Enski boltinn

Vieira rekinn á Patreksdaginn

Ingvi Þór Sæmundsson skrifar
Patrick Vieira þarf að leita sér að nýju starfi.
Patrick Vieira þarf að leita sér að nýju starfi. getty/Sebastian Frej

Patrick Vieira hefur verið rekinn sem knattspyrnustjóri enska úrvalsdeildarliðsins Crystal Palace.

Vieira stýrði Palace í síðasta sinn þegar liðið laut í lægra haldi fyrir Brighton, 1-0, á miðvikudaginn. Það var þriðja tap Palace í röð og tólfti leikurinn í röð án sigurs. Liðið er í 12. sæti ensku úrvalsdeildarinnar með 27 stig, þremur stigum frá fallsæti.

Næsti leikur Palace er gegn gamla liðinu hans Vieiras, Arsenal, á sunnudaginn. Skytturnar eru á toppi deildarinnar.

Vieira tók við Palace af Roy Hodgson fyrir síðasta tímabil. Í fyrra endaði Palace í 12. sæti ensku úrvalsdeildarinnar og komst í undanúrslit bikarkeppninnar.

Áður en Vieira tók við Palace stýrði hann New York City í Bandaríkjunum og Nice í Frakklandi.




Fleiri fréttir

Sjá meira


×