Flugvélin loks fundin

Hernaðaryfirvöld í Indónesíu hafa skýrt frá því að flak flugvélar sem fórst í Indónesíu í síðustu viku sé loks fundið. Svo virðist sem hluti af flakinu liggi á hafsbotni nærri Sulawesi, en vélin var á leið þangað. Lengi hefur verið leitað að vélinni og mikil reiði varð þegar herinn tilkynnti að vélin hefði fundist í fjallendi og tólf komist af en það reyndist síðan rangt.

Bandaríkjamenn neita loftárásum

Bandaríkin hafa neitað því að hafa ráðist á skotmörk í Sómalíu í dag og segjast aðeins hafa gert árásir á mánudaginn síðastliðinn. Loftárásir voru þó gerðar og segja bandarísk yfirvöld að þar hafi verið að verki eþíópíski herinn.

Chavez hyggur á frekari þjóðvæðingu

Hugo Chavez var í dag settur í embætti forseta Venesúela til næstu sex ára. Hann vann stórsigur í kosningum í fyrra og hefur á þeim grundvelli ákveðið að ýta úr vör umfangsmiklum þjóðvæðingarverkefnum. Chavez hafði þegar sagt að hann ætlaði sér að þjóðvæða fjögur olíuverkefni sem og fjarskiptafyrirtæki en bætti svo við í ræðu eftir athöfnina í dag að hann hygðist þjóðvæða jarðgasverkefni líka.

Bush fjölgar hermönnum um 21.500

Samkvæmt nýjustu fregnum mun George W. Bush, forseti Bandaríkjanna, fjölga hermönnum í Írak um 21.500 manns. Áður var talið að það myndu verða 20.000. Einnig hefur verið skýrt frá því að Bush ætli sér að biðjast afsökunar á því að hafa ekki haft nógu marga hermenn í Írak eftir innrásina.

Hvalur biðst afsökunar á árekstri

Eigandi báts sem hvalir höfðu synt á og gert gat á sagði að hvalurinn sem gerði gatið hefði reynt að segja „Fyrirgefðu“ við sig þar sem hann fann svo góða tilfinningu streyma frá hvalnum. Maðurinn, sem heitir Lindsay Wright, var á siglingu 80 sjómílur vestur af Nýja-Sjálandi þegar þegar áreksturinn átti sér stað.

Rússar skora á USA að samþykkja Kyoto samninginn

Rússneska þingið samþykkti ályktun í dag þar sem skorað er á Bandaríkin að samþykkja Kyoto samninginn og um leið að fella úr gildi verslunarhömlur sem hafa verið í gildi í fleiri áratugi. Ályktunin var samþykkt af öllum meðlimum Dúmunnar nema einum, sem sat hjá.

IAEA aðstoðar ríki Afríku

Afrískar þjóðir sögðu í dag að þau hefðu ákveðið að herða öryggisgæslu við kjarnorkuver sem og kjarnaofna sem notaðir eru til rannsókna. Oft hefur verið sagt að öryggi í kringum þær sé ábótavant og alþjóðasamfélagið er farið að óttast að erlend öfl reyni að verða sér úti um úraníum í löndum í Afríku.

Leitað að málverki eftir Da Vinci

Ein af helstu ráðgátum listaheimsins gæti ráðist á næstu dögum. Miklar getgátur hafa verið um hvort að enn sé eitt mesta meistaraverk Leonardo da Vincis ófundið en listfræðingar segja að hugsanlegt sé að 500 ára gamalt verk meistarans sé falið bak við vegg í ráðhúsinu í Flórens.

11 látnir og 14 slasaðir í árás í Kerbala

Vígamenn í borginni Kerbala skutu í dag á tvær rútur fullar af shía múslimum sem voru að koma úr árlegri pílagrímsferð til Mekka með þeim afleiðingum að 11 létust og 14 særðust. Ríkisstjóri Kerbala sagði árásina sennilega vera hefndaraðgerð þar sem fregnir bárust af því í gær að rútu af súnní múslimum hefði verið rænt í nágrenni Anbar héraðsins en þær fréttir reyndust síðar rangar.

100 tonn af hvalkjöti óseld

Enn er um 100 tonn af hvalkjöti óseld og bíða nú í frystum útgerðarmanna en þetta staðfesti íslenskur hvalveiðimaður í viðtali við Reuters í dag. Kristján Loftsson, forstjóri Hvals, sagði að tafirnar væru vegna þess enn væri verið að athuga hvort að kjötið stæðist manneldiskröfur sem gerðar eru til hvalkjöts.

Styrktarreikningur stofnaður fyrir Örnu Sigríði

Vinir Örnu Sigríðar Albertsdóttur hafa stofnað styrktarreikning fyrir hana og fjölskyldu hennar. Arna Sigríður slasaðist illa á skíðaæfingu í Noregi í lok síðasta árs og hlaut hryggáverka og innvortis blæðingar.

Páfi stappar stálinu í Pólverja

Benedikt páfi skoraði á pólska kaþólikka til þess að herða sig í ljósi áfalla sem pólska kirkjan hefur orðið fyrir undanfarið. Einn biskup og annar prestur hafa sagt af sér á stuttum tíma í Póllandi vegna þess að upp komst að þeir hefðu verið njósnarar fyrir kommúnistaflokk landsins á tímum Kalda stríðsins.

Japanir vara við vopnasölu til Kína

Japanir róa þess nú öllum árum að Evrópusambandið haldi í vopnasölubannið til Kínverja. Forsætisráðherra Japans, Shinzo Abe, er á ferðalagi um Evrópu og Bandaríkin um þessar mundir til þess að afla framboði Japans til varanlegrar setu í öryggisráði Sameinuðu þjóðanna fylgis.

Líf færist í olíuæðar Hvít-Rússa

Olía Rússa gæti flætt um leiðslur Hvít-Rússa eins og hún gerði áður fyrr, eftir aðeins nokkrar klukkustundir, eða um leið og Hvít-Rússar skila olíunni sem þeir stálu. Sendiherra Rússa hjá Evrópusambandinu sagði frá þessu eftir fundi með orkumálaráðherra Evrópusambandsins.

ASÍ segir úrsögn ólöglega

Á fundi miðstjórnar ASÍ í dag kom úrsögn Sjómannafélags Íslands úr Sjómannasambandi Íslands til umræðu. Þar kom fram að ef marka megi umfjöllun og viðtöl við forsvarsmenn félagsins í fjölmiðlum sé ætlan þeirra að segja félagið úr ASÍ án þess að fram fari sérstök atkvæðagreiðsla þar um.

Léku eftir aftöku Saddams

Litlu munaði að börn í bænum Gausdal í Noregi hengdu vin sinn á dögunum. Vinahópurinn hafði ákveðið að leika eftir aftöku Saddams Hússein, Íraksforseta, og fékk einn úr hópnum hlutverk einræðisherrans.

Helmingur kvótans fluttur

Helmingurinn af öllum kvóta Akureyringa flyst til Reykjavíkur þegar Akureyrartogarar Brims verða skráðir í höfuðborginni. Reykjavík verður þá mesti útgerðarbær landsins, miðað við kvóta. Forstjóri Brims segist flýja andúð forystumanna sjómanna í Eyjafirði en þeir segja hann í leit að blóraböggli.

Spila fjárhættuspil í grunnskólum

Dæmi eru um að allt niður í fjórtán ára drengir spili fjárhættuspil innan veggja grunnskólanna. Ráðgjafi í spilafíkn kallar á að forvarnir verði teknar inn í skólana eins og gert er með áfengi og tóbak

Boða iðnbyltingu

Evrópusambandið boðar iðnbyltingu í nýrri áætlun um aðgerðir gegn loftslagsbreytingum. Framkvæmdastjórn sambandsins vill að aðildarríkin minnki útblástur gróðurhúsalofttegunda um tuttugu prósent fyrir 2020. Evrópa verði að taka forystuna í að þróa efnahag sem byggi síður á kolefnum.

Ásókn í byggingarland bitnar á græna treflinum

Skógræktarmenn hafa áhyggjur af ásókn Reykjavíkurborgar og nágrannasveitarfélaga í að taka skógræktarlönd höfuðborgarsvæðisins undir byggingarland. Þeir óttast að græni trefilinn svokallaði verði götóttur og hafa tekið upp viðræður við sveitarfélögin um að hann njóti friðhelgi.

Störf á vegum Þýðingarmiðstöðvar flutt norður

Tilkynnt verður á morgun um að 4-6 störf innan utanríkisþjónustunnar verði flutt til Akureyrar. Þetta eru störf á vegum Þýðingarmiðstöðvar og sem hefur þann starfa að þýða ýmis opinber skjöl.

Peningamálastefnan bítur áfram, segir Seðlabankinn

Gengi krónunnar féll um tæp tvö prósent í dag vegna sterks orðróms um að Kaupþing hyggist færa uppgjör sitt yfir í evru. Kaupþingsmenn neita að tjá sig. Ingimundur Friðriksson seðlabankastjóri segir að peningamálastefnan muni hafa bit áfram, jafnvel þótt einhverjir viðskiptabankanna kjósi að gera reikninga sína upp í erlendum gjaldmiðlum.

Fjórtán þúsund metnir með örorku

Draga má þá ályktun að fleiri í hópi öryrkja hafi tiltölulega vægari heilsufarsvandamál en áður, segir fyrrverandi tryggingayfirlæknir, enda ekkert sem bendir til þess að heilsufari þjóðarinnar hafi farið hrakandi þótt enn fjölgi öryrkjum.

Vopnhlé komið á í Súdan

Ríkisstjórn Súdans og uppreisnarmenn í Darfur héraði landsins hafa samþykkt 60 daga vopnahlé og fundi til þess að ræða hugsanlegt friðarsamkomulag. Á bak við þetta standa Afríkusambandið og Sameinuðu þjóðirnar.

Indverjar vilja halda kjarnorkutilraunum áfram

Indverjar gætu dregið sig úr kjarnorkusamstarfi við Bandaríkin ef þeir fá ekki að framkvæma kjarnorkutilraunir og auðga úraníumúrgang þeirra kjarnorkuvera sem Bandaríkjamenn ætla að selja þeim.

Bush þarf 497 milljarða í viðbót

George W. Bush, forseti Bandaríkjanna, þarf 6,8 milljarða dollara, eða um 497 milljarða íslenskra króna í aukafjárveitingu til þess að geta sent 20 þúsund viðbótarhermenn til Íraks. Inni í þessari upphæð er einnig kostnaður við uppbygginu og störf sem af henni hljótast en háttsettir embættismenn innan ríkisstjórnar Bush sögðu frá þessu í dag.

Íbúðalánasjóður lánaði nærri 50 milljarða í fyrra

Heildarútlán Íbúðalánasjóðs í fyrra námu alls 49,5 milljörðum króna sem samkvæmt mánaðarskýrslu sjóðsins fyrir desember var rétt yfir efri mörkum útlánaáætlunar fyrir 2006. Þá nam útgáfa íbúðabréfa 39 milljörðum króna að nafnverði sem er nálægt efri mörkum útgáfuáætlunar ársins 2006.

Krefjast lokunar fangabúða í Guantánamo

Íslandsdeild Amnesty International stendur á morgun fyrir útifundi á Lækjartorgi klukkan 17 þar sem þess verður krafist að að fangabúðum Bandaríkjamanna við Guantánamo-flóa verði lokað.

Vildi ekki hulið höfuð

Egypskur ráðherra rak aðstoðarkonu sína út af fundi, þegar hún neitaði að fjarlægja höfuðbúnað sinn, sem huldi allt nema augu hennar. Það var trúarmálaráðherra Egyptalands sem þetta gerði.

Ingibjörg Steinunn Sverrisdóttir nýr landsbókavörður

Menntamálaráðherra hefur skipað Ingibjörgu Steinunni Sverrisdóttur í embætti landsbókavarðar til fimm ára frá 1. apríl 2007 næstkomandi. Fram kemur í tilkynningu frá ráðuneytinu að Ingibjörg sé bæði með meistaragráðu í opinberri stjórnsýslu og bókasafns- og upplýsingafræði og hafi að undanförnu starfað sem sviðsstjóri á varðveislusviði Landsbókasafnsins.

Hafnar kröfu ríkisins um útburð af lóð á Akureyrarflugvelli

Hæstiréttur hafnaði í dag kröfu íslenska ríkisins um að maður yrði borinn út af lóð á Akureyrarflugvelli með beinni aðfargerð en á lóðinni stendur flugskýli sem hann á. Þar með staðfesti dómurinn úrskurð Héraðsdóms.

Hagnaður Alcoa um 160 milljarðar á síðasta ári

Hagnaður Alcoa, eins stærsta álframleiðanda heims, nam um 160 milljörðum króna í fyrra eftir því sem segir í Vegvísi Landsbankans og er það methagnaður í 118 ára sögu fyrirtækisins. Framleiðsla Alcoa í fyrra var rúmlega 15 milljón tonn og jókst um rúm 3,6 prósent á milli ára.

Dani og Svíi dæmdir fyrir skipulagningu hryðjuverka

Svíi og Dani fengu í dag þunga fangelsisdóma í Bosníu fyrir að leggja á ráðin um hryðjuverk. Svínn fékk fimmtán ára og fjögurra mánaða dóm en Daninn 13 ár og fjóra mánuði. Þá voru tveir Bosníumenn einnig dæmdir í fangelsi fyrir aðild að málinu.

Framsóknarmenn velja frambjóðendur í NA-kjördæmi

Framsóknarmenn velja sér fulltrúa á framboðslista sinn til þings í Norðausturkjördæmi á tvöföldu kjördæmisþingi sem haldið verður í Mývatnssveit á laugardaginn kemur. Alls hafa 410 fulltrúar rétt til setu í á þinginu og munu þeir velja tíu efstu menn á lista flokksins í kjördæminu.

Hamas segist geta viðurkennt Ísraelsríki

Æðsti leiðtogi Hamas samtakanna sagði í viðtali í dag að Hamas viðurkenndi að tilvera Ísraelsríkis sé staðreynd. Khaled Meshaal, útlægur leiðtogi samtakanna virðist þarna taka mildari stefnu gagnvart Ísrael en áður. Í viðtalinu segir Meshaal að Ísrael sé raunverulegt og að það verði áfram til ríki sem heitir Ísrael. Það sé staðreynd.

Kúbverjar sem neitað var um hótelgistingu komnir til Noregs

Kúbversk sendinefndinefnd sem neitað var um gistingu á hótelinu Edderkoppen í Osló í síðustu viku lenti á Gardemoen í dag. Berit Ås, fyrrverandi leiðtogi Sósíalíska vinstriflokksins, var meðal þeirra sem tók á móti hópnum með því að syngja kúbverska þjóðsönginn og þannig styðja málstað þeirra.

Íþaka fundin ?

Breskir fræðimenn telja sig vera búnir að finna hina foru eyju Íþöku þar sem hetja Hómers Ódysseifur bjó. Ef Íþaka er fundin er það varla minni atburður en þegar Trója fannst í Tyrklandi árið 1870. Vísindamennirnir hafa verið að bora djúpar holur á eynni Paliki til þess að leita vísbendinga um hvernig landslagið hafi breyst á síðustu árþúsundum.

ESB boðar iðnbyltingu

Evrópusambandið boðar iðnbyltingu í nýrri áætlun um aðgerðir gegn loftslagsbreytingum. Sambandið vill að aðildarríkin minnki útblástur gróðurhúsalofttegunda um 20% fyrir 2020. Jose Manuel Barroso, forseti framkvæmdastjórnar ESB, segir þurfa samræmd viðbrögð við loftslagsbreytingum.

Beckham á leið frá Real Madrid

Predrag Mijatovic, íþróttastjóri spænska stórliðsins Real Madrid, greindi frá því í dag í ítölsku sjónvarpi að samningurinn við enska knattspyrnumanninn David Beckham yrði ekki endurnýjaður en hann rennur út í vor.

Erlendum ferðamönnum fjölgaði um tæp þrettán prósent

Erlendum ferðamönnum sem komu hingað til lands í fyrra fjölgaði um tæplega 13 prósent á milli ára samkvæmt upplýsingum Ferðamálastofu. Rúmlega 422 þúsund erlendir gestir komu til landsins í fyrra og fjölgaði þeim um 48 þúsund á milli ára.

Tengivagn valt á Kísilveginum í Reykjahverfi

Tengivagn flutningabíls sem var á leið frá Húsavík til Vopnafjarðar með steypustyrktarjárn valt á svokölluðum Kísilvegi í Reykjahverfi til móts við bæinn Einarsstaði laust eftir klukkan tíu í morgun.

Sunneva Sigurðardóttir Vestfirðingur ársins 2006

Sunneva Sigurðardóttir er Vestfirðingur ársins 2006 samkvæmt vali lesenda fréttavefjarins Bæjarins besta. Fram kemur á á vefnum að Sunneva, sem er 25 ára Ísfirðingur, hafi opinberað fyrir alþjóð kynferðislega misnotkun sem hún varð fyrir í æsku.

Sprengjutilræði í suðurhluta Filippseyja

Tvær sprengjur hafa sprungið í dag á eyjunni Mindanao sem tilheyrir Filippseyjum. Sex létust og 23 særðust þegar sprengja sprakk á markaði í borginni General Santos og nokkrum stundum síðar sprakk önnur sprengja í höfuðborg eyjunnar, Kidapawan. Engar fregnir hafa borist af manntjóni þar.

Flugvélar leitað á hafsbotni

Hafrannsóknarskip bandaríska flotans sem aðstoðar við leit að indónesisku farþegaþotunni sem fórst fyrir níu dögum, ætti að geta varpað ljósi á hvort málmhlutir sem fundist hafa á hafsbotni, séu flak vélarinnar.

Innbrotahrina á höfuðborgarsvæðinu

Þrír menn voru í gær úrskurðaðir í viku gæsluvarðhald vegna gruns um aðild að fjölda innbrota og þjófnaða, bæði í fyrirtæki og heimili á höfuðborgarsvæðinu og þá voru tveir menn handteknir í morgun á Vesturlandsvegi með þýfi í bíl sínum. Segir lögregla að innbrotahrina hafi verið á svæðinu.