Veður

Það versta yfir­staðið en veður á­fram leiðin­legt á morgun

Lovísa Arnardóttir og Tómas Arnar Þorláksson skrifa
Einar segir merkilegt hvernig veðrið náði til alls landsins í dag.
Einar segir merkilegt hvernig veðrið náði til alls landsins í dag. Vísir/Sigurjón

Einar Sveinbjörnsson, veðurfræðingur, fór yfir veðrið í dag og næstu daga í kvöldfréttum Stöðvar 2. Hann segir það fyrst og fremst hafa vakið athygli sína hversu víðtækt veðrið var og að það hafi náð til landsins alls. Hann segir það versta yfirstaðið.

„Hvað krapahríðin náði víða og náði til láglendis í morgun og olli usla og leiðindum. En það var líka áhugavert að sjá að fólk tók mark á viðvörunum. Það var lítið um að vera og það ferðaðist lítt,“ segir Einar.

Ekki sé vitað um nein óhöpp eða slys í umferðinni í dag. Á Suðurlandi hafi lokanir verið mjúkar og erlendum ferðamönnum hafi verið ráðlagt að fara ekki þar um. Það hafi verið slæmt veður, sandfok og miklar hviður.

Hvað varðar næstu daga segir Einar mjög mikla rigningu eins og er á Norðausturlandi, í Ólafsfirði og utanverðum Tröllaskaga og í Vopnafirði og Borgafirði og þar verði úrkoma með mesta móti. Almannavarnir fylgist vel með en það komi ekki til með að stytta þar upp fyrr en á fimmtudag.

„Vindurinn gengur hægt og rólega niður. Það versta er yfirstaðið myndi ég segja en það eru hviður áfram á Kjalarnesi í nótt. En það er hvasst og leiðinlegt áfram á morgun.“

Gular viðvaranir eru í gildi á nær öllu landinu fyrir utan hálendi og eru í gildi til morguns víðast hvar en renna út við Faxaflóa og á Suðurlandi klukkan 22 í kvöld.




Fleiri fréttir

Sjá meira


×