„Þetta breytir al­gjör­lega sýn manns á lífið“

Nú á dögunum afhenti Rúrik samtökunum styrk upp á rúma eina og hálfa milljón króna. Styrkurinn var verðlaunafé sem Rúrik hafði unnið í sérstökum jólaþætti af þýsku sjónvarpsþáttaröðinni Let's Dance. Rúrik sigraði dansþættina Let's Dance eftirminnilega árið 2021, ásamt dansfélaga sínum Renötu Lusin.

Gaf 2,2 milljónir til samtakanna á síðasta ári

Þetta er þó ekki í fyrsta sinn sem Rúrik lætur verðlaunafé sitt úr sjónvarpsþáttum renna til SOS því árið 2022 barst samtökunum um 2,2 milljónir króna frá þýskum sjónvarpsstöðvum. Þar var um að ræða fjárhæðir sem Rúrik hafði unnið sér inn í spurninga- og þrautaþáttum.

Hér að neðan má sjá brot úr þrautaþættinum Hirschhausens Quiz des Menschen. Þar fékk Rúrik það vandasama verkefni að spila lagið Seven Nation Army á flöskur. Þrátt fyrir að það hafi ekki tekist betur en svo að hann braut eina flöskuna, vann Rúrik 1,6 milljónir króna í þættinum, sem hann lét að sjálfsögðu renna til SOS Barnaþorpa.

Áhrifamikið ferðalag til Malaví

Á þeim fjórum árum sem Rúrik hefur starfað með SOS Barnaþorpum hefur hann meðal annars fengið tækifæri til þess að ferðast til Malaví í Afríku, þar sem hann fékk að kynnast starfi SOS með eigin augum. Þar segist hann hafa lært afar margt og öðlast nýja sýn á lífið.

„Það var ótrúlega lærdómsríkt, að fá að vinna svona með fólki sem er búið að helga lífi sínu þessu,“ segir Rúrik í samtali við Vísi.

„Þetta breytir algjörlega sýn manns á lífið. Stundum þarf maður að minna sig á það að vera þakklátari fyrir það sem maður hefur.“

Rúrik ferðaðist til Malaví á síðasta ári, ásamt Jóhannesi Ásbjörnssyni, athafnamanni og mági sínum. Eftir ferðalagið gáfu þeir út heimildarmyndina Rúrik og Jói í Malaví. Í kjölfarið fjölgaði nýskráðum styrktarforeldrum SOS á Íslandi um rúmlega fjögur hundruð manns.

„Það er svolítið magnað að land eins og Ísland, eins fá og við erum, að við séum það land í heiminum sem erum með mesta aukningu á styrktarforeldrum í heiminum. Mér finnst það alveg magnað og mig langar að þakka fyrir það,“ segir Rúrik.

Danshæfileikarnir komu honum sjálfum á óvart

Það vakti gríðarlega athygli þegar Rúrik reimaði á sig dansskónna árið 2021 eftir að hafa lagt fótboltaskóna á hilluna. Frammistaða hans í þýsku dansþáttunum Let's Dance kom öllum á óvart. Danssérfræðingurinn Jóhann Gunnar Arnarson hafði meðal annars orð á því að Rúrik væri einn besti karldansari sem hann hefði nokkurn tímann séð í svona þáttum. Rúrik segist ekki vita hvaðan danshæfileikarnir koma, þeir hafi komið honum sjálfum á óvart.

„Þetta er bara eins og með allt sem ég geri, ég fór bara all in. Um leið og ég vissi hvaða dans ég væri að fara dansa þá eyddi ég klukkutímum á YouTube að kynna mér dansinn. Svo voru náttúrlega bara þrotlausar æfingar fram að þættinum. Ég hafði fyrst og fremst bara mjög gaman að þessu. Þetta er að mörgu leyti svolítið öðruvísi heimur en fótboltaheimurinn.“

„Fótboltaheimurinn snýst um að sýna engar tilfinningar, á meðan dansinn snýst um að sýna allar tilfinningar í heiminum.“

Landaði sínu stærsta hlutverki til þessa

Eftir þátttöku hans í þáttunum segist Rúrik hafa kynnst nýrri hlið á sjálfum sér. Hann fann hve mikið hann naut þess að koma fram. Síðan þá hefur hann prófað sig áfram í dansi, söng og leiklist. Hann hefur gefið út lag, tekið þátt í söngþættinum The Masked Singer og leikið í kvikmyndinni Leynilöggu svo eitthvað sé nefnt. Hann tekur nýjum áskorunum fagnandi og er óhræddur við að ögra bæði sjálfum sér og öðrum.

„Ég er ekkert hræddur við að segja já og takast á við nýjar áskoranir. Ef ég á að vera alveg hreinskilinn þá finnst mér líka stundum dálítið gaman að stuða fólk. Það er svo algengt í fólki að finnast alls konar asnalegt og það má eiginlega enginn vera neitt öðruvísi. Þannig mér finnst svolítið gaman að stuða fólk og taka að mér verkefni sem gætu að einhverra mati verið asnaleg.“

Það er óhætt að segja að næsta verkefni Rúriks sé í stærri kantinum. Hann er að fara að leika í kvikmynd á vegum kvikmyndarisans Universal. Mikil leynd hvílir yfir kvikmyndinni og getur Rúrik því lítið tjáð sig.

„Þetta er alveg lang, langstærsta hlutverk sem ég hef landað,“

segir Rúrik að lokum, fullur tilhlökkunar fyrir komandi tímum.