Fabregas að fá 41 árs gamlan Pepe Reina til liðs við sig

Como vann sér inn sæti í ítölsku úrvalsdeildinni er liðið hafnaði í öðru sæti B-deildarinnar á síðasta tímabili undir stjórn Cesc Fabregas, fyrrverandi leikmanns liða á borð við Arsenal, Chelsea, Barcelona og spænska landsliðsins.

Pepe Reina hefur verið án félags frá því að samningur hans við Villarreal rann út í vor. Þrátt fyrir að vera orðinn tæplega 42 ára gamall hefur Reina engann áhuga á því að hætta strax og nú virðist hann vera að ganga til liðs við Como.

Reina á að baki langan og farsælan feril þar sem hann hefur meðal annars spilað með Barcelona, Liverpool, Bayern München og AC Milan. Þá á hann að baki 36 leiki fyrir spænska landsliðið á árunum 2005-2017.

Ef marka má félagsskiptasérfræðinginn Fabrizio Romano er Reina langt frá því að vera eina stóra nafnið sem er á leið til Como því hann segir að liðið sé einnig að næla í Alberto Moreno og Raphael Varane.