Í basli með að finna nýjan sendi­herra í Washington DC

Selenskí bauð Yuliu Svyrydenko, fyrrverandi forsætisráðherra, stöðuna fyrst en hún hafnaði henni. Það viðurkenndi Selenskí á blaðamannafundi í síðasta mánuði en hann sagðist vera að leita að manneskju sem hentaði í starfið og gæti staðið sig vel.

Aðrir sem leitað hefur verið til hafa einnig hafnað en samkvæmt frétt Politico óttast margir að starfið yrði mjög erfitt vegna þess hve ríkisstjórn Donalds Trump væri óútreiknanleg. Það eru þó ekki margir sem koma til greina, þar sem sendiherra Úkraínu í Bandaríkjunum þyrfti að tengjast forseta Úkraínu nánum böndum og hafa greiðan aðgang að honum. Viðkomandi þyrfti einnig að njóta trausts forsetans.

Einn fyrrverandi erindreki frá Úkraínu sagði það of mikla einföldun að segja að enginn vildi starfið. Vandamálið væri frekar að finna einhvern sem bæði hentar vel í starfið og vill það.

Hafa dregið verulega úr stuðningi en enn mikilvægir

Þrátt fyrir að ríkisstjórn Trumps hafi dregið nánast alfarið úr beinum stuðningi við Úkraínu eru samskipti ríkjanna gífurlega mikilvæg fyrir Úkraínumenn.

Kiel Institut birti í vikunni nýja skýrslu um stuðning við Úkraínu þar sem glögglega má sjá hve mikið Trump hefur dregið úr stuðningi við Úkraínu.

Mikið af þeim vopnum sem Úkraínumenn fá frá bakhjörlum sínum í Evrópu eru keypt frá Bandaríkjunum og Úkraínumenn leggja nú mikið kapp á það að fá heimild til að framleiða flugskeyti í Patriot-loftvarnarkerfið frá Bandaríkjunum. Slík flugskeyti eru Úkraínumönnum gífurlega mikilvæg þar sem þau eru einu varnir þeirra gegn rússneskum skotflaugum.

Selenskí sagði nýverið að á þessu ári hefðu Úkraínumenn fengið einungis þriðjung þeirra flugskeyta sem þeir fengu á sama tíma í fyrra.

Varnarmálaráðuneyti Rússlands birti í morgun mynd af rússneskum sjálfsprengidrónum með texta sem gaf til kynna að þeir yrðu jafn margir og snjókorn í Úkraínu í vetur. Þá fylgdi myndinni texti um að Úkraínumenn myndu frjósa í vetur.

Úkraínumenn svöruðu færslunni með mynd af brennandi olíuvinnslu í Rússlandi og sögðu að þeir myndu hlýja sig við ylinn frá henni og öðrum slíkum.

Vandinn er samt raunverulegur fyrir Úkraínumenn og hafa ráðamenn þar varað íbúa við því að veturinn gæti orðið sá erfiðasti hingað til.