Hættir hjá borgar­stjóra og að­stoðar nú ráð­herra

Þetta segir Ágúst Ólafur í færslu á Facebook. Ágúst Ólafur er annar aðstoðar Heiðu Bjargar Hilmisdóttur borgarstjóra sem lætur af störfum á innan við þremur mánuðum. Katrín M. Guðjónsdóttir baðst lausnar frá starfinu í maí og tók Ágúst Ólafur við starfinu í framhaldinu.

„Þegar haft var samband við mig og óskað eftir kröftum mínum í ráðuneytið þá hafði ég nýlega ráðið mig í núverandi starf. Ég fann þá að barna- og menntamálin á landsvísu toguðu enda hef ég lengi brunnið fyrir þeim málum,“ segir Ágúst Ólafur.

„Sem þingmaður lagði ég fram tillögu um lögfestingu Barnasáttmála Sameinuðu þjóðanna sem var samþykkt. Fyrir þá baráttu fékk ég sérstaka viðurkenningu Barnaheilla á 20 ára afmælisdegi Barnasáttmálans fyrir „sérstakt framlag í þágu barna og mannréttinda þeirra“, sem mér þykir mjög vænt um. En ég flutti jafnframt fjölmörg önnur mál sem snúa að málefnum barna og stuðningi við barnafjölskyldur en hef einnig verið viðloðandi kennslu undanfarin 14 ár,“ segir Ágúst Ólafur.

„Ég átti gott samstarf við Guðmund Inga á sínum tíma þegar við sátum báðir á Alþingi og ég hlakka til að vinna með honum á vettvangi ráðuneytisins. Ég er afar þakklátur fyrir stuttan en góðan tíma í Ráðhúsinu og kveð borgarstjóra og annað samstarfsfólk með miklum söknuði.“

Ríkisstjórnin hafi sett mennta- og barnamál á oddinn. 

„Ég hlakka til að taka þátt í því verkefni og vera hluti af öflugu teymi ríkisstjórnarflokkanna.“

Ágúst Ólafur var á sínum tíma þingmaður Samfylkingarinnar og starfaði því sem aðstoðarmaður samflokkskonu sinnar Heiðu Bjargar. Nú vendir hann kvæði sínu í kross og bætist í hóp aðstoðarmanna ráðherra Flokks fólksins.

Annar aðstoðarmaður ráðherrans

Á vef stjórnarráðsins segir að Ágúst hefji störf 1. september og mun starfa með Guðbjörgu Ingunni Magnúsdóttur sem einnig er aðstoðarmaður mennta- og barnamálaráðherra.

„Ágúst er menntaður lögfræðingur, hagfræðingur og stjórnsýslufræðingur með lögfræðipróf og BA-próf í hagfræði frá Háskóla Íslands 2003, ásamt MPA-gráðu frá New York University 2011.

Ágúst Ólafur er fyrrverandi alþingismaður og efnahagsráðgjafi forsætisráðherra. Hann kemur til ráðuneytisins frá Reykjavíkurborg þar sem hann gegndi stuttlega starfi aðstoðarmanns borgarstjóra. Þá sat hann í bankaráði Seðlabanka Íslands og gegndi meðal annars formennsku í viðskiptanefnd Alþingis, Evrópunefnd forsætisráðherra og sat í framkvæmdasjóði aldraða ásamt því að leiða stjórnskipaða „Barnanefnd“ um stöðu barna í mismunandi fjölskyldugerðum.

Hann vann sem sérfræðingur á aðalskrifstofu Sameinuðu þjóðanna í New York og hefur kennt við Háskóla Íslands ásamt því að sinna ráðgjafarstörfum, m.a. fyrir Sjúkraliðafélag Íslands, Rannsóknarsetur skapandi greina, Parkinson-samtökin og Ljósið,“ segir um reynslu Ágústs.