84 prósent líkur á titli hjá Man. City en núll prósent hjá Man. United

Manchester City er á toppnum með 28 stig, Liverpool og Arsenal eru einu stigi á eftir, það eru tvö stig niður í Tottenham og Aston Villa er síðan í fimmta sætinu með 25 stig.

Ofurtölvan, sem oft er notuð til að spá í framtíðina, hefur reiknað út sigurlíkur liðanna í vor og þrátt fyrir lítinn mun á efstu liðunum er ekki mikill vafi á því hvaða lið verði enskur meistari 2024.

Það eru enn 84,3 prósent líkur á því að Manchester City verði fyrsta liðið til að vinna ensku úrvalsdeildina fjögur ár í röð. Það eru líka núll prósent líkur á því að liðið endi ekki í Meistaradeildarsæti.

Liverpool er næst á eftir en aðeins með 9,3 prósent sigurlíkur og sigurlíkur Arsenal eru síðan 5,7 prósent. Aðeins fimm lið eiga möguleika á titlinum samkvæmt útreikningi ofurtölvunnar en sigurlíkur Tottenham eru 0,3 prósent og sigurlíkur Aston Villa aðeins 0,2 prósent.

Það þýðir að það eru núll prósent líkur á því að Manchester United verði enskur meistari en liðið er nú sjö stigum frá toppsætinu. Mestar líkur er að United endi í sjöunda (16,7 prósent) og áttunda (16,4 prósent) sætinu.

Newcastle er á eftir United í töflunni en er samt spáð betri stöðu í vor. Það eru 16,2 prósent líkur á að Newcastle komist aftur í Meistaradeildina en aðeins 4,9 prósent líkur á að United verði með í Meistaradeildinni á 2024-25 tímabilinu.

Chelsea hefur verið að spila mun betur að undanförnu en liðinu er samt aðeins spáð níunda sætinu, á eftir Brighton en á undan West Ham, Brentford og Wolves.

Tíu stig voru tekin af Everton á dögunum og ofurtölvan spáir liðinu samt ekki falli úr deildinni því Luton Town, Sheffield United og Burnley fara niður samkvæmt þessari spá.