Allsherjarverkfall starfsmanna ellefu félaga innan BSRB hófst í gær eftir árangurslausar þriggja daga viðræður til að afstýra aðgerðum. Enginn árangur náðist síðan á um klukkustundar löngum sáttafundi í morgun, að sögn Elísabetar S. Ólafsdóttur sáttasemjara.
„Því miður náðist enginn þráður til að spinna áfram. Þannig að við slitum fundinum. Verðum svo bara í þéttu sambandi við deiluaðila og boðum til fundar um leið og eitthvað nýtt gerist í deilunni,“ sagði Elísabet að loknum fundi.
Deilan snýst minnst um innihald skammtímasamnings sem á að gilda frá 1. apríl síðast liðnum til 31. mars á næsta ári. Rót deilunnar liggur í mismunandi kjarasamningum sem Starfsgreinasambandið (SGS) annars vegar og BSRB hins vegar gerðu við sveitarfélögin til þriggja ára í upphafi árs 2020, korteri áður en kórónuveirufaraldurinn skall á.
Starfsgreinasambandið gerði samning sem gilti frá 1. janúar 2020 til septemberloka 2023. Í honum voru ákvæði um að ef samið yrði um launahækkanir á gildistíma samningsins á þessu ári á almennum vinnumarkaði, skyldu starfsmenn hjá sveitarfélögunum einnig fá þær hækkanir. Sem þeir fengu síðan hinn 1. janúar og voru í kringum 40 þúsund krónur á mánuði að meðaltali.
Samningar BSRB við sveitarfélögin tóku einnig gildi 1. janúar 2020 en giltu í skemmri tíma eða til 1. apríl á þessu ári. Í þeim samningum var ekkert ákvæði um að hækkanir á almennum markaði ættu að skila sér til þessara félaga BSRB. Sonja Ýr Þorbergsdóttir segir greiðslurnar hins vega réttlætismál.
„Vandamálið hérna sem við stöndum frammi fyrir er að félagar okkar og félagar í SGS eru að sinna nákvæmlega sömu störfunum, eða sambærilegum, innan sveitarfélaganna. Þau verða að vera á sömu launum,“ sagði Sonja eftir fundinn í morgun. Á þeim fundi hefðu málin þróast aftur á bak fremur en áfram.
Og þar stendur hnífurinn í kúnni. BSRB vill fá þessa hækkun fyrir janúar, febrúar og mars á þessu ári í formi eingreiðslu. Sonja segir félögin eiga gilda verfallssjóði. Þau gætu því greitt verfallsbætur í langan tíma en sjóðurinn greiðir félagsmönnum í verkfalli um 30 þúsund krónur á dag fyrir skatta.
„Þetta eru ellefu aðildarfélög BSRB sem hafa ekki lagt niður störf síðan 1984. Þannig að það eru til sjóðir fyrir þessu,“ segir Sonja.
Inga Rún Ólafsdóttir formaður samninganefndar sveitarfélaganna segir þessa kröfu BSRB kosta þau milljarð. Sveitarfélögin væru aftur á móti að bjóða í staðinn 50 til 60 þúsund króna launahækkun til frambúðar. Þetta væru hækkanir á bilinu 8,77 til 12 prósent í skammtímasamningi til aprílmánaðar á næsta ári.
„Og við teljum það mun dýrmætara, mun mikilvægara, heldur en að setja út eingreiðslu til að bæta samning sem er að fullu efndur og löngu útrunninn,“ segir Inga Rún.
Auk þess hefði ekki verið samið um eingreiðslu sem þessa við fjölda félaga innan BHM og í Eflingu í nýgerðum samningum sveitarfélaganna.
„Við sjáum fyrir okkur að þetta gæti flætt yfir á alla aðra samninga sem við höfum gert, eða meira og minna. Þá myndi þessi kostnaður, þessi milljarður, verða að minnsta kosti þrír,“ segir Inga Rún.
