Yo-Yo Ma kemur til landsins

Í fréttatilkynningu frá Sinfóníuhljómsveitinni segir að Ma sé einn þekktasti núlifandi hljóðfæraleikari heims og koma hans sé því sannkallaður stórviðburður í íslensku tónlistarlífi. 

Á löngum og glæsilegum ferli hafi hann hljóðritað yfir níutíu hljómplötur og unnið til 19 Grammy-verðlauna. Ásamt því að koma reglulega fram í mörgum af þekktustu tónleikahúsum heims og með framúrskarandi hljómsveitum hafi hann spilað á stórviðburðum eins og innsetningum forseta Bandaríkjanna og opnunarhátíð Ólympíuleika. 

Koma hins heimskunna sellóleikara sé hluti af 75 ára afmælisdagskrá Sinfóníuhljómsveitar Íslands og hann muni leika hinn áhrifamikla sellókonsert Edwards Elgar með hljómsveitinni.

Bæði dreymt um að koma til landsins

„Mig hefur dreymt um að heimsækja Ísland alla mína ævi. Heimurinn getur lært svo mikið af íslenskri leiðtogahæfni og visku og ég get ekki beðið eftir því að leika með dásamlegu tónlistarfólki landsins og með minni kæru vinkonu Kathryn Stott,“ er haft eftir Ma í tilkynningu.

Þá er haft eftir Stott að hana hafi einnig lengi dreymt um koma til Íslands. Því sé vægt til orða tekið að segja að hún sé spennt.

„Ég hlakka ekki aðeins til að upplifa stórbrotna náttúruna heldur að kynnast líka hinu menningarlega landslagi. Ég get varla beðið eftir hughrifunum þegar ég spila á tónleikum í Hörpu á þessu lokaferðalagi með mínum kæra kollega til fjörutíu ára, Yo-Yo Ma.“

Gríðarleg eftirvænting

„Eftirvæntingin er gríðarleg. Okkur hefur lengi dreymt um að eiga í samstarfi við þennan einstaka listamann og nú er sá draumur loks að rætast. Yo-Yo Ma er ekki aðeins einn þekktasti sellóleikari sögunnar, heldur er hann mikill hugsjónarmaður og trúir á mátt tónlistar og menningar til að auka traust og skilning. Hann er mjög áhugasamur um að eiga gott samtal og samstarf við íslenskt listafólk og aðra við komu sína til landsins í október. Þetta verður algjör hátíð,“ er haft eftir Lára Sóleyju Jóhannsdóttur, framkvæmdastjóri SÍ.

Tónleikar Yo-Yo Ma með Sinfóníuhljómsveit Íslands fari fram fimmtudaginn 24. október og dúó-tónleikar hans með Kathryn Stott verði laugardaginn 26. október. Báðir tónleikarnir verði haldnir í Eldborg í Hörpu. 

Forsala fyrir áskrifendur Sinfóníuhljómsveitar Íslands hefjist 13. júní og almenn miðasala 19. júní á sinfonia.is og í miðasölu Hörpu.