Stuðningur við ríkisstjórnina svipaður og við Samfylkingu

Berghildur Erla Bernharðsdóttir skrifar 25. október 2023 19:16

Fylgi bæði Vinstri grænna og Sjálfstæðisflokks fer niður á milli kannanna. Katrín Jakobsdóttir forsætisráðherra og Þórdís Kolbrún Reykfjörð Gylfadóttir fjármálaráðherra segja niðurstöður áhyggjuefni. Vísir

Stuðningur við Samfylkinguna mælist nú nærri samanlögðu fylgi stjórnarflokkanna þriggja samkvæmt nýrri könnun. Forsætisráðherra segir fylgistap Vinstri Grænna áhyggjuefni og telur ágreininginn sem verið hefur milli stjórnarflokkanna ekki falla þjóðinni í geð.

Sjálfstæðisflokkurinn tapar mestu fylgi stjórnarflokkanna milli mánaða samkvæmt nýrri Maskínukönnun sem kom út í dag eða tveimur prósentustigum. Fylgi flokksins hefur sjaldan mælst lægra eða 17,7 prósent. Vinstri græn tapa 0,6 prósentustigum milli kannanna. Ef kosið yrði í dag myndu um 5,9 kjósenda kjósa flokkinn. Framsóknarflokkurinn bætir hins vegar við sig einu prósentustigi og er nú nálægt tíu prósentum.

Samanlagt fylgi stjórnarflokkanna er þó það næst lægsta frá kosningunum 2021 þar sem um þriðjungur kjósenda styður þá eða 33,4 prósent.

Þórdís Kolbrún Reykfjörð Gylfadóttir varaformaður Sjálfstæðisflokksins telur ýmsar skýringar á þessu.

„Þetta er ekki gott. Við myndum að sjálfsögðu vilja vera með meira fylgi í skoðanakönnunum en það er margt sem þarf að leysa og verkefnin eru stór,“ segir hún.

Aðspurð um hvort hún telji að stólaskipti milli hennar og Bjarna Benediktssonar eftir að hann sagði af sér sem fjármálaráðherra hafi einhver áhrif á fylgið svara Þórdís:

„Það geta verið margar mismunandi skoðanir sem á endanum sem skýra þessa prósentu. Að sjálfsögðu hafa atburðir undanfarinna daga og vikna eitthvað haft að segja,“ segir hún.

Þurfi að miðla betur sínum málum

Katrín Jakobsdóttir forsætisráðherra telur að það þurfi að upplýsa þjóðina betur um verk Vinstri grænna í ríkisstjórn.

„Við liggjum mjög lágt og það ætti að vera áhyggjuefni fyrir okkur í Vinstri grænum. Að einhverju leyti tel ég okkur ekki vera að miðla því nægilega vel því sem við erum að gera því svo sannarlega erum við að vinna að mörgum góðum málum“.

Skýringa sé líka að leita í samstarf stjórnarflokkanna undanfarin misseri.

„Ég held að þessi ágreiningur sem verið hefur milli stjórnarflokkanna sé ekki endilega að falla þjóðinni í geð. Ég held að við munum sjá breytingar á verklagi og vinnubrögðum milli stjórnarflokkanna sem munu skila sér í góðum og jákvæðum árangri,“ segir Katrín

Samfylkingin er sá flokkur sem bætir mest við sig milli kannanna eða rúmlega þremur prósentustigum. Hann mælist nú með tæplega tuttugu og átta prósent fylgi sem er aðeins 5,6 prósent minna fylgi en samanlagt fylgi allra ríkistjórnarflokkanna. Það er minni hreyfing á fylgi annarra stjórnarandstöðuflokka samkvæmt könnun Maskínu.

Alþingi Ríkisstjórn Katrínar Jakobsdóttur Vinstri græn Sjálfstæðisflokkurinn Framsóknarflokkurinn Samfylkingin Skoðanakannanir

Tengdar fréttir

Þrjátíu prósent kjósenda VG styðja nú Samfylkinguna

Mesta tryggðin við stjórnmálaflokk er hjá kjósendum Samfylkingarinnar og sú minnsta hjá kjósendum Vinstri grænna. Þetta er niðurstaða könnunar sem Prósent framkvæmdi dagana 22. júní til 19. júlí þar sem spurt var hvaða lista kjósendur hafi kosið í síðustu kosningum og hvort þeir myndu kjósa listann aftur.

27. júlí 2023 15:46

Boðar skipbrot og klofning Sjálfstæðisflokksins vegna bókunar 35

Arnar Þór Jónsson, varaþingmaður Sjálfstæðisflokksins, segir hætt við því að flokkurinn verði „smáflokkur“ ef hann hrekur frá sér sína „dyggustu stuðningsmenn“ með því að styðja áfram bókun 35.

12. júlí 2023 10:12

Samfylkingin stærst og stuðningur við ríkisstjórnina á niðurleið

Stuðningur við ríkisstjórnina heldur áfram að minnka samkvæmt niðurstöðum í þjóðarpúlsi Gallup. Aðeins þrjátíu og fimm prósent sögðust styðja ríkisstjórnina. Samfylkingin er stærsti flokkurinn með rúmlega tuttugu og átta prósent fylgi.

4. júlí 2023 09:50

Samfylkingin langstærsti flokkurinn og ríkisstjórnin fellur enn

Samfylkingin mælist nú tæplega níu prósentustigum stærri en Sjálfstæðisflokkurinn samkvæmt nýrri Maskínukönnun. Samanlagt fylgi ríkisstjórnarflokkanna hefur ekki mælst minna frá kosningum og er nú 34,2 prósent. Könnunin fór fram 1. til 22. júní.

27. júní 2023 08:34

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.