Níu mínútur komnar fram yfir venju­legan leik­tíma þegar Szoboszlai jafnaði

Dominik Szoboszlai tryggði Liverpool jafntefli gegn Newcastle United með marki úr vítaspyrnu þegar níu mínútur voru komnar fram yfir venjulegan leiktíma. Lokatölur á St James' Park í dag, 2-2.

Flest benti til þess að Newcastle United fengi sannkallaða draumabyrjun undir stjórn nýja knattspyrnustjórans, Matthias Jaissle. En í uppbótartíma braut Lewis Hall klaufalega á Victor Munoz innan vítateigs og Stuart Atwell benti á punktinn. Szoboszlai tók vítið, skoraði af miklu öryggi og jafnaði í 2-2.

Jaissle er nýtekinn við Newcastle eftir að Eddie Howe hætti sem stjóri liðsins. Það var ekki bara Howe sem hvarf á braut í sumar heldur seldi Newcastle þrjá af sínum sterkustu leikmönnum: Sandro Tonali, Anthony Gordon og Bruno Guimaraes.

Liverpool lék einnig sinn fyrsta keppnisleik undir stjórn nýs stjóra í dag, Andoni Iraola, sem tók við liðinu af Arne Slot.

Newcastle byrjaði leikinn vel og komst yfir strax á 5. mínútu. Anthony Elanga skoraði þá eftir skyndisókn og sendingu frá William Osula. Elanga átti erfitt uppdráttar á síðasta tímabili og skoraði ekki í 32 deildarleikjum en byrjar þetta tímabil vel.

Newcastle var með 1-0 forystu í hálfleik en á 55. mínútu jafnaði Cody Gakpo með skoti fyrir utan vítateig.

Gleði Rauða hersins var þó skammvinn því Skjórarnir náðu forystunni á nýjan leik þremur mínútum seinna. Aftur skoraði Newcastle eftir skyndisókn. Joe Willock lagði þá boltann í fjærhornið eftir frábæran undirbúning Yoanes Wiisa.

Mark Willocks virtist ætla að duga Newcastle til sigurs en Szoboszlai kom í veg fyrir það.