Gaf lítið upp en er bjart­sýn á sigur gegn Ís­landi

Á blaða­manna­fundi í gær á Wankdorf leik­vanginum í Bern sagði Pia að sitt lið þyrfti að hafa góðar gætur á Sveindísi Jane Jóns­dóttur. Bæði Ís­land og Sviss töpuðu leikjum sínum í fyrstu um­ferð riðla­keppninnar og því erum nokkurs konar úr­slita­leik að ræða fyrir bæði lið upp á fram­haldið í riðlinum að gera.

Töpin voru hins vegar um margt ólík. Ís­land átti slæman dag, von­brigða frammistöðu gegn Finn­landi í 1-0 tapi á meðan að Sviss tapaði 2-1 fyrir Noregi en tók með sér marga jákvæða punkta í frammistöðu sinni.

„Mér fannst mitt lið fá meira sjálf­s­traust þrátt fyrir þetta tap, sagði Pia á blaða­manna­fundinum í gær en Sviss leikur á heima­velli í keppninni og búist við um og yfir 30 þúsund stuðnings­mönnum á leik kvöldsins. „Það verður pressa á okkur en leik­menn eru til­búnir. Liðsandinn er góður og við getum komið á óvart.“

Að­spurð um leik­planið í leiknum gegn Ís­landi lét Pia, sem er afar reynslu­mikill þjálfari og hefur þjálfað bestu lands­lið í heimi, ekkert uppi.

„Þú munt sjá það þegar að leiknum kemur,“ svaraði Pia en sagði sitt lið hafa unnið heima­vinnuna hvað varðar upp­legga ís­lenska lands­liðsins.

Pia tönglaðist oft á föstu leik­at­riðum ís­lenska lands­liðsins á blaða­manna­fundinum, vís­bending um að Sviss­lendingar ætli sér að loka á allar ógnir stelpnanna okkar þar.

„Ég er mjög bjartsýn,“ svaraði Pia að­spurð hvernig leikur kvöldsins leggst í hana.

Leikur Ís­lands og Sviss á EM í fót­bolta hefst klukkan sjö að ís­lenskum tíma. Leiknum verður lýst í beinni textalýsingu á Vísi. Með því að smella á hlekkinn hér fyrir neðan má finna alla um­fjöllun íþrótta­deildar Vísis og Sýnar af mótinu.