„Heppin að fá að læra af þeirri bestu“

Sólveig flutti heim til Íslands fyrir þetta CrossFit tímabil og nýtur þess að fá að æfa með reynsluboltanum Anníe Mist.

Sólveig og Anníe voru báðar með á heimsleikunum í fyrra en Sólveig náði þar næstbestum árangri íslenskra kvenna og Anníe varð í fjórða sæti í liðakeppninni. Sólveig hefur byggt ofan á þennan árangur með góðri frammistöðu í undankeppni heimsleikanna á þessu tímabili og Anníe hefur enn á ný sýnt af hverju hún er mjög ofarlega á listanum yfir bestu CrossFit konur sögunnar.

Að þessu sinni ætla þær sér báðar inn á heimsleikana í einstaklingskeppninni og samkeppnin verður hörð um lausu sæti á undanúrslitamótinu.

Sólveig lætur mjög vel af því að æfa með Anníe í aðdraganda mótsins.

Hún setti inn myndband af þeim að keyra hvora áfram á einni af æfingunum í CrossFit Reykjavík. Þar var vel tekið á því eins og jafnan þegar alvöru íþróttakonur koma saman.

„Þakkarpóstur. Þessi stelpa setur pressu á mig að vera betri á hverjum degi. Ég er heppin að fá að læra af þeirri bestu,“ skrifaði Sólveig Sigurðardóttir eins og sjá má hér fyrir neðan.