Aðför Fréttablaðsins að Halldóri

Páll Magnússon, varaþingmaður Framsóknarflokksins og aðstoðarmaður iðnaðar- og viðskiptaráðherra, segir að Fréttablaðið sé í herferð gegn Halldóri Ásgrímssyni, forsætisráðherra og formanni Framsóknarflokksins. Páll vísar þar til umfjöllunar Fréttablaðsins um aðdraganda Íraksstríðsins og veru Íslands á lista hinna staðföstu þjóða.

Meirihluti samþykki stuðning

Þingflokkur Samfylkingarinnar hefur samþykkt að flytja á Alþingi frumvarp til breytingar á stjórnarskrá Íslands sem hefur í för með sér að ríkisstjórn á hverjum tíma verði óheimilt að lýsa yfir aðild að eða stuðningi við stríðsaðgerðir nema með samþykki meirihluta Alþingis. Þetta kemur fram í fréttatilkynningu frá fyrsta flutningsmanni frumvarpsins, Helga Hjörvar.

Brenndu átta þorp í Darfur-héraði

Uppreisnarmenn réðust á og brenndu átta þorp í Darfur-héraði í Súdan í gær. Haft er eftir yfirmanni í her landsins að tugir hafi fallið í árásunum en uppreisnarmennirnir létu einnig greipar sópa í þorpunum.

Funda um ferðaþjónustuvanda

Forystumenn í ferðamálum í Asíu hittast í dag til þess að reyna að endurskipuleggja ferðaþjónustu í Suðaustur-Asíu í kjölfar hamfaranna annan dag jóla. Eftir að myndir af hamfarasvæðunum birtust í sjónvarpi um allan heim hafa fjölmargir hætt við ferðalög þangað og jafnvel á staði í Asíu sem eru hvergi nærri flóðasvæðunum.

Létust í snjóflóðum í Austurríki

Þrír erlendir skíðamenn hafa látist og eins er saknað eftir að tvö snjóflóð féllu í Austurríki um helgina. Tveir hinna látnu voru kanadískir ríkisborgarar en með þeim í för var Bandaríkjamaður sem enn er leitað í St. Anton í Týról. Þá lést þýsk-bandarískur snjóbrettamaður í snjóflóði sem féll í Vorarlberg í vesturhluta Austurríkis í gær.

Framsóknarmenn í ójafnvægi

"Mig undrar að Framsóknarmenn skuli kalla fréttaskrif Fréttablaðsins aðför að forsætisráðherra. Blaðið hefur ekki gert annað en segja fréttir af umræðunni dagana sem Halldór Ásgrímsson og Davíð Oddsson ákváðu stuðning Íslendinga við innrásina í Írak," sagði Sigurjón M. Egilsson, fréttaritstjóri á Fréttablaðinu, um fullyrðingar Páls Magnússonar, aðstoðarmanns iðnaðarráðherra, um að Fréttablaðið væri með aðför að Halldóri Ágrímssyni forsætisráðherra.

Þokast í samkomulagsátt

Palestínska sjónvarpið hafði eftir Mamhoud Abbas, forseta Palestínu, nú í dag að hann væri mjög nálægt því að semja við uppreisnarhópa í landinu um að hætta árásum á Ísraela. Fréttir hafa borist af því að vopnahléssamkomalag væri í sjónmáli en talsmenn Abbas hafa neitað að tjá sig um málið hingað til.

Tveir gripnir í áhlaupi lögreglu

Lögregla í Þýskalandi handtók tvo menn sem grunaðir eru um að skipuleggja hryðjuverkaárásir í Írak. Þeir voru gripnir í áhlaupi lögreglu á hús í borginni Mainz og er annar þeirra talinn vera háttsettur innan hryðjuverkasamtakanna al-Qaida.

Deiluaðilar funda í Finnlandi

Fulltrúar indónesískra stjórnvalda og uppreisnarmanna í Aceh-héraði munu hittast á fundi í Finnlandi í lok næstu viku til þess að reyna að binda enda á þriggja áratuga blóðuga baráttu á Súmötru. Það voru samtök sem Martti Ahtisaari, fyrrverandi forseti Finnlands, er í forsvari fyrir sem áttu frumkvæðið að fundinum og mun Ahtisaari sjálfur reyna að miðla málum.

Ofsaveður í Bandaríkjunum

Ofsaveður olli því að fella varð niður hundruð flugferða í Bandaríkjunum í dag og umferð á vegum gekk bæði hægt og illa. Stormviðvaranir voru í gildi frá Wisconson til Nýja-Englands og víða kyngdi niður allt að hálfum metra af snjó. Í stórum hluta Norðausturríkjanna var allt í lamasessi og í Miðvesturríkjunum var ástandið litlu skárra.

Brunagildran reist án leyfis

Ef húsið þar sem eldur varð laus á athafnasvæði Hringrásar hefði verið byggt eftir venjulegum leiðum hefði ekki þurft að fara eins og fór, segir brunamálastjóri. Lyftarahleðsla hefði verið í sérstöku brunahólfi. </font /></b />

Sérkennilegar kveðjur

Formaður skipulagsráðs Reykjavíkur segir lögnámsbeiðni Kópavogs vera ótímabæra og ummæli Gunnars I. Birgissonar sérkennilega kveðju. Bæjarráðsmaður í Kópavogi segir ummæli Gunnars fordómafull og afturhaldssöm.</font /></b />

Deilt um stuðningsyfirlýsingu

"Mönnum finnst að Gylfi sé að taka að sér umboð sem hann ekki hefur og það sé ómaklegt," segir Árni Guðmundsson formaður Starfsmannafélags Hafnarfjarðar og félagi í verkalýðsmálaráði Samfylkingarinnar.

Segir árásir flokksfélaga grófar

Formaður Samfylkingarinnar segir stuðningsmenn Ingibjargar Sólrúnar Gísladóttur hafa ráðist að sér með grófari og persónulegri hætti á síðustu dögum en andstæðingar hans í pólitík hafi nokkru sinni gert. Einn af áhrifamönnum innan Samfylkingarinnar vill að Ingibjörg Sólrún dragi formannsframboð sitt til baka.

Friðarhorfur vænkast

Friðarhorfurnar í Miðausturlöndum vænkast. Svo virðist sem Mahmoud Abbas hafi sannfært skæruliða um vopnahlé og Ísraelsmenn virðast hafa trú á Abbas.

Vísa skoðun prófessors á bug

Leiðtogar stjórnarandstöðunnar vísa algerlega á bug þeirri skoðun forseta lagadeildar Háskóla Íslands að oddvitum ríkisstjórnarinnar hafi verið heimilt að styðja innrásina í Írak án samráðs við Alþingi og utanríkismálanefnd. Þeir segja Davíð Oddsson og Halldór Ásgrímsson klárlega hafa brotið lög og formaður Vinstri - grænna útilokar ekki að það geti leitt til afsagnar þeirra.

Sjúkrahús brann

Eldur kviknaði í sjúkrahúsi í Nasiriyah, suðurhluta Íraks í gær með þeim afleiðingum að 14 manns eru taldir af og 75 slösuðust.

Júsjenkó sver embættiseið

Viktor Júsjenkó sór embættiseið sem forseti Úkraínu í gær, eftir tveggja mánaða kosningadeilu. Í ræðu sinni sagði hann að innsetning sín í embætti forseta væri sigur frelsis yfir einræði og nú væri þetta fyrrum sovéska ríki í miðju Evrópu.

Sáttaviðræður í Finnlandi

Stjórnvöld í Indónesíu og aðskilnaðarsinna uppreisnarmenn, munu hittast í Helsinki, Finnlandi nú í vikunni til að ræða formlegt vopnahlé í Aceh-héraði.

Fórnarlamba minnst

Franskir eftirlifendur helfararinnar vígðu í gær "Nafnavegg", minnismerki sem nafngreinir 76.000 gyðinga sem fluttir voru frá Frakklandi í síðari heimsstyrjöldinni.

Kárahnjúkar og Írak á Alþingi

Formenn þingflokkanna segjast eiga von á því að Íraksmálið og Kárahnjúkar verði meðal þeirra mála sem rædd verði í óundirbúnum fyrirspurnum á Alþingi sem kemur saman að nýju í dag eftir jólaleyfi.

Friðarákvæði í Stjórnarskrá

Samfylkingin leggur fram lagafrumvarp á Alþingi í dag þar sem lagt er til að í 21. grein stjórnarskrárinnar verði heimild til að lýsa yfir stuðningi eða eiga aðild að stríði bundin við meirihlutasamþykki Alþingis.

Vorið lofar ekki góðu

"Það er engin sérstök hjátrú um veðrið á bóndadeginum sjálfum en það er sagt að ef þorrinn er þurr og góa vindasöm þá mun vorið verða gott," segir Aðalheiður Hallgrímsdóttir hjá veðurklúbbnum í Dalbæ á Dalvík.

Fyrsta nýja kaupskipið í áratug

Fyrsta kaupskipið sem er smíðað fyrir Íslendinga í áratug siglir ekki undir íslenskum fána heldur færeyskum af skattaástæðum. Samgönguráðherra segir sig og fjármálaráðherra vera að skoða hvort unnt sé að breyta skattafyrirkomlaginu. Skipið var afhent í Hamborg um helgina.

Ekki hætta á flóðum í Reykjavík

Talsvert frost hefur verið á landinu það sem af er vetri en á næstunni er spáð hlýindum um allt land. Í Reykjavík mun hitinn vera frá fimm og upp í átta til níu stig þegar best lætur.

Fyrsta nýja kaupskipið í áratug

Fyrsta kaupskipið sem er smíðað fyrir Íslendinga í áratug siglir ekki undir íslenskum fána heldur færeyskum af skattaástæðum. Samgönguráðherra segir sig og fjármálaráðherra vera að skoða hvort unnt sé að breyta skattafyrirkomlaginu. Skipið var afhent í Hamborg um helgina.

Vill ekki á frímerki

Hinn einræni Nóbelsverðlaunahafi í bókmenntum árið 2004, Elfriede Jelinek, hefur hafnað tilboði austurrísku póstþjónustunnar um að eftirmynd sín verði sett á frímerki.

Eins saknað

Hjálparstarfsmenn í austurrísku Ölpunum héldu áfram leit sinni í gær að bandarískum snjóbrettamanni sem hefur verið saknað síðan snjóflóð féll á St. Anton-svæðið á laugardaginn. Að minnsta kosti þrír létust.

Fjórir létust í þyrluslysi

Flugmaður og þrír áhafnarmeðlimir létust þegar einkaþyrla hrapaði í Vestur-Englandi á laugardaginn.

Frjálslyndir missa örlítið fylgi

Stjórnarflokkarnir í Danmörku, Frjálslyndi flokkurinn og Íhaldsflokkurinn hafa misst örlítið fylgi samkvæmt skoðanakönnun sem gerð var fyrir Jótlandspóstinn og myndu missa eitt þingsæti ef úrslit kosninganna 8. febúrar yrðu þessi.

Vilja svipta ríkisborgararétti

Peter Pilz, einn af leiðtogum Græningjaflokksins í Austurríki, vill að Arnold Schwarzenegger, ríkisstjóri í Kaliforníu, verði sviptur austurrískum ríkisborgararétti. Hann hafi gert landinu skömm til með því að hafa samþykkt aftöku dæmds morðingja. Donald Beardslee nú í vikunni.

Tíðkast í Hollandi

Frá því árið 1997 hafa hollenskir læknar 22 sinnum framið líknardráp á nýfæddum börnum, sem vegna illvígra sjúkdóma hefðu ekki átt sér langra lífdaga auðið.

Nöfn allra skráð niður

Kínversk stjórnvöld skrá hjá sér nöfn allra þeirra, sem leggja leið sína að minningarstað um Zhao Ziyang, sem komið hefur verið upp á heimili hans í Peking.

Krefja Tíbeta um hlýðni

Kínverskir embættismenn krefjast þess að tíbetskir trúarleiðtogar sýni kínverskum yfirvöldum meiri hlýðni. Trúarleiðtogunum hefur verið hótað refsingum ef þeir sýna ekki meiri stuðning en verið hefur við stefnu Kínverja gagnvart Dalaí Lama, hinum útlæga trúarleiðtoga Tíbeta.

Skriður gætu valdið flóðbylgju

Skriður af völdum eldgosa í Atlantshafi geta komið af stað hárri flóðbylgju sem næði alla leið til Íslands, segir Freysteinn Sigmundsson jarðeðlisfræðingur. Hættur á hafsbotni og afleiðingar hamfaranna á Indlandshafi verða til umfjöllunar á málþingi jarðvísindastofnunar Háskóla Íslands í vikunni.

Segir smáþjóðir geta skipt sköpum

Ísland og aðrar smáþjóðir geta skipt sköpum í sáttaumleitunum með því að sýna hógværð í umdeildum alþjóðamálum, segir Thorvald Stoltenberg, fyrrverandi utanríkisráðherra Noregs. Hann telur smáþjóðir geta haft mikil áhrif með starfi innan öflugra alþjóðastofnana.

Lítið forrit lækkar símreikninginn

Eitt lítið tölvuforrit getur lækkað símreikning fólks um þúsundir króna á mánuði. Tugir milljóna manna nota þetta forrit nú þegar og þeim fer fjölgandi með degi hverjum. Tölvusérfræðingur segir að þetta kollvarpi símamarkaðnum.

Ekki alvarlegt athæfi

Tilkynnt var um þjófnað á næturklúbbnum Casino í Keflavík klukkan 04.38 aðfaranótt gærdagsins. Klúbburinn var enn þá opinn, en hann er með frjálsan opnunartíma, þegar starfsfólk kom að manni fyrir innan barborðið. Maðurinn var þá búinn að opna peningakassa staðarins og taka úr honum 4.500 krónur.

Próftaka í héraði

Lífleg starfsemi hefur verið í Þekkingarsetrinu á Húsavík að undanförnu að sögn Óla Halldórssonar, forstöðumanns setursins. Tugir nemenda frá Húsavík, sem stunda nám við Háskólann á Akureyri, nota setrið reglulega til náms og margir hafa tekið þar fjarpróf.

Eldur laus í íbúð á dvalarheimili

Grunur leikur á að vistmaður á dvalarheiminu Ási í Hveragerði hafi sjálfur kveikt eld sem upp kom í íbúð hans þar í gærkvöldi. Brunaviðvörunarkerfi lét vita af eldinum laust fyrir klukkan sjö í gærkvöldi og bárust boð til neyðarlínunnar.

Tekinn fyrir ölvunarakstur

Ökumaður, sem grunaður er um ölvun, varð valdur að árekstri á Ísafirði laust fyrir klukkan fimm í morgun. Tveir fólksbílar rákust saman á gatnamótum Ásgeirsgötu og Suðurgötu á Tanganum og reyndist ökumaður annars bílsins, piltur um tvítugt, ölvaður. Hann gistir nú fangageymslu lögreglunnar á Ísafirði.

Stoltenberg ræðir um öryggismál

Thorvald Stoltenberg, fyrrverandi utanríkisráðherra Noregs, verður aðalræðumaður á málþingi framtíðarhóps Samfylkingarinnar um stöðu öryggismála í heiminum, sem fram fer á Grand Hóteli í Reykjavík í dag.

Reyndu að ryðjast inn á þorrablót

Fjórir óboðnir gestir, þrír piltar og ein stúlka, sem reyndu að komast inn á þorrablót í Garðabæ í nótt enduðu í fangageymslu lögreglunnar. Fólkinu var meinuð innganga á þorrablót Stjörnunnar í Ásgarði en lét sér ekki segjast og neitaði að hlýða fyrirmælum lögreglu. Greip lögregla þá til þess ráðs að handtaka fjórmenninganna.

Segja Bush táknmynd djöfulsins

Pílagrímar í Mena í Sádi-Arabíu köstuðu í gær steinum í tákn djöfulsins, en það er hluti af pílagrímsför múslíma til helgu borgarinnar Mekka. Í viðtölum við fréttamenn sögðust margir pílagrímanna sjá George Bush Bandaríkjaforseta fyrir sér sem táknmynd skrattans.

Teknir fyrir verkfæraþjófnað

Þrír sextán ára piltar voru gripnir við innbrot í vinnuskúra á Álftanesi í nótt. Til piltanna sást og var lögregla látin vita. Reyndu þeir að komast undan en lögregla náði þeim fljótlega á hlaupum. Höfðu piltarnir stolið verkfærum og komið þeim undan en þeir vísuðu síðan á þýfið. Málið telst upplýst.