Vonar að völlurinn verði ekki til vand­ræða

Blaðamenn Daily Mail hafa fjallað mikið um vallaraðstæður á Raymond James leikvanginum í Tampa í Flórídafylki. Af myndum að dæma er völlurinn í mjög lélegu ásigkomulagi en nýlega var gras lagt þar yfir.

Graslagningin virðist ekki hafa heppnast vel. Á myndum Daily Mail má sjá að grasið er illa saumað saman á mörgum stöðum og óttast er að meiðslahætta skapist.

„Þetta mun ekki hafa áhrif á liðsvalið, út frá því sem ég hef heyrt verður völlurinn í lagi. Við vonum auðvitað að hann verði það. Ég sá bara mynd, sem gerði mig áhyggjufullan, en við munum meta þetta betur þegar við mætum á staðinn,“ sagði Tuchel á blaðamannafundi.

„Ef það verða einhver vandamál getum við alltaf brugðist við því. Við erum með vallarstjóra sem sér um þetta og vonandi verður allt í fínu lagi. Þetta er amerískur fótboltavöllur. Maður sér það. En okkur er sagt að það verði allt í góðu,“ bætti Tuchel við.

Landsliðsþjálfarinn greindi frá því að hann muni spila sitt hvoru liðinu í fyrri og seinni hálfleik. Englendingar munu því fá gott tækifæri til að ganga í augun á Tuchel.

Leikurinn gegn Nýja-Sjálandi er síðasti æfingaleikur Englands fyrir HM. Þar verður England með Króatíu, Panama og Gana í riðli.

Æfingaleikur Englands og Nýja-Sjálands hefst klukkan 20:00 og verður í beinni útsendingu á Sýn Sport Viaplay.