfréttaritari Íslands. Á þessu ári hefur hann verið mitt í miðjum átökunum í Mið-Austurlöndum, eða arabíska vorinu eins og það hefur oft verið kallað.

Landsbjörg býst við góðri flugeldasölu í ár

Flugeldasala fer í fullan gang á morgun og býst Landsbjörg við góðri sölu þetta árið. Ný skotgleraugu eru komin á markaðinn til að mæta kröfuhörðum tískuunnendum.

Hringja grátandi til fjölskylduhjálparinnar

Vegna fjölda beiðna um um mataraðstoð verður Fjölskylduhjálpin með úthlutanir í Eskihlíðinni í Reykjavík á morgun frá klukkan tvö til fimm. Búið var að ákveða að hafa lokað á milli jóla og nýárs, en Ásgerður Jóna Flosadóttir, framkvæmdastjóri Fjölskylduhjálparinnar, segir að neyðin sé mjög mikil, og fólk hringi grátandi til Fjölskylduhjálparinnar og biðji um mataraðstoð.

Örþreyttir björgunarsveitamenn á aðfangadag

Þeir voru margir þreyttir björgunarsveitarmennirnir á aðfangadag eftir að hafa unnið þrekvirki við að aðstoða fólk sem var í hremmingum vegna óveðursins sem geysaði á aðfangadag á stórum hluta landsins.

Sjö ára í heljarstökki

Benedikt Friðbjörnsson, sjö ára gamall drengur á Akureyri, hefur náð alveg hreint ótrúlegri færni á snjóbretti þau tvö ár sem hann hefur æft. Á meðfylgjandi myndskeiði sést hann fara í afturábak heljarstökk og gerir það leikandi létt.

Bandaríkjamaður sakaður um njósnir

Réttað var yfir bandarískum ríkisborgara í Íran í dag en maðurinn var handtekinn á dögunum grunaður um að vera njósnari á vegum bandarísku leyniþjónustunnar CIA. Hinn 28 ára gamli Amir Hekmati var fæddur í Arizona en á rætur að rekja til Írans. Faðir hans segir af og frá að sonur sinn sé njósnari. Hann hafi verið að heimsækja ömmur sínar í Íran þegar hann var handtekinn. Íranir segja hinsvegar að Hekmati sé þrautþjálfaður sérsveitarmaður sem hafi verið staðsettur í Írak og Afganistan áður en hann hafi farið til njósnastarfa í Íran.

Breskur túristi myrtur á jóladag á Sri Lanka

Breskur ríkisborgari var myrtur á jóladag á ferðamannastað á Sri Lanka. Lögregluyfirvöld í bænum Tangalle segja að ráðist hafi verið á manninn og rússneska konu sem var með honum í för, eftir að honum hafði sinnast við annan gest á hótelinu sem þau voru á. Fjórir hafa verið handteknir vergna málsins og á meðal þeirra er formaður bæjarstjórnarinnar í Tangalle. Konan sem var með fórnarlambinu berst nú fyrir lífi sínu á gjörgæslu.

Pútín vill ekki rannsaka kosningarnar

Vladímír Pútín, forsætisráðherra Rússlands, hefur vísað á bug áskorunum þess efnis að kosningarnar í landinu á dögunum verði rannsakaðar. Í til stuðningsmanna sinna sagði hann að þá sem kvartað hafi yfir úrslitum kosninganna skorti skýr markmið og óljóst sé hverju sé verið að mótmæla. Í kjölfar úrslitanna, þar sem flokkur Pútíns fór með sigur af hólmi þrátt fyrir fylgistap, hafa brotist út mestu mótmæli Rússlands í áratugi.

Þúsundir mótmæla í Homs

Þúsundir mótmælenda hafa í dag komið saman í sýrlensku borginni Homs en í dag komu til landsins eftirlitsmenn frá Arababandalaginu til þess að fylgjast með framferði stjórnvalda gegn aðgerðarsinnum. Bandalagið hefur ályktað um að ofbeldinu í landinu verði að linna og segja talsmenn mótmælenda að skriðdrekar stjórnarhersins hafi hörfað frá borginni nokkrum klukkutímum áður en eftirlitsmennirnir mættu á svæðið.

Níu brennur á höfuðborgarsvæðinu

Byrjað verður að taka á móti efni í áramótabrennurnar í fyrramálið en þær verða á sömu stöðum og í fyrra. Vel er fylgst með því hvað fer á brennurnar og eru um það skýrar reglur hvað má fara í bálkestina. "Best er að fá hreint timbur á brennurnar", segir Þorgrímur Hallgrímsson brennukóngur og rekstrarstjóri á hverfastöð Framkvæmda- og eignasviðs. "Plast, gúmmí og unnið timbur á ekki erindi á köstinn.“ Starfsmenn hverfastöðvanna verða á vettvangi og leiðbeina þeim sem koma með efni. Hætt verður að taka á móti efni þegar brennurnar eru orðnar hæfilega stórar eða í síðasta lagi klukkan 12 á gamlársdag.

Hitler hélt jólin

Myndir af Adolf Hitler og öðrum leiðtogum Nasistaflokksins við jólatré um jólin 1941 voru nýlega birtar opinberlega. Á meðal þeirra sem eru á myndunum með Hitler er Heinrich Himmler. Það var Hugo Jaeger, einn af persónulegum ljósmyndurum Hitlers, sem tók myndirnar. Hann gróf þær í glerkrukku þegar stríðinu lauk. Þar voru þær í tíu ár, eða allt þar til þær voru fluttar í bankahólf.

Margar konur nefndar til sögunnar sem næsti biskup

Síðan Karl Sigurbjörnsson biskup Íslands tilkynnti við upphaf síðasta kirkjuþings að hann hygðist láta af embætti á næsta ári hefur legið fyrir að biskupskjör fer fram á næsta ári.

Hvítabjarnarhúnninn Siku bræðir hjörtu Netverja

Nýjasta stjarna Netheima er hvítabjarnarhúnninn Siku. Hann er mánaðargamall og á heima í dýragarði í Kolind Í Danmörku. Hann fæddist 22. nóvember og umferð á vefsíðu garðsins hefur vaxið gríðarlega frá því sá stutti kom í heiminn. Þúsundir hafa fylgst með Siku og beðið í ofvæni eftir að hann opnaði augun, sem hann gerði víst í gær.

Litadýrð í loftinu

Þessi fallegu glitský sáust á suðausturhimni á Akureyri í morgun um klukkan 10:25. Glitský hafa sést nokkrum sinnum í vetur en um er að ræða ákaflega fögur marglit ský sem myndast í heiðhvolfinu, oft í um 15 - 30 kílómetra hæð, eftir því sem fram kemur í svari Halldórs Björnssonar veðurfræðings á Vísindavefnum. Glitský sjást helst um miðjan vetur, um sólarlag eða við sólaruppkomu. Litadýrð þeirra er mjög greinileg því þau eru böðuð sólskini, þótt rökkvað sé eða jafnvel aldimmt við jörð.

Ekkert vitað hver braust inn í Fjölskylduhjálp

Enn er ekkert vitað um það hver braust inn í aðsetur Fjölskylduhjálpar Íslands á Suðurnesjum um jólin og stal þaðan gjöfum og tölvu með viðkvæmum persónuupplýsingum. Lögreglan á Suðurnesjum rannsakar málið. Meðal þess sem þjófarnir tóku, auk fyrrnefndar tölvu, voru 66° Norður gallar.