Enski boltinn

Leicester og Leeds kláruðu neðri deildar liðin

Arnar Geir Halldórsson skrifar
Úr leik Accrington Stanley og Leeds.
Úr leik Accrington Stanley og Leeds. vísir/Getty

Leeds United og Leicester City eru komin áfram í enska bikarnum í fótbolta eftir sigra á neðri deildar liðum í hádeginu.

Leeds lenti ekki í teljandi vandræðum með C-deildarlið Accrington Stanley en leikið var á heimavelli síðarnefnda liðsins.

Jack Harrison náði forystunni fyrir Leeds um miðbik fyrri hálfleiks og Junior Firpo og Luis Sinisterra voru á skotskónum í síðari hálfleik og komu úrvalsdeildarliðinu í 0-3 forystu. Heimamenn náðu að klóra í bakkann með marki Leslie Adekoya skömmu fyrir leikslok en lokatölur 1-3 fyrir Leeds.

Leicester þurfti að hafa töluvert meira fyrir hlutunum þegar liðið heimsótti D-deildarlið Walsall. Ekkert mark var skorað í fyrri hálfleik en strax í upphafi síðari hálfleiks fengu Leicester vítaspyrnu sem Youri Tielemans brenndi af.

Nígeríski sóknarmaðurinn Kelechi Iheanacho kom inn af bekknum hjá Leicester á 63.mínútu og skoraði það sem reyndist eina mark leiksins á 68.mínútu. Leicester þar með komið áfram í 5.umferð ensku bikarkeppninnar ásamt Leeds og Man City.




Fleiri fréttir

Sjá meira


×