Mætir með vænt glóðarauga: „Þetta var smá barningur“

Valur Páll Eiríksson skrifar 19. mars 2026 11:33

Haukur fékk einn á kjammann um síðustu helgi en er klár í slaginn. Vísir/Bjarni

Haukur Þrastarson kom vígalegur til móts við landslið karla í handbolta fyrir komandi leiki við Svía eftir harða baráttu í leik Rhein-Neckar Löwen og Eisenach á föstudaginn var.

Haukur skartaði vænasta glóðarauga í vikunni eftir að hafa verið laminn í andlitið af varnarmanni Eisenach á föstudaginn var.

„Þetta var smá barningur þarna á föstudaginn í deildinni en þetta er ekkert alvarlegt,“ segir Haukur léttur. Hann skoraði þrjú mörk og lagði upp sex í svekkjandi 29-29 jafntefli.

Klippa: Haukur klár þrátt fyrir myndarlegt glóðarauga

Haukur er hins vegar í toppstandi og hefur spilað afar vel með Löwen að undanförnu.

„Standið er bara gott. Ég var í smá brasi með hnéð eftir mót en ég er búinn að ná mér að fullu af því og hef verið á góðu skriði. Ég er í toppstandi,“ segir Haukur sem tók smá tíma í að ná sér eftir mótið í janúar.

„Það er alltaf smá áskorun að koma sér af stað eftir svona langa törn. Eins og allir vita er þetta krefjandi, langt og strangt mót og spilað þétt og allt þetta. Allir eru aðeins lemstraðir eftir svoleiðis törn en núna er maður kominn í toppstand,“ segir Haukur.

Gott að koma á Selfoss

Vegna þess að Haukur spilaði á föstudeginum síðasta gat hann komið snemma til landsins og notið með fjölskyldunni, á meðan aðrir spiluðu á sunnudegi og mættu beint í æfingar. Honum þótti gott að geta kíkt á Selfoss um síðustu helgi.

„Ég kom á laugardaginn svo ég fékk helgina í smá hvíld. Ég kíkti á Selfoss og hitti fjölskylduna og svona. Það var mjög ljúft að fá tvo daga,“

Heimsklassalið í heimsókn

Haukur fagnar því að fá heimaleiki við stórþjóð. Spennan er mikil í hópnum fyrir leikjunum tveimur fyrir fullri höll.

„Það er gott að fá heimsklassalið fyrir framan okkar fólk. Það er alltaf það besta sem við gerum, að spila heima, fyrir framan fólkið okkar. Það verður geggjað,“ segir Haukur sem segir alla ákveðna í því að nýta tímann og leikina vel upp á framhaldið að gera.

„Eins og alltaf í þessum landsliðsbolta er lítill tími sem gefst. Þó þetta séu æfingaleikir lítum við samt á það sem alvöru leiki og glugga sem þarf að nýta vel. Það gefst ekki mikill tími í þetta yfirhöfuð, svo allar æfingar og þessir leikir eru mikilvægir,“ segir Haukur.

Viðtalið má sjá í spilaranum.

Ísland og Svíþjóð mætast klukkan 19:30 í kvöld. Leikurinn fer fram á Hlíðarenda og verður lýst í beinni textalýsingu hér á Vísi.

Landslið karla í handbolta