Segir að Liverpool geti ekki lengur spilað eins og Klopp vill

Liverpool gerði markalaust jafntefli við Chelsea í gær. Þetta var þriðji leikur liðsins í röð án sigurs í ensku úrvalsdeildinni. Rauði herinn situr í 8. sæti hennar.

Carragher segir að Liverpool þurfi ef til vill að breyta um leikstíl og gera stóra hluti á félagaskiptamarkaðnum í sumar.

„Maður horfir á Liverpool og þeir gera sömu hlutina, sama hugmyndin er til staðar en þeir geta þetta ekki,“ sagði Carragher á Sky Sports í gær.

„Sem þjálfari heldurðu þig við hugmyndir þínar eða aðlagar þær leikmönnunum sem þú ert með. Klopp er augljóslega frábær þjálfari en jafnvel í kvöld spiluðu þeir eins og Liverpool fyrir 3-4 árum. Þeir náðu markalausu jafntefli en þú klórar þér í hausnum hvernig. Stóra málið er hversu auðveldlega andstæðingurinn fær færi.“

Næsti leikur Liverpool er gegn Arsenal, toppliði ensku úrvalsdeildarinnar, á páskadag.