Vill fimm milljarða Banda­ríkja­dala frá BBC

 Trump sakar BBC um ærumeiðingar og segir stofnunina einnig hafa gerst brotlega við lög um heiðarleg viðskipti.

Breska ríkisútvarpið hefur þegar beðið forsetann formlega afsökunar á atvikinu og þá hafa fréttastjóri og forstjóri Breska ríkisútvarpsins sagt af sér vegna málsins. Það dugði þó ekki til því Trump hafði einnig, auk afsökunarbeiðninnar, farið fram á einn milljarð dala í skaðabætur að auki og því hafði stofnunin hafnað.

„Ég ætla að fara í mál við BBC fyrir að leggja mér orð í munn. Þeir gerðu það bókstaflega, þeir lögðu mér orð í munn, orð sem ég sagði aldrei. Þeir hljóta að hafa notað gervigreind eða eitthvað svoleiðis,“ sagði forsetinn meðal annars í Hvíta húsinu í gærkvöldi.

Þarna krítar Trump reyndar dálítið liðugt þegar hann segist ekki hafa sagt það sem hann er látinn segja í þættinum. Hið rétta er að orð hans voru klippt úr samhengi, þannig að tveimur bútum úr ræðu hans var skeytt saman eins og þar færi heil setning.