Greiða 67 þúsund á fermetra fyrir stækkun lóða við Sundlaugartún

Tryggvi Páll Tryggvason skrifar 3. febrúar 2023 09:47

Þessar girðingar verða fjarlægðar en á móti hafa eigendur þriggja fasteigna við Einimel gert samning um að lóðir þeirra stækki með tilgreindum hætti. Vísir/Vilhelm

Eigendur Einimels 18, 24 og 26 greiða að meðaltali 67.897 krónur á fermetra til borgarinnar fyrir stækkun á lóðum þeirra við Sundlaugartún. Áætlað er að borgin fái samtals um sextán milljónir í sinn hlut í viðskiptunum.

Þetta er á meðal þess sem kemur fram í fylgiskjölum með fundargerð borgarráðs Reykjavíkurborgar frá því í gær. Þar var deiliskipulagstillaga sem gerir ráð fyrir að lóðir umræddra fasteigna stækki tekin fyrir, og samþykkt.

Töluvert hefur verið fjallað um málið, sem snýst í stuttu máli um það á sínum tíma reistu eigendur húsa við Einimel 22 til 26 girðingu við lóðir sínar sem ganga að verulegu leyti inn á almannarými.

Umhverfis- og skipulagsráð borgarinnar samþykkti í síðustu viku deiliskipulagstillögu sem kynnt var sem lausn á málinu. Hún fól í sér að eigendum einbýlishúsa við Einimel 18-26 var boðið að kaupa hluta af því svæði sem um ræðir og lóðirnar stækkaðar til samræmis við það. Eigendur Einimels 18, 24 og 26 gengu að tilboðinu. Tillagan felur einnig í sér að umræddar girðingar verða fjarlægðar.

Það þýðir að lóðir húsanna við Einimel 18, 24 og 26 munu stækka. Lóðin við Einimel 18 fer úr 640 fermetrum í 687 fermetra. Lóðin við Einimel 24 fer úr 690 fermetrum í 769 fermetra og lóðin við Einimel 26 fer úr 689 fermetrum í 799 fermetra. Samtals stækka lóðirnar því um 236 fermetra. Borgarlandið minnkar til samræmis við það.

Tveir óháðir fasteignasalar gerðu verðmat

Borgarráð tók deiliskipulagstillöguna fyrir á fundi í gær. Þar var tillagan samþykkt með fjórum atkvæðum fulltrúa meirihlutans gegn þremur atkvæðum fulltrúa minnihlutans.

Einnig voru lagðir fram samningar við eigendur Einimels 18,24 og 26 þar sem fram kemur á hvaða verði viðskiptin fara fram.

Brotna línan sýnir hvernig lóðirnar stækka.

Þar segir að meðalverð á fermetra sé 67.897 kr sem fengið hafi verið með mati tveggja óháðra fasteignasala. Endanlegt kaupverð miðast þó við endanlega stækkun lóðar.

Lóðin við Einimel 26 stækkar mest, eða um 110 fermetra. Þar er kostnaður við stækkunina metin á 68.313 krónur á fermetra, eða samtals 7,5 milljónir króna. Er það verðið sem eigendur Einimels greiða fyrir stækkunina.

Málið hefur verið til umfjöllunar innan borgarkerfisinsVísir/Vilhelm

Lóðin við Einimel 24 stækkar um 79 fermetra. Þar er kostnaður við stækkunina metin á 67.184 krónur á fermetra, eða samtals 5,3 milljónir króna.

Lóðin við Einimel 18 stækkar um 47 fermetra. Þar er kostnaður við stækkunina metin á 68.192 krónur á fermetra, eða samtals um 3,2 milljónir króna. Samtals fær borgin því rétt rúmar sextán milljónur í sinn hlut fyrir borgarlandið.

Allir samningarnir þrír eru gerðir með fyrirvara um að deiliskipulagstillagan verði endanlega samþykkt. Eftir samþykkt borgarráðs í gær bíður hún nú borgarstjórnar til endanlegrar samþykktar.

Skipulag Nágrannadeilur Deilur um Sundlaugartún Reykjavík Sveitarstjórnarmál

Tengdar fréttir

„Það er það sem maður óttast“

Borgarland Reykjavíkurborgar minnkar um meira en 200 fermetra ef borgarráð samþykir nýtt deiliskipulag fyrir umdeilt tún við Vesturbæjarlaug. Borgarfulltrúi minnihlutans segir slæmt ef málið verður fordæmisgefandi.

27. janúar 2023 23:31

Borgarlandið umdeilda sem stækkar við að minnka

Borgarland Reykjavíkurborgar mun minnka um 236 fermetra samþykki borgarráð nýtt deiluskipulag Sundlaugartúnsins í Vesturbæ borgarinnar. Engu að síður er ákvörðunin kynnt þannig að svokallað „opið borgarland“ muni með breytingunni stækka, þrátt fyrir að skipulag svæðisins hafi fyrir breytinguna gert ráð fyrir að um opið leiksvæði væri að ræða.

27. janúar 2023 11:18

Girðingarnar fjarlægðar en lóðir stækkaðar

Umhverfis- og skipulagssvið Reykjavíkurborgar hefur samþykkt breytingu á deiliskipulagi Vesturbæjarlaugar við Sundlaugartúnið, sem felur í sér lausn á Sundlaugartúnsmálinu svokallaða. Tillagan nær fram að ganga samþykki borgarráð deiliskipulagið.

26. janúar 2023 09:10

Vandalismi vestur í bæ vegna ágreinings um lóðamörk

Deilan um Sundlaugartúnið hefur harðnað en um helgina voru þrír bílar sem standa við hús að Einimel 22 til 26 í Vesturbæ Reykjavík rispaðir.

29. mars 2022 11:03

Segir af og frá að borgin hafi samþykkt landtöku hljóðalaust

Formaður skipulags- og samgöngunefndar segir af og frá að Reykjavíkurborg hafi samþykkt „landtöku“ hljóðalaust. Þvert á móti. Vesturbæingar eigi að gleðjast yfir fyrirhuguðum breytingum á deiliskipulagi við Sundlaugartún og mikilvægt sé að sátt hafi náðst í málinu.

2. mars 2022 22:41

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.