Hafnar aftur al­mennu vopna­hléi og leggur til við­ræður

Leiðtogarnir fjórir sögðu að ef Pútín yrði ekki við þeirri kröfu yrðu refsiaðgerðir gegn Rússlandi hertar til muna. Sögðu þeir Trump styðja þessa kröfu.

Í ávarpi sem hann hélt seint í gærkvöldi snerti Pútín ekki á kröfu þjóðarleiðtoganna en sagði að Evrópubúar kæmu „dónalega“ fram við Rússa með úrslitakostum. Hann sagði að mögulega yrði hægt að ræða vopnahlé seinna en fyrst ætti að hefja á nýjan leik beinar viðræður við Úkraínu um það sem hann kallaði og hefur lengi kallað grunnástæður innrásar hans í Úkraínu.

Pútín vísaði einnig til fyrri viðræðna ríkjanna í Tyrklandi, skömmu eftir innrás Rússa í Úkraínu, og sagði Úkraínumenn hafa bundið enda á þær viðræður. Hann hefur ítrekað haldið því fram að Úkraínumenn standi í vegi friðar eftir innrás sem hann skipaði inn í Úkraínu.

Úkraínumenn hafa ítrekað sagt að viðræðurnar í Tyrklandi á sínum tíma ekki hafa snúist um frið, heldur uppgjöf.

Sjá einnig: Við­ræðurnar snerust um upp­gjöf, ekki frið

Dmitrí Peskóv, talsmaður Pútíns, sagði blaðamönnum í morgun að markmið viðræðna við Úkraínumenn væri að tækla grunnástæður innrásarinnar og tryggja hagsmuni Rússlands.

Vólódímír Selenskí, forseti Úkraínu, hefur sagt að hann sé tilbúinn til beinna viðræðna við Rússa. Fyrst þurfi þó að koma á vopnahléi.

Í yfirlýsingu sem hann sendi frá sér í morgun sagði Selenskí að ummæli Pútíns væru jákvæð og virtust benda til þess að Rússar væru loksins byrjaðir að íhuga að binda enda á stríðið. Heimurinn hefði allur beðið eftir þessu í langan tíma.

Hann sagði þó að það væri óþarfi að halda drápinu áfram og að hann byggist við því að Pútín samþykkti almennt vopnahlé á morgun, eins og lagt hefur verið fram, og eftir það væri Úkraínumenn tilbúnir til viðræðna.

Sakar Pútín um tafir, aftur

Emmanuel Macron, forseti Frakklands, var einn þeirra sem krafðist vopnahlés í gær. Hann sagði blaðamönnum eftir ummæli Pútíns að um jákvætt skref væri að ræða. Viðræður ættu þó ekki að hefjast á undan vopnahléi.

Macron sagði, samkvæmt frétt Le Parisien, að tillaga Pútíns sýndi að hann væri að reyna að vinna sér inn tíma. Hann væri að reyna að tefja viðræður, eins og Macron hefur ítrekað sakað Pútín um.

Macron hefur einnig tjáð sig um tillögu Pútíns á X. Þar segir forsetinn að viðræður geti ekki átt sér stað meðan „vopnin tala“ og á meðan Rússar varpi sprengjum á óbreytta borgara.

Pútín og aðrir ráðamenn í Rússlandi hafa nokkrum sinnum frá því í mars talað um vopnahléstillögu Trumps frá því þær voru fyrst lagðar fram snemma í mars. Þeir hafa ekki viljað samþykkja þær, en þær snúast í raun um almennt vopnahlé í þrjátíu daga, án skilyrði.

Þess í stað hafa Rússar lagt fram eigin kröfur fyrir vopnahlé og hafa þeir fyrir vikið verið gagnrýndir af evrópskum ráðamönnum fyrir að þykjast vilja frið en standa í vegi hans.

Sjá einnig: Segist opinn fyrir vopna­hléi en hafnar til­lögu Trumps

Trump hefur einnig tjáð sig um ummæli Pútíns og virðist hann taka þeim fagnandi. Hann skrifaði á Truth Social, hans eigin samfélagsmiðil, að vonandi væri hægt að binda enda á „blóðbaðið“ sem hefði kostað hundruð þúsunda lífa.

„Þetta verður glænýr, og mun betri, HEIMUR,“ skrifaði Trump. Hann hét því að vinna áfram með báðum aðilum.

Með umfangsmiklar kröfur

Fregnir hafa borist af því að Trump og hans helstu ráðgjafar séu óánægðir með hve illa þeim hefur gengið að koma á friði og hafa þeir ítrekað talað um að ganga frá samningaborðinu, ef svo má segja.

Sjá einnig: Pirraður yfir því hvað friður er langt utan seilingar

Rússar hafa ítrekað lagt fram umfangsmiklar kröfur sem skilyrði fyrir friði og hafa þær tekið litlum breytingum frá upphafi innrásar þeirra. Má þar nefna að Úkraína verði ekki aðili að NATO, lýsi yfir ævarandi hlutleysi, leggi niður vopn og takmarki stærð herja sinna verulega.

Einnig krefjast Rússar fulla stjórn á öllum svæðum sem þeir stjórna og meira en það. Auk þess eiga Rússar að gangast „afnasistavæðingu“. Rússar hafa lengi haldið því fram að Úkraínu sé stýrt af nasistum en það er rangt.