Létu ævintýrið loksins rætast í fiskabúrinu á X-inu

Oddur Ævar Gunnarsson skrifar 13. nóvember 2024 15:01

Strákarnir í HAM riðu fyrstir á vaðið í fiskabúrinu.

Fyrstu tónleikarnir í fiskabúri X-ins 977 fara í loftið á morgun en um er að ræða nýja þáttaröð sem birtist á Vísi og ber heitið LIVE IN A FISHBOWL. Þetta er tónleikaröð sem tekin er upp í hljóðveri X-ins 977, því sem undanfarin ár hefur verið kallað fiskabúrið og er skírskotun í goðsagnakennt lag Maus.

„Það er svo oft sem menn fá svona hugmyndir en svo eru þær aldrei framkvæmdar. Ómar fékk þessa ævintýrahugmynd að bjóða hljómsveitum að spila inn í litla stúdíóinu okkar sem lítur út eins og fiskabúar, líkt og tíðkast í þessum útvarpsheimi og við ákváðum bara að kýla á þetta þrátt fyrir að vera efins í byrjun,“ segir útvarpsmaðurinn og rokkarinn Addi Tryggvason í samtali við Vísi.

Hann segir rokkarana í HAM hafa verið efsta á óskalista útvarpsmannana á X-inu. „Ég man ég sagði samt bara: Ha?!?! Fá HAM?! Það er alltof stórt! Svo voru þeir bara fyrsta bandið til þess að samþykkja að mæta og það opnaði svo sannarlega hurðina fyrir okkur enda gátum við þá sagt við hina fiskana að HAM væri að mæta og hinir rokkararnir urðu miklu spenntari að mæta fyrir vikið,“ segir Addi hlæjandi.

HAM verða fyrstir í tónleikaröðinni í hinu pínulitla stúdíói sem fékk nafnið upprunalega þegar X-ið var í Aðalstræti með stóran glugga út á Ingólfstorg. Þegar fólk horfði inn af torginu var eins og starfsmenn væru þar inni í fiskabúri. Á eftir HAM mætir Biggi í Maus en Addi segir X-verja hafa fengið góðfúslegt leyfi hjá honum til að kenna tónleikaröðina við hið goðsagnakennda lag MAUS.

Blessun Bigga Maus

„Við hreinlega urðum að fá Bigga Maus og fengum hans blessun til þess að kalla tónleikaröðina þessu nafni. Það má því segja að hann sé sérlegur verndari þáttarins,“ segir Addi sem bætir því við að í hið minnsta þrjátíu hljómsveitir séu á óskalista fyrir þáttinn sem hann bætir við að verði í hið minnsta fjórar seríur. Á eftir Bigga mætir Dr. Gunni, síðan Spacestation, I Adapt og að lokum Brain Police.

„Fyrsta serían gekk eins og í ævintýri. Fengum sex eða sjö hljómsveitir í heimsókn, fylltum fiskabúrið hreinlega af græjum. Það var ekki þverfótað fyrir Marshall boxum og míkrafónstöndum og svo var bara alvöru ljósasýning með einhverjum 24 rásum af hljóði. Við gerðum þetta á einni viku, að sjálfsögðu að kvöldi til þegar allir voru farnir úr húsi enda hefði hávaðinn líklega ekki skapað okkur vinsældir hjá nágrönnum okkar á Bylgjunni,“ segir Addi hlæjandi.