Ná sam­komu­lagi um kaup á Alberti

Albert var á láni hjá Fiorentina á síðasta tímabili og var ákvæði í lánsamningnum þess efnis að Fiorentina gæti keypt hann fyrir ákveðna upphæð að tímabilinu loknu. 

Forráðamenn Fiorentina virtust ekki vera til í að borga umsamda upphæð fyrir Albert og er sagt frá því í ítölskum fjölmiðlum í dag að félögin hafi komist að munnlegu samkomulagi um lækkað kaupverð fyrir Albert. 

Albert spilaði 33 leiki fyrir Fiorentina á síðasta tímabili, skoraði átta mörk og gaf þrjár stoðsendingar. Undanfarið hefur verið fjallað um áhuga annarra félaga á hans kröftum, nú síðast ítalska úrvalsdeildarfélaginu Roma. 

Nú virðist hins vegar líklegast að Albert snúi aftur til Fiorentina á komandi tímabili en talið er að félagið muni þurfa að greiða Genoa í kringum þrettán milljónir evra fyrir Íslendinginn.