Kastaði sér í snjóinn eftir sprengingu á Greni­vík og vaknaði í Noregi

Þetta kemur fram í frétt TV2 í Noregi sem hefur fylgst með konunni, Kingu Kleinschmidt frá Póllandi, og bata hennar að undanförnu. Vakin var fyrst athygli á frétt TV2 hér á landi á vef Akureyri.net

Það var þann 23. mars síðastliðinn, fyrir rétt um ári síðan, að sprenging varð í verksmiðju Pharmarctica á Grenivík, er unnið var með hreinsað bensín. Tveir slösuðust, karl og kona, sem voru flutt með hraði til Reykjavíkur, alvarlega slösuð.

Send með hraði til Noregs

Í frétt TV2 kemur fram að konan sem lenti í slysinu, hin 28 ára Kinga, hafi hlotið þriðja stigs brunasár á 85 prósent líkama hennar. Eftir að hún var flutt til Reykjavíkur var fljótt tekin ákvörðun um að senda hana til Noregs, á sjúkrahúsið í Bergen, þar sem ljóst væri að ekki yrði hægt að sinna meiðslum hennar hér á landi.

Sjálf lýsir hún slysinu á þá leið að hún hafi, við enda vinnudagsins, verið að kanna hversu mikið væri eftir af hreinsuðu bensíni í íláti í verksmiðjunni.

„Allt í einu sprakk þetta í andlitið á mér og allur líkaminn logaði,“ segir hún.

Segist Kinga muna eftir því að hafa hlaupið út og kastað sér í snjóinn til að kæla líkamann. Segist hún muna slysið og hverja einustu sekúndu næstu fimm mínútna á eftir það.

„Svo missti ég meðvitund og vaknaði á sjúkrahúsi í Noregi mánuði síðar.“

Haft er eftir Ragnvald Ljones Brekke, deildarstjóra á sjúkrahúsinu í Bergen, sem leitt hefur meðferðina á Kingu, að af þeim sem hlotið hafi meðferð á sjúkrahúsinu hafi enginn lifað af jafn alvarleg meiðsli og Kinga hlaut í slysinu.

Sem fyrr segir var hún með þriðja stigs brunasár á um 85 prósent líkama hennar. Kinga undirgekkst umfangsmiklar aðgerðir sem fólu meðal í sér að að húð af látnum líffæragjöfum var notuð til að vernda húð hennar. Þá var húð af hálsi hennar var notuð til að búa til ný augnlok, svo dæmi séu tekin.

Ný svissnesk aðferð prófuð

Í tilfelli Kingu er verið að prófa nýja aðferð sem þróuð var í Sviss. Sýni eru tekin af húð hennar, þau send til Sviss og þaðan eru þau ræktuð í smáa búta sem ígrædd eru á líkama hennar. Þetta hefur verið reynt tvisvar á Kingu og tókst í annað sinn mjög vel, að sögn Brekke.

Kinga hefur verið í langri og strangri meðferð síðustu tíu mánuði. Fyrir um tveimur mánuðum náði hún þeim áfanga að geta stigið fyrstu skrefin eftir slysið.

„Frá því að geta ekki gengið yfir í að geta farið ein inn á baðherbergi. Ég get núna gengið um án aðstoðar frá hjúkrunarfræðingum,“ segir Kinga.

Ég er svo þakklát fyrir að hafa getað komið hingað. Þau hafa bjargað lífi mínu, segir Kinga, sem er staðráðinn í því að lifa lífinu áfram þrátt fyrir slysið.

TV2 fylgdist með Kingu í tíma hjá sjúkraþjálfara, þar sem hún var sem sprækust. Hana dreymir um að snúa aftur til Íslands, þar sem fjölskylda hennar býr.

„Það verður gott að geta ferðast á ný,“ segir hún.

Lesa má umfjöllun TV2 hér.