Innlent

Telur ekki rétt að loka svæðinu við Glym

Margrét Björk Jónsdóttir skrifar
Jón Haukur Steingrímsson. jarðverkfræðingur og björgunarsveitarmaður telur að ekki eigi að loka gönguleiðum að Glym
Jón Haukur Steingrímsson. jarðverkfræðingur og björgunarsveitarmaður telur að ekki eigi að loka gönguleiðum að Glym Vísir/Vilhelm

Jarðverkfræðingur og björgunarsveitarmaður telur ekki rétt að loka gönguleiðum að Glym þrátt fyrir að svæðið sé vissulega hættulegt. Það hafi sýnt sig að lokanir hafi ekki tilætluð áhrif. Síðan árið 2014 hafa orðið 26 slys á svæðinu.

Í kjölfar banaslyss við Glym á þriðjudag hafa skapast umræður um hvort loka eigi svæðinu yfir vetrartímann.

Ferðamálastjóri sagði í dag að hann teldi það nauðsynlegt.  Þá hefur upplýsingafulltrúi Landsbjargar sagt að öryggi á svæðinu væri verulega ábótavant og þörf á úrbótum.

Jón Haukur Steingrímsson, jarðverkfræðingur og björgunarsveitarmaður, kom að björgunaraðgerðum á þriðjudaginn. Hann segir aðstæður hafa verið svipaðar og þær voru í dag. Bjart og fallegt veður, skaflar víða, harðfenni og léttur snjór yfir.

„Það er bara erfitt fyrir fólk sem kemur frá Evrópu eða Asíu eða öðrum stöðum, það sér ekki endilega hvort það sé að labba í mjúku eða glerhörðu. Þetta getur komið að óvörum og þá geta hlutirnir því miður gerst mjög hratt.”

Þyrfti að færa slóðina

Jón Haukur segir svæðið hættulegt og þörf sé á aðgerðum.

„Þá sérstaklega meðfram brúnunum á gilinu og þar sem gönguleiðin er í raun upprunaleg leið. Þetta byrjaði þannig að fólk gekk beint að augum og síðan þróast leiðin og verður brattari. Slíkar leiðir eru í raun ekkert hugsaðar. Það labbar bara einn og svo næsti og næsti og næsti og smám saman myndast slóð. En það hefur enginn leitt hugann að því hvort slóðin sé örugg.“

„Ísöxin er í raun það eina þú getur notað til að stöðva þig ef þú rennur af stað í harðfenni. Það á við um allar fjallgöngur. Ísöxi er það eina sem stoppar þig,“ segir Jón Haukur. Vísir/Vilhelm

Jón Haukur segir að eftir slys af þessu tagi fari gjarnan af stað umræður og fólk kalli eftir samfelldum keðjum og þessháttar, en hann telur það eitt og sér ekki leysa allan vanda. Við svona aðstæður sé erfitt að bregðast við nema með því að hreinlega fær slóðina og gera hana að mestu leiti upp á nýtt.

„Í raun flytja slóðina að mestu leiti frá gilbarminum, svo það sé ekki hætta á að fólk renni af stað. Og svo opna út á völdum stöðum þar sem fólk getur notið útsýnisins inni í vernduðum ramma, með girðingar og ekki þannig halla að fólk renni.“

Jón Haukur telur ekki réttu leiðina að loka svæðinu. Það hafi sýnt sig að lokanir hafi ekki tilætluð áhrif.

„Fólk fer framhjá lokunum. Prívat og persónulega er ég ekki hrifinn af boðum og bönnum. Við verðum miklu frekar að upplýsa fólk og kenna ferðamönnum hvað landið okkar, eins og það er stórkostlegt, hvað það er samt hættulegt. Það má ekki gleyma því.“

Stórkostleg upplifun í frosthörkum og fallegu veðri

Þrátt fyrir að úrbóta sé þörf víða minnir Jón Haukur á að margt hafi verið gert nú þegar. En þessi mál séu flókin í framkvæmd.

„Það koma inn í þetta landeigendur, sveitarfélögin, skipulagsmál, það þarf framkvæmdaleyfi, svo þarf jafnvel hönnuð og svo jafnvel á endanum jafnvel þó það liggi fyrir að það sé verið að fara gera miklar úrbætur á ýmsum stöðum þá erum við jafnvel í vandræðum með að fá verktaka sem geta unnið þessa vinnu sem er oft á tíðum bara býsna sérhæfð og þarf mikla aðlögun að landinu til að láta þetta ganga upp.“

Ferðamenn voru ekki allir vel búnir við Glymsgil í dag.Vísir/Vilhelm

Jón Haukur mælir ekki gegn því að ganga að Glymi á veturnar.

„Það er stórkostleg upplifun að koma hér í miklum frosthörkum og í fallegu, stöðugu veðri. En fólk þarf algjörlega að vera útbúið í samræmi við það. Það veltur allt á því hvort getum við kynnt það nógu vel fyrir ferðamönnunum okkar hvernig þeir eiga að útbúa sig. Þetta er náttúrulega stórkostlegur staður þannig eðlilega vill fólk sjá þetta. Það er erfitt að banna hluti og ég held að það sé ekki alltaf lausnin, við þurfum bara að leita leiða til að hjálpa fólki.“

Ísöxi það eina sem stöðvar þig

Varðandi aðbúnað eru almenninlegir mannbroddar númer eitt tvö og þrjú að sögn Jóns Hauks.

„Þá erum við ekki að tala um gúmmíbrodda með smápinnum. Þetta þurfa að vera broddar með að minnsta kosti eins og hálfs sentimetra göddum. Og absalút ísöxi líka sé það að fara í brattlendi. Ísöxin er í raun það eina þú getur notað til að stöðva þig ef þú rennur af stað í harðfenni. Það á við um allar fjallgöngur. Ísöxi er það eina sem stoppar þig.“


Tengdar fréttir

Koma þurfi í veg fyrir að fólk labbi upp að Glym yfir vetrar­tímann

Ferðamálastjóri segir að koma þurfi í veg fyrir að fólk labbi upp að Glym yfir vetrartímann. Hann mun eiga samtal við landeigendur, fulltrúa sveitarfélagsins, lögreglu og aðra hlutaðeigandi aðila til þess að ræða aðgerðir til að auka öryggi á svæðinu. 

Hættulegur staður allt árið um kring

Kona á þrítugsaldri lést þegar hún féll á annað hundrað metra við fossinn Glym í Hvalfirði í gær. Aðstæður voru mjög hættulegar á vettvangi, að sögn upplýsingafulltrúa Landsbjargar. Slysið sýni að bæta þurfi verulega öryggi á ferðamannastöðum landsins.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×