Frum­sýning á Vísi: Rokkað á miðju gólfi komin sjö mánuði á leið

Platan mun einfaldlega heita „Live at Gaukurinn“ og inniheldur upptöku af tónleikum Ottoman sem fram fóru þann 23. júní í fyrra. Útgáfan er bæði í formi tíu laga plötu á öllum helstu streymisveitum auk tónleikamyndar sem gefin verður út á Youtube í kvöld. 

Allt á miðju gólfi

Ottoman hefur fyrir löngu skipað sér sess í íslensku rokksenunni og er bandið einna helst þekkt fyrir sterk blúsáhrif, tregafullan en orkumikinn hljóm og líflega tónleika. Allt þetta og meira var til staðar á Gauknum þegar hljómsveitin tróð upp fyrir fullum sal og flutti sín vinsælustu lög auk þess að frumflytja hvorki meira né minna en fimm ný lög, sem sveitin hafði samið einungis tveimur vikum fyrir tónleikana.

Gaukurinn er gamalgróinn tónleikastaður rokksenunnar á Íslandi en þessir tónleikar voru frábrugðnir flestum öðrum sem þar fara fram, þar sem að Ottoman stilltu sér upp í miðju salarins og áhorfendur stóðu allt í kring um hljómsveitina og fengu því að fylgjast með frá sjónarhornum sem eru venjulega hulin þeim. Þetta, ásamt staðreyndinni að tónleikarnir yrðu þeir síðustu hljómsveitarinnar í bráð, skilaði sér í mjög nánum og berskjölduðum tónleikum sem fönguðu hug og hjörtu áhorfenda.

Ottoman er íslensk rokkhljómsveit skipuð þeim Stefáni Laxdal, Helga Durhuus, Gottskálki Daða Bernhöft Reynissyni og Karlottu Laufey Halldórsdóttur. Sveitin varð til árið 2014 og hefur skapað sér sterkt nafn í rokk senunni á Íslandi. Sveitin á undir beltinu eina plötu í fullri lengd sem hefur hlotið gríðarlega góðar viðtökur, tónleika víðsvegar um landið sem og tónleikaferð í Austur-Evrópu.

Skemmtilegt er að geta þess að Karlotta, gítarleikari hljómsveitarinnar var komin um 7 mánuði á leið með fyrsta barn sitt þegar tónleikarnir fóru fram og lét það ekki mikið á sig fá, enda voru allir meðlimir Ottoman í sínu besta formi og skiluðu frá sér einstökum tónleikum sem munu seint gleymast.

Tónleikarnir voru teknir upp bæði á hljóð og mynd, enda var hljómsveitinni ljóst frá upphafi að kvöldið yrði sérstakt í alla staði. Mikill metnaður var því lagður í alla framkvæmd og útlit tónleikanna, en vinnan við þá skilaði sér heldur betur og hefur nú loks skilað sér í glæsilegri tónleikaupptöku tónlistaraðdáendur geta notið á meðan beðið er eftir næstu plötu hljómsveitarinnar.