Gló­dís á skotskónum er Bayern tryggði sér titilinn

Fyrir loka­um­ferð þýsku deildarinnar í dag var aðal spennan fyrir fram tengd við það hvort Bayern Munchen eða Wolfs­burg myndi standa uppi sem þýskur meistari.

Leik­menn Bayern Munchen, með ís­lensku lands­liðs­konuna Gló­dísi Perlu Viggós­dóttur í hjarta varnarinnar, sáu hins vegar til þess að spennan um meistara­titilinn varð nánast engin.

Gló­dís kórónaði flotta frammi­stöðu Bayern Munchen í dag með tíunda marki liðsins á 75. mínútu. Karó­lína Lea Vil­hjálms­dóttir og Cecilía Rán Rúnars­dóttir voru á meðal vara­manna Bayern í leiknum, Karó­lína kom inn í upp­hafi seinni hálf­leiks en Cecilía var ó­notaður vara­maður.

Svein­dís Jane Jóns­dóttir var í byrjunar­liði Wolfs­burg og lagði upp eitt marka liðsins í 2-2 jafn­tefli gegn Frei­burg. Wolfs­burg endar því í 2. sæti þýsku deildarinnar, fjórum stigum á eftir Bayern Munchen og einu stigi á undan Frankfurt sem tekur 3. sætið.